مجمع الزوائد ومنبع الفوائد

سیدنا جابر بن عبدالله رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص کاہن کے پاس جائے ، اور اس کی کہی ہوئی بات کی تصدیق کرے ، تو وہ شخص اس چیز کا کفر کرتا ہے جو سیدنا محمد صلی اللہ علیہ وسلم پر نازل کی گئی ہے “ ۔
یہ روایت امام بزار نے نقل کی ہے ۔ اور اس کے رجال صحیح کے رجال ہیں صرف عقبہ بن سنان کا معاملہ مختلف ہے ، اور وہ ثقہ ہے ۔

سیدنا عمر بن خطاب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص ” عراف “ ( قیافہ شناس یا کاہن ) کے پاس جائے اس کی چالیس دن تک نماز قبول نہیں ہوتی “ ۔
یہ روایت امام طبرانی نے معجم اوسط میں اپنے استاد مصعب بن ابراہیم بن حمزہ دہری سے نقل کی ہے ۔ اور میں اس سے واقف نہیں ہوں ۔ اس روایت کے بقیہ رجال صحیح کے رجال ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص عراف ( قیافہ شناس یا کاہن ) کے پاس جائے اس کی چالیس دن تک نماز قبول نہیں ہوتی “ ۔
یہ روایت امام طبرانی نے معجم اوسط میں نقل کی ہے ۔ اور اس کے رجال ثقہ ہیں ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کاہن کے پاس جائے ، اور اس کی کہی ہوئی بات کی تصدیق کرے ، تو وہ اس چیز سے لاتعلق ہو جاتا ہے جو سیدنا محمد صلی اللہ علیہ وسلم پر نازل کی گئی ہے ، اور جو شخص اس کی تصدیق کیے بغیر اس کے پاس جائے ، تو چالیس دن تک اس کی نماز قبول نہیں ہوتی “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی رشدین بن سعد ہے ، اور وہ ضعیف ہے دلوں کو نرم کرنے والے موضوعات میں اس کی توثیق کی گئی ہے اس روایت کے بقیہ رجال ثقہ ہیں ۔

سیدنا واثلہ بن اسقع رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا : ” جو شخص کاہن کے پاس جائے ، اور اس سے کسی چیز کے بارے میں دریافت کرے ، تو چالیس دن تک اس کی ، توبہ محجوب رہتی ہے ، اور اگر وہ اس کی کہی ہوئی بات کی تصدیق کر دے ، تو وہ کفر کا مرتکب ہوتا ہے “ ۔
یہ روایت امام طبرانی نے معجم اوسط میں نقل کی ہے ۔ ان کی نقل کردہ ایک روایت میں : ” اور اس کی تصدیق کر دے “ اس کی جگہ یہ الفاظ ہیں : ” اگر وہ اس پر ایمان رکھے ، جو اس نے کہا: ہو “ ۔ اس کی سند میں ایک راوی سلیمان بن أحمد واسطی ہے ، اور وہ متروک ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” وہ شخص بلند درجہ تک نہیں پہنچے گا ، جو کہانت کرے یا پانسوں کے تیر رکھے یا فال ( یا بدشگونی ) کی وجہ سے سفر سے واپس آ جائے “ ۔

ایک روایت میں یہ الفاظ ہیں : ” یا وہ بدشگونی لے ، اور یہ چیز اسے سفر سے لوٹا دے ، وہ بلند درجات کی طرف نہیں دیکھے گا “ ۔
یہ روایت امام طبرانی نے دو اسناد کے ساتھ نقل کی ہے ۔ جن میں سے ایک کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : ” جو شخص عراف ( قیافہ شناس ) یا کاہن کے پاس جاتا ہے ، اور اس کی کہی ہوئی بات پر ایمان رکھتا ہے ، تو وہ اس چیز پر انکار کرتا ہے جو سیدنا محمد صلی اللہ علیہ وسلم پر نازل کی گئی “ ۔
یہ روایت امام طبرانی نے معجم کبیر اور معجم اوسط میں نقل کی ہے ، تاہم انہوں نے یہ الفاظ نقل کیے ہیں : ” وہ اس کی تصدیق کرتا ہے “ ۔ اسی طرح امام بزار کی روایت ہے ، معجم کبیر اور امام بزار کے رجال ثقہ ہیں ۔

سیدنا عبداللہ بن مسعود رضی اللہ عنہ فرماتے ہیں : جو شخص عراف ( قیافہ شناس ) یا جادوگر یا کاہن کے پاس جائے ، اور اس سے کچھ دریافت کرے اور اس کی کہی ہوئی بات کی تصدیق کرے ، تو وہ اُس چیز کا کفر کرتا ہے ، جو سیدنا محمد صلی اللہ علیہ وسلم پر نازل کی گئی “ ۔
یہ روایت امام ابویعلیٰ نے نقل کی ہے ۔ اور اس کے رجال صحیح کے رجال ہیں ، صرف ہبیرہ بن یریم کا معاملہ مختلف ہے ، اور وہ ثقہ ہے ۔