مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تمہارے سرموں میں ، سب سے بہتر اثمد ہے ، جو بال اُگاتا ہے ، اور بینائی تیز کرتا ہے “ ۔
یہ روایت امام بزار نے نقل کی ہے اور اس کے رجال صحیح کے رجال ہیں ۔

سیدنا علی رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم پر اثمد استعمال کرنا لازم ہے ، کیونکہ یہ بالوں کو اُگانے والا ہے ، گندگی چیز کو لے جانے والا ہے ، اور بینائی کو صاف کرنے والا ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عون بن محمد بن حنفیہ ہے ، جس کا ذکر ابن ابوحاتم نے کیا ہے ، ایک جماعت نے ان سے روایات نقل کی ہیں ، کسی نے ان پر جرح نہیں کی ہے اس روایت کے بقیہ رجال ثقہ ہیں ۔

سیدنا عقبہ بن عامر جہنی رضی اللہ عنہ روایت کرتے ہیں نبی اکرم صلی اللہ علیہ وسلم نے ارشاد فرمایا : ” جب کوئی شخص سرمہ لگائے ، تو وہ طاق تعداد میں لگائے ، جب ( استنجاء کرنے کے بعد ) ڈھیلے استعمال کرے ، تو طاق تعداد میں استعمال کرے “ ۔
یہ روایت امام أحمد نے نقل کی ہے ۔ اس کی سند میں ایک راوی ابن لہیعہ ہے اس کی نقل کردہ حدیث حسن ہے اس روایت کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم طاق تعداد میں سرمہ لگایا کرتے تھے ۔
یہ روایت امام بزار نے نقل کی ہے ۔ اس کی سند میں ایک راوی وضاح بن یحیی ہے ، اور وہ ضعیف ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم جب سرمہ لگاتے تھے ، تو دائیں آنکھ میں تین مرتبہ لگاتے تھے اور بائیں آنکھ میں دو مرتبہ لگاتے تھے آپ اسے طاق تعداد میں کر لیتے تھے ۔
یہ روایت امام طبرانی نے معجم کبیر اور معجم اوسط میں اور امام بزار نے بھی نقل کی ہے ۔ اس کی سند میں ایک راوی عقبہ بن علی ہے ، اور وہ ضعیف ہے ۔