مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے جلالہ ( گندگی کھانے والے جانور ) کا گوشت کھانے ، اس کا دودھ پینے اسے کھانے اور اس پر سواری کرنے سے منع کیا ہے ۔
یہ روایت امام بزار نے نقل کی ہے ۔ اس کی سند میں ایک راوی اشعث بن براز ہجیمی ہے ، اور وہ متروک ہے ۔

سیدنا عبداللہ بن عباس رضی اللہ عنہما بیان کرتے ہیں : فتح مکہ کے دن نبی اکرم صلی اللہ علیہ وسلم نے جلالہ کا گوشت کھانے اس کا دودھ پینے اور اس پر سواری کرنے سے منع کر دیا تھا ۔ علامہ ہیثمی فرماتے ہیں : ) میں یہ کہتا ہوں
یہ روایت امام ترمذی نے اختصار کے ساتھ نقل کی ہے ۔
یہ روایت امام بزار نے نقل کی ہے ۔ اس کی سند میں ایک راوی لیث بن ابوسلیم ہے ، اور وہ ثقہ ہے ، لیکن وہ مدلس ہے اس روایت کے بقیہ رجال ثقہ ہیں ۔

سیدہ ام نصر محاربیہ رضی اللہ عنہما بیان کرتی ہیں : نبی اکرم صلی اللہ علیہ وسلم سے جلالہ کے بارے میں دریافت کیا گیا ، تو آپ نے فرمایا : کیا وہ گھاس نہیں چرتا اور درخت ( کے پتے ) نہیں کھاتا راوی کہتے ہیں : شاید دوسرے شخص نے جواب دیا : جی ہاں ، تو نبی اکرم صلی اللہ علیہ وسلم نے فرمایا ، پھر تم اس کا گوشت استعمال کر لو ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی ابن اسحاق ہے ، اور وہ مدلس ہے لیکن وہ ثقہ ہے اس روایت کے بقیہ رجال ثقہ ہیں اس کے بعض رجال کے بارے میں ایسا کلام کیا گیا ہے جو نقصان دہ نہیں ہے ۔

سیدنا جابر رضی اللہ عنہ بیان کرتے ہیں : ایک گائے شراب کے پاس آئی اور اس نے اس کو پی لیا لوگوں کو اس کے حوالے سے اندیشہ ہوا وہ لوگ نبی اکرم صلی اللہ علیہ وسلم کی خدمت میں حاضر ہوئے ، تو نبی اکرم صلی اللہ علیہ وسلم نے فرمایا : تم اس کا گوشت کھا لو اس کو کھانے میں کوئی حرج نہیں ہے ۔
یہ روایت امام ابویعلیٰ نے بقیہ سے نقل کردہ روایت کے طور پر نقل کی ہے بقیہ نامی راوی مدلس ہے عمر نامی راوی سے مراد اگر تو عمر بن عبداللہ بن خثم ہے ، تو وہ بھی ضعیف ہے ، اور اگر اس سے مراد عفرہ کا غلام ہے ، تو وہ بھی ضعیف ہے ویسے اس کی توثیق کی گئی ہے ۔