مجمع الزوائد ومنبع الفوائد

سیدہ اسماء بنت ابوبکر رضی اللہ عنہما کے بارے میں یہ بات منقول ہے کہ ایک مرتبہ انہوں نے ثرید تیار کیا اور پھر اسے کسی چیز کے ذریعے ڈھانپ دیا تاکہ اس کی گرمی ختم ہو جائے پھر انہوں نے یہ بات بیان کی میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے : یہ زیادہ برکت کا باعث ہے “ ۔
یہ روایت امام أحمد نے دو اسناد کے ساتھ نقل کی ہے ۔ جن میں سے ایک منقطع ہے ، اور دوسری میں ایک راوی ابن لہیعہ ہے جس کی نقل کردہ حدیث حسن ہے ، اور اس میں ضعف پایا جاتا ہے
یہ روایت امام طبرانی نے بھی نقل کی ہے ۔ اس کی سند میں ایک راوی قرہ بن عبدالرحمن ہے ، جسے ابن حبان اور دیگر حضرات نے ثقہ قرار دیا ہے یحیی بن معین اور دیگر حضرات نے اسے ضعیف قرار دیا ہے ان دونوں کے بقیہ رجال صحیح کے رجال ہیں ۔

سیدہ جویریہ رضی اللہ عنہا بیان کرتی ہیں : نبی اکرم صلی اللہ علیہ وسلم اس بات کو ناپسند کرتے تھے کہ جب تک کھانے کے دھوئیں کی گرمی ختم نہیں ہوتی اس سے پہلے کھانا کھایا جائے ۔
یہ روایت امام طبرانی نے نقل کی ہے ۔ اس کی سند میں ایک راوی ایسا ہے جس کا نام بیان نہیں کیا گیا ہے اس کی بقیہ سند حسن ہے ۔

سیدہ خولہ بنت قیس رضی اللہ عنہا جو سیدنا حمزہ بن عبدالمطلب رضی اللہ عنہ کی اہلیہ تھیں وہ بیان کرتی ہیں : ایک مرتبہ نبی اکرم صلی اللہ علیہ وسلم میرے ہاں تشریف لائے میں نے آپ کے لئے خزیرہ تیار کیا وہ میں نے آپ کی خدمت میں پیش کیا آپ نے اس میں ہاتھ ڈالا تو اس کی گرمی کو محسوس کیا ، تو اپنا ہاتھ کھینچ کر لیا آپ نے ارشاد فرمایا : اے خولہ ! ہم نہ گرمی برداشت کر سکتے ہیں اور نہ ٹھنڈک برداشت کر سکتے ہیں اے خولہ ! اللہ تعالیٰ نے مجھے کوثر عطا کیا ہے وہ جنت میں موجود ایک نہر ہے ، اور مخلوق میں کوئی بھی میرے نزدیک ان افراد سے زیادہ محبوب نہیں ہے کہ تمہاری قوم کے جو افراد اس پر وارد ہوں گے “ ۔ اس کے بعد راوی نے پوری حدیث ذکر کی ہے ۔

ایک روایت میں یہ الفاظ ہیں : وہ خاتون بیان کرتی ہیں : میں نے نبی اکرم صلی اللہ علیہ وسلم کی خدمت میں پیالے میں عصیدہ پیش کیا جب آپ نے اپنا ہاتھ اس پر رکھا تو فرمایا اس نے جلا دیا آپ نے فرمایا : ” ارے “ ( یا ” اوہ “ ) پھر آپ نے فرمایا : انسان کو جب کوئی بھلائی لاحق ہوتی ہے ، تو وہ حس کہہ دیتا ہے ، تو جب اسے ٹھنڈ لگتی ہے ، تو بھی وہ ” ارے “ کہہ دیتا ہے ۔ یہ تمام روایات امام طبرانی نے دو اسناد کے ساتھ نقل کی ہیں جن میں سے ایک کے رجال صحیح کے رجال ہیں ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کے پاس ایک پیالہ لایا گیا جو گرم تھا آپ نے اپنا ہاتھ اس میں ڈالا اور پھر اسے اٹھا لیا اور ارشاد فرمایا : بے شک اللہ تعالیٰ ہمیں آگ نہیں کھلاتا ہے ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی عبداللہ بن یزید بکری ہے ، جسے ابوحاتم نے ضعیف قرار دیا ہے اس روایت کے بقیہ رجال ثقہ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کھانے کو ٹھنڈا کر کے کھاؤ کیونکہ گرم کھانا برکت والا نہیں ہوتا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی عبداللہ بن یزید بکری ہے ، جسے ابوحاتم نے ضعیف قرار دیا ہے ۔