مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” وہ شخص ہم میں سے نہیں ہے جو کسی حاملہ عورت کے ساتھ صحبت کرے “ ۔
یہ روایت امام أحمد نے ایک طویل حدیث کے ضمن میں نقل کی ہے ۔ یہ امام طبرانی نے بھی نقل کی ہے ۔ اس کی سند میں ایک راوی حجاج بن ارطاۃ ہے ، اور وہ تدلیس کرنے والا ہے اس روایت کے بقیہ رجال صحیح کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی شخص کسی ایسی عورت کے ساتھ ہرگز صحبت نہ کرے جس کا حمل کسی اور سے ہو “ ۔
یہ روایت امام أحمد نے نقل کی ہے ۔ اس کی سند میں ایک راوی رشدین بن سعد ہے جس کی توثیق کی گئی ہے اور وہ ضعیف ہے ۔

یحیی بن سعید بن دینار ، جو آل زبیر کا غلام ہے وہ بیان کرتے ہیں : ایک ثقہ شخص نے مجھے یہ بات بتائی ہے کہ غزوہ خبیر کے موقع پر نبی اکرم صلی اللہ علیہ وسلم نے حاملہ عورتوں کے ساتھ صحبت کرنے سے منع کر دیا تھا آپ نے ارشاد فرمایا تھا : کیا تم کسی دوسرے کے کھیت کو سیراب کرو گے ۔
یہ روایت امام ابویعلیٰ نے نقل کی ہے ۔ یحیی نامی راوی سے میں واقف نہیں ہوں ابن ابوزیاد نامی راوی ضعیف ہے ویسے اس کی توثیق کی گئی ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم نے غزوہ خبیر کے موقع پر حاملہ عورتوں کے ساتھ صحبت کرنے سے منع کر دیا تھا جب تک وہ بچہ کو جنم نہیں دے دیتیں ۔
یہ روایت امام طبرانی نے نقل کی ہے ۔ اور اس کے رجال صحیح کے رجال ہیں ۔

سیدنا عبداللہ بن عمر رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” ہر وہ کنیز جو حاملہ ہو ، تو اس کے مالک پر یہ حرام ہے ( کہ وہ اس کے ساتھ صحبت کرے ) جب تک وہ پیٹ میں موجود بچے کو جنم نہیں دیدیتی “ ۔
یہ روایت امام طبرانی نے ایک طویل حدیث کے ضمن میں نقل کی ہے ۔ جو مکمل روایت آگے چل کر کھانے پینے سے متعلق باب میں لہسن کھانے والے باب میں آئے گی اس روایت کی سند میں ایک راوی یحیی بن عبداللہ بابلتی ہے ، اور وہ ضعیف ہے ۔ میں یہ کہتا ہوں طلاق سے متعلق باب میں استبراء سے متعلق باب میں احادیث آئیں گی ۔

رجاء بن حیوہ ، اپنے والد کے حوالے سے اپنے دادا سے یہ روایت نقل کرتے ہیں : غزوہ خبیر کے موقع پر ایک کنیز نبی اکرم صلی اللہ علیہ وسلم کے پاس سے گزری وہ ایسی حاملہ تھی کہ وضع حمل کا زمانہ قریب تھا ، نبی اکرم صلی اللہ علیہ وسلم نے دریافت کیا : یہ کس کی ( کنیز ) ہے ؟ لوگوں نے بتایا کہ فلاں شخص کی ہے ۔ نبی اکرم صلی اللہ علیہ وسلم نے دریافت کیا : کیا وہ شخص اس کے ساتھ صحبت کرتا ہے عرض کی گئی : جی ہاں ! نبی اکرم صلی اللہ علیہ وسلم نے فرمایا : وہ اس کے بچے کے ساتھ کیا کرے گا کیا وہ اس کا دعوی کرے گا حالانکہ وہ اس کا بچہ ہے ہی نہیں یا پھر وہ اسے غلام بنا لے گا ، جب کہ اس بچے کی سماعت اور بصارت کو اس نے غذا فراہم کی ہو گی میں نے یہ ارادہ کیا تھا کہ میں اس شخص پر ایسی لعنت کروں جو اس کے ساتھ اس کی قبر میں داخل ہو ۔
یہ روایت امام طبرانی نے نقل کی ہے ۔ اس کی سند میں ایک راوی خارجہ بن مصعب ہے ، اور وہ متروک ہے ۔