مجمع الزوائد ومنبع الفوائد

سیدنا صہیب بن سنان رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی عورت کا مہر طے کرتا ہے اور اللہ تعالیٰ یہ بات جانتا ہو کہ وہ اس عورت کو اس کی ادائیگی نہیں کرے گا ، اور وہ اللہ کے نام پر اس عورت کے ساتھ دھوکے سے کام لیتا ہے ، اور اس کی شرمگاہ کو باطل طور پر حلال کروا لیتا ہے ، وہ شخص قیامت کے دن جب اللہ تعالیٰ کی بارگاہ میں حاضر ہو گا ، تو وہ زانی ( شمار ) ہو گا “ ۔
یہ روایت امام أحمد نے اور امام طبرانی نے نقل کی ہے ، امام أحمد کی سند میں ایک راوی ایسا ہے ، جس کا نام بیان نہیں کیا گیا ہے ، اس روایت کے بقیہ رجال ثقہ ہیں ، امام طبرانی کی سند میں ایسے راوی ہیں ، جن سے میں واقف نہیں ہوں ۔

سیدنا ابوہریرہ رضی اللہ عنہ بیان کرتے ہیں : میرے پاس نبی اکرم صلی اللہ علیہ وسلم کے حوالے سے دو احادیث موجود ہیں ، ان میں سے ایک یہ ہے کہ آپ صلی اللہ علیہ وسلم نے ارشاد فرمایا ہے : ” جو شخص انصار سے محبت رکھتا ہے ، اللہ تعالیٰ اس سے محبت رکھتا ہے “ ۔ اور دوسری روایت یہ ہے : ” جو شخص مہر کے عوض میں ، عورت کے ساتھ شادی کرتا ہے ، اور وہ اس عورت کو اس کی ادائیگی کا ارادہ نہ رکھتا ہو ، تو وہ شخص زانی شمار ہو گا “ ۔
یہ روایت امام بزار نے محمد بن حصین جزری کے حوالے سے نقل کی ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔

میمون کر دی ، اپنے والد کا یہ بیان نقل کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص تھوڑے ، یا زیادہ مہر کے عوض میں ، عورت کے ساتھ شادی کرتا ہے ، اور اس کے دل میں نہ ہو کہ وہ اس عورت کو اس کا حق ادا کرے گا ، وہ اس عورت کو دھوکہ دیتا ہے ، اور پھر اسی حالت میں مر جاتا ہے ، اور اس نے اس عورت کو اس کا حق ادا نہیں کیا ہوتا ، تو قیامت کے دن ، جب وہ اللہ تعالیٰ کی بارگاہ میں حاضر ہو گا ، تو وہ ( شخص ) زانی شمار ہو گا “ ۔
یہ روایت امام طبرانی نے معجم صغیر اور معجم اوسط میں نقل کی ہے اور اس کے رجال ثقہ ہیں ۔ اس نوعیت کی چند احادیث ” خرید و فروخت “ سے متعلق باب میں ” قرض “ سے متعلق باب میں گزر چکی ہیں ۔