مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” بیوہ عورتوں کا نکاح کروا دو ! یہ بات آپ نے تین مرتبہ ارشاد فرمائی ، اس چیز پر ، جس پر اس کے اہل خانہ راضی ہوتے ہیں خواہ وہ مٹھی بھر پیلو ہی کیوں نہ ہوں “ ۔
یہ روایت امام طبرانی نے نقل کی ہے ، اس کی سند میں ایک راوی محمد بن عبدالرحمن بیلمانی ہے اور وہ ضعیف ہے ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” انہیں معاوضہ ( یعنی مہر ) دو ! خواہ وہ ایک لاٹھی ہی کیوں نہ ہو “ ۔ راوی کہتے ہیں : یعنی شادی میں ایسا کرو ۔
یہ روایت امام طبرانی نے نقل کی ہے ، اس کی سند میں ایسے راوی ہیں ، جن سے میں واقف نہیں ہوں ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک شخص کی شادی ایک خاتون کے ساتھ لوہے کی انگوٹھی کے عوض میں کروا دی ، جس میں چاندی لگی ہوئی تھی ۔
یہ روایت امام طبرانی نے نقل کی ہے ، اس کی سند میں ایک راوی عبداللہ بن مصعب زبیری ہے اور وہ ضعیف ہے ۔

حسین بن عبداللہ بن ضمیرہ ، اپنے والد کے حوالے سے اپنے دادا کا یہ بیان نقل کرتے ہیں : ” ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! آپ میری شادی فلاں خاتون کے ساتھ کروا دیں ، نبی اکرم صلی اللہ علیہ وسلم نے فرمایا : تمہارے پاس اُسے مہر کے طور پر دینے کے لئے کیا ہے ؟ اس نے عرض کی : میرے پاس کوئی چیز نہیں ہے ، نبی اکرم صلی اللہ علیہ وسلم نے فرمایا : یہ انگوٹھی کس کی ہے ؟ اس نے عرض کی : یہ میری ہے ، نبی اکرم صلی اللہ علیہ وسلم نے فرمایا : تم یہ اُسے دے دو ! آپ نے اس خاتون کے ساتھ اس شخص کی شادی کروا دی ، اسی طرح ایک اور شخص ، جس کے پاس کچھ بھی نہیں تھا ، آپ نے سورۃ بقرہ ( کی تعلیم ) کی شرط پر اُس کی شادی کروا دی تھی “ ۔
یہ روایت امام طبرانی نے نقل کی ہے اور حسین نامی راوی متروک ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ان ( خواتین ) میں سب سے بہتر وہ ہیں ، جن کا مہر ( ادا کرنا ) سب سے زیادہ آسان ہو “ ۔
یہ روایت امام طبرانی نے دو اسناد کے ساتھ نقل کی ہے ، جن میں سے ایک راوی جابر جعفی ہے اور وہ ضعیف ہے ، شعبہ اور ثوری نے اسے ثقہ قرار دیا ہے ، دوسری میں رجاء بن حارث ہے ، جسے یحیی بن معین اور دیگر حضرات نے ضعیف قرار دیا ہے ، ان دونوں کے بقیہ رجال ثقہ ہیں ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا ہے ۔ ” سب سے کم مہر والی خواتین ، سب سے زیادہ برکت والی ہوتی ہیں “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی حارث بن شبل ہے اور وہ ضعیف ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” عورت کی برکت میں ، یہ بات شامل ہے کہ اُسے نکاح کا پیغام دینا آسان ہو ، اس کا مہر دینا آسان ہو ، اور اس کا رحم آسان ہو ( یعنی وہ بچہ پیدا کرنے کی صلاحیت رکھتی ہو ) “ ۔
یہ روایت امام أحمد نے نقل کی ہے ، امام طبرانی نے معجم صغیر اور معجم اوسط میں نقل کی ہے ، انہوں نے ان دونوں روایات میں یہ بات نقل کی ہے : عروہ کے حوالے سے منقول ہے ، عروہ کہتے ہیں : میں یہ کہتا ہوں : عورت کی سب سے پہلی نحوست یہ ہے کہ اس کا مہر زیادہ ہو ۔ اس روایت کی سند میں ایک راوی اسامہ بن زید بن اسلم ہے اور وہ ضعیف ہے ، ویسے اس کی توثیق کی گئی ہے ، امام أحمد کے بقیہ رجال ثقہ ہیں ۔

یحیی بن عبدالرحمن بن ابولبیبہ ، اپنے والد کے حوالے سے ، اپنے دادا کا یہ بیان نقل کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص نکاح میں ، ایک درہم کے عوض میں حلال کروا لے ( یعنی ایک درہم مہر کے طور پر ادا کرے ) تو اس نے حلال کروا لیا “ ۔
یہ روایت امام ابویعلیٰ نے نقل کی ہے اس کی سند میں ایک راوی یحیی بن عبدالرحمن بن ابولبیبہ ہے اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے اپنے اصحاب کے درمیان صدقہ کی بکریاں تقسیم کیں ، ایک بکری دو آدمیوں کے حصے میں آئی ، تو ان دونوں میں سے ایک نے کہا: تم اپنا حصہ میرے لئے چھوڑ دو ! میں اس کے عوض میں شادی کر لوں گا ۔
یہ روایت امام ابویعلیٰ نے نقل کی ہے ، اس کی سند میں ایک راوی حرب بن میمون عبدی ہے اور وہ ضعیف ہے ، امام ابوحاتم نے اسے ثقہ قرار دیا ہے ، اس کے بقیہ رجال ثقہ ہیں ۔

سیدنا انس رضی اللہ عنہ بیان کرتے ہیں : سیدنا عبدالرحمن بن عوف رضی اللہ عنہ نے نبی اکرم صلی اللہ علیہ وسلم کے زمانہ اقدس میں ایک خاتون کے ساتھ سونے کی ایک گٹھلی کے وزن جتنے سونے کے عوض میں شادی کی ، اُس سونے کی قیمت تین درہم اور ایک تہائی درہم تھی ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے : تاہم اس میں گٹھلی کی قیمت کا ذکر نہیں ہے ۔
یہ روایت امام بزار نے نقل کی ہے ، اس کی سند میں ایک راوی حجاج بن ارطاۃ ہے اور وہ تدلیس کرنے والا ہے ۔

سیدنا ابوہریرہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا اور بولا: میں نے انصار سے تعلق رکھنے والی ایک عورت کے ساتھ شادی کر لی ہے ، نبی اکرم صلی اللہ علیہ وسلم نے دریافت کیا : تم نے اسے دیکھا ہے ؟ کیونکہ انصار کی آنکھوں میں کچھ ہوتا ہے اس نے عرض کی : جی ہاں ! نبی اکرم صلی اللہ علیہ وسلم نے دریافت کیا : کتنے مہر کے عوض میں کی ہے ؟ اس نے جواب دیا : چار اوقیہ کے عوض میں ، نبی اکرم صلی اللہ علیہ وسلم نے فرمایا : چار اوقیہ کے عوض میں ؟ یہ تو یوں ہے ، جیسے تم اس پہاڑ سے چاندی چھیل کر اتارتے ہو ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت کا ابتدائی حصہ منقول ہے ۔
یہ روایت امام بزار نے أحمد بن ابان کے حوالے سے نقل کی ہے ، میں اُس سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا ابوحدرد اسلمی رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، تاکہ عورت کو مہر ادا کرنے کے سلسلے میں آپ سے مدد حاصل کریں ، نبی اکرم صلی اللہ علیہ وسلم نے دریافت کیا : تم نے اسے کتنا مہر دینا ہے ؟ انہوں نے عرض کی : دو سو درہم ، نبی اکرم صلی اللہ علیہ وسلم نے فرمایا : اگر تم بطحان بھر کر بھی دو ، تو تم زیادہ نہیں دو گے ۔
یہ روایت امام أحمد نے نقل کی ہے اور امام طبرانی نے معجم اوسط میں نقل کی ہے ، امام أحمد کے رجال صحیح کے رجال ہیں ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ ام سلمہ رضی اللہ عنہا کے ساتھ ایسے سامان ( کے مہر ہونے ) کے عوض میں ، شادی کی تھی ، جس کی قیمت دس درہم تھی ۔
یہ روایت امام ابویعلیٰ نے ، امام بزار نے اور امام طبرانی نے نقل کی ہے ، اس کی سند میں ایک راوی حکم بن عطیہ ہے اور وہ ضعیف ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدہ ام سلمہ رضی اللہ عنہا کے ساتھ گھر کے سامان ( کے مہر ہونے ) کی شرط پر شادی کی تھی ، جس کی قیمت دس درہم تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عمرو بن ازہر ہے اور وہ متروک ہے ۔

سیدہ عائشہ صدیقہ رضی اللہ عنہا بیان کرتی ہیں : نبی اکرم صلی اللہ علیہ وسلم نے میرے ساتھ ایسے سامان کے عوض میں شادی کی تھی ، جس کی قیمت چالیس درہم بنتی تھی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عطیہ عوفی ہے اس کی توثیق کی گئی ہے ۔

سیدنا سہل بن سعد رضی اللہ عنہ بیان کرتے ہیں : سیدنا سعد بن عبادہ رضی اللہ عنہ روزانہ رات کے وقت نبی اکرم صلی اللہ علیہ وسلم کی طرف ( کھانے کا ) ایک پیالہ بھجوایا کرتے تھے ، نبی اکرم صلی اللہ علیہ وسلم جب کسی خاتون کو شادی کا پیغام دیتے تھے ، تو یہ فرماتے تھے : تمہیں یہ ، یہ اور یہ ( چیزیں ) ملیں گی ، اور سعد کا پیالہ بھی ملے گا ، جو میرے ساتھ جاتا ہے ، جہاں بھی میں جاتا ہوں ۔
یہ روایت امام طبرانی نے نقل کی ہے ، اس کی سند میں ایک راوی عبدالمہیمن بن عباس بن سہل بن سعد ہے اور وہ ضعیف ہے ۔

سیدنا انس بن مالک رضی اللہ عنہ بیان کرتے ہیں : نجاشی نے ، نبی اکرم صلی اللہ علیہ وسلم کی شادی سیدہ ام حبیبہ رضی اللہ عنہا کے ساتھ کروائی تھی ، اور اپنے مال میں سے دو سو دینار ( مہر کے طور پر ) دیے تھے ۔
یہ روایت امام طبرانی نے معجم اوسط میں دو اسناد کے ساتھ نقل کی ہے ، جن میں سے ایک راوی اسماعیل بن علی انصاری ہے ، اس نے رواد بن جراح سے
یہ روایت نقل کی ہے ، رواد میں ضعف پایا جاتا ہے ، ایک جماعت نے اسے ضعیف قرار دیا ہے اور اسماعیل نامی راوی سے میں واقف نہیں ہوں ، اس روایت کے بقیہ رجال ثقہ ہیں ، اس روایت کی دوسری سند ضعیف ہے ۔

سیدہ صفیہ رضی اللہ عنہا بیان کرتی ہیں : نبی اکرم صلی اللہ علیہ وسلم نے مجھے آزاد کر دیا اور میری آزادی کو میرا مہر قرار دیا ۔
یہ روایت امام طبرانی نے معجم اوسط اور معجم کبیر میں نقل کی ہے ، اور اس کے رجال ثقہ ہیں ، انہوں نے معجم اوسط میں یہ بات نقل کی ہے : سیدہ صفیہ رضی اللہ عنہا کے حوالے سے
یہ روایت صرف اسی سند کے ساتھ منقول ہے ۔

امام شعبی بیان کرتے ہیں : سیدہ جویریہ رضی اللہ عنہا نبی اکرم صلی اللہ علیہ وسلم کی کنیز تھیں ، نبی اکرم صلی اللہ علیہ وسلم نے انہیں آزاد کر دیا ، اور ان کی آزادی کو اُن کا مہر قرار دیا ، اور نبی اکرم صلی اللہ علیہ وسلم نے بنو مصطلق کے ہر قیدی کو آزاد کر دیا ( یا بنو مصطلق کی آزادی کو ان کا مہر قرار دیا ) ۔
یہ روایت امام طبرانی نے ” مرسل “ روایت کے طور پر نقل کی ہے اور اس کے رجال صحیح کے رجال ہیں ۔

سیدنا علی رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو آپ کی صاحبزادی کے لئے شادی کا پیغام دینا چاہا ۔ تو میں نے سوچا کہ میرے پاس تو کوئی چیز نہیں ، پھر میں کیا کروں ؟ پھر مجھے نبی اکرم صلی اللہ علیہ وسلم کی صلہ رحمی اور آپ کی مہربانی یاد آئی ، تو میں نے آپ کو شادی کا پیغام دے دیا ، نبی اکرم صلی اللہ علیہ وسلم نے دریافت کیا : کیا تمہارے پاس کوئی چیز ہے ؟ میں نے عرض کی : جی نہیں ! نبی اکرم صلی اللہ علیہ وسلم نے دریافت کیا : تمہاری حطمی زرہ کہاں ہے ؟ جو میں نے تمہیں فلاں موقع پر دی تھی ، انہوں نے عرض کی : وہ میرے پاس ہے ، نبی اکرم صلی اللہ علیہ وسلم نے فرمایا : تم وہ اسے دے دو ! سیدنا علی رضی اللہ عنہ کہتے ہیں ، تو ( زرہ ) میں نے سیدہ فاطمہ رضی اللہ عنہا کو دے دی ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ، اس کے بقیہ رجال ” صحیح “ کے رجال ہیں ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے میری شادی اپنی صاحبزادی فاطمہ رضی اللہ عنہا کے ساتھ کر دی ، جو لوہے کی بنی ہوئی حطمی زرہ کے عوض میں تھی ، وہ نبی اکرم نے ہی مجھے دی تھی ، نبی اکرم صلی اللہ علیہ وسلم نے فرمایا : تم یہ اس کو بھجوا دو ! تاکہ وہ اس کے عوض میں زیور بنا لے تو وہ میں نے اُن کی طرف بھجوا دی ، اللہ کی قسم ! اس کی قیمت اتنی ، اتنی اور چار سو درہم تھی ۔
یہ روایت امام ابویعلیٰ نے نقل کی ہے مجاہد نامی راوی نے سیدنا علی رضی اللہ عنہ سے سماع نہیں کیا ہے اور اس روایت کے رجال ثقہ ہیں ۔

سیدنا علی رضی اللہ عنہ بیان کرتے ہیں : جب میں فاطمہ کے ساتھ شادی کرنے لگا ، تو میں نے عرض کی : یا رسول اللہ ! میں اپنی زرہ فروخت کر دوں ، یا اپنا گھوڑا فروخت کر دوں ؟ نبی اکرم صلی اللہ علیہ وسلم نے فرمایا : تم اپنی زرہ فروخت کر دو ! تو میں نے وہ بارہ اوقیہ کے عوض میں فروخت کر دی ، تو یہ فاطمہ کا مہر بنا ۔
یہ روایت امام ابویعلیٰ نے عباس بن جعفر بن زید بن طلق کے حوالے سے ، اُن کے والد کے حوالے سے ، ان کے دادا سے نقل کی ہے ، میں ان حضرات سے واقف نہیں ہوں ، اس روایت کے بقیہ رجال صحیح کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : جب نبی اکرم صلی اللہ علیہ وسلم نے سیدنا علی رضی اللہ عنہ کی شادی سیدہ فاطمہ رضی اللہ عنہا سے کروائی ، تو آپ نے فرمایا : اے علی ! تم اپنی بیوی کے پاس اُس وقت تک نہ جانا ، جب تک اسے پہلے کوئی چیز نہیں دیتے ، سیدنا علی رضی اللہ عنہ نے عرض کی : یا رسول اللہ ! میرے پاس کوئی چیز نہیں ہے ، نبی اکرم صلی اللہ علیہ وسلم نے فرمایا : تم اپنی حطمی زرہ اُسے دے دینا ۔ ابن ابورواد بیان کرتے ہیں : اس زرہ کی قیمت چار سو اسی درہم طے ہوئی تھی ۔
یہ روایت امام طبرانی نے معجم اوسط اور معجم کبیر میں اختصار کے ساتھ نقل کی ہے ، اس کی سند میں ایک راوی سعید بن زنبور ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ثقہ ہیں ۔

سیدنا عبداللہ بن عباس رضی اللہ عنہا بیان کرتے ہیں : سیدنا علی رضی اللہ عنہ نے لوہے کی زرہ کے عوض میں سیدہ فاطمہ رضی اللہ عنہا کے ساتھ شادی کی تھی ۔
یہ روایت امام بزار نے اور امام طبرانی نے نقل کی ہے ، امام طبرانی کے رجال صحیح کے رجال ہیں ۔

سیدنا زید بن ثابت رضی اللہ عنہ بیان کرتے ہیں : سیدنا علی رضی اللہ عنہ نے سیدہ فاطمہ رضی اللہ عنہا کی رخصتی کروا لی تھی ، اس سے پہلے کہ وہ انہیں کوئی چیز دیں ۔
یہ روایت امام طبرانی نے نقل کی ہے ، اس کی سند میں ایک راوی حجاج بن ارطاۃ ہے اور وہ تدلیس کرنے والا ہے ، اس روایت کے بقیہ رجال ثقہ ہیں ۔

مغیرہ بن شبل بیان کرتے ہیں : عمر بن حریث نے سیدنا عدی بن حاتم رضی اللہ عنہ کو ان کی صاحبزادی کے لئے شادی کا پیغام دیا ، تو انہوں نے کہا: میں تمہاری شادی صرف اپنے فیصلے کی بنیاد پر کروں گا ، تو انہوں نے کہا: آپ کو فیصلے کا اختیار ہے ، تو سیدنا عدی بن حاتم رضی اللہ عنہ نے کہا: میں ، نبی اکرم صلی اللہ علیہ وسلم کی صاحبزادیوں سے زیادہ بہتر نہیں ہوں ، تو انہوں نے اُن صاحب کی شادی ” فریضہ “ کے عوض میں کروا دی ۔
یہ روایت امام طبرانی نے نقل کی ہے ، اس کی سند میں ایک راوی قیس بن ربیع ہے ، جسے شعبہ اور ثوری نے ثقہ قرار دیا ہے اور دیگر حضرات نے اسے ضعیف کہا: ہے ، اس روایت کے بقیہ رجال ثقہ ہیں ۔

مسروق بیان کرتے ہیں : سیدنا عمر بن خطاب رضی اللہ عنہ نبی اکرم صلی اللہ علیہ وسلم کے منبر پر چڑھے ، پھر انہوں نے فرمایا : اے لوگو ! تم لوگوں نے عورتوں کے مہر کتنے زیادہ کر دیے ہیں ؟ حالانکہ نبی اکرم صلی اللہ علیہ وسلم اور آپ کے اصحاب کا معاملہ بھی تھا ، اُن حضرات کے مہر چار سو درہم یا اس سے کم ہوا کرتے تھے ، اگر مہر کا زیادہ ہونا ، اللہ تعالیٰ کی بارگاہ میں تقویٰ کی نشانی ہوتی ، یا عزت افزائی کی نشانی ہوتی ، تو تم ان حضرات سے سبقت نہ لے جاتے ، اس لئے اب میں کسی ایسے شخص کو نہ پاؤں ، جس نے چار سو سے زیادہ مہر دیا ہو ، راوی کہتے ہیں : پھر وہ منبر سے نیچے اتر گئے ، قریش سے تعلق رکھنے والی ایک خاتون ان کے سامنے آئیں اور بولیں : اے امیرالمؤمنین ! آپ نے لوگوں کو اس بات سے منع کر دیا ہے ، کہ وہ چار سو درہم سے زیادہ مہر دیں ، سیدنا عمر رضی اللہ عنہ نے فرمایا : جی ہاں ! اس خاتون نے کہا: کیا آپ نے وہ بات نہیں سنی ہے ، جو اللہ تعالیٰ نے قرآن میں نازل کی ہے ؟ سیدنا عمر رضی اللہ عنہ نے دریافت کیا : کون سی بات ؟ اس نے کہا: کیا آپ نے اللہ تعالیٰ کو یہ ارشاد فرماتے ہوئے نہیں سنا ہے : ” اگر تم اُن میں سے کسی ایک کو ڈھیر دے دو ، تو اس میں سے کچھ بھی نہ لو ، کیا تم بہتان اور واضح گناہ کے طور پر اُسے لو گے “ ۔ تو سیدنا عمر رضی اللہ عنہ نے کہا: اے اللہ ! تجھ سے مغفرت کا سوال ہے ، ہر شخص عمر سے زیادہ سمجھ بوجھ رکھتا ہے ، پھر سیدنا عمر رضی اللہ عنہ واپس آئے دوبارہ منبر پر چڑھے اور بولے : میں نے تمہیں اس بات سے منع کیا تھا کہ عورتوں کو چار سو درہم سے زیادہ مہر نہیں دینا ہے ، اب تم میں سے جو شخص جتنا پسند کرے ، اتنا مہر دیدے ۔ ابویعلی کہتے ہیں : میرا خیال ہے : روایت میں یہ الفاظ بھی ہیں : آدمی کو جس سے تسلی ہو ، وہ ویسا ہی کر لے ۔
یہ روایت امام ابویعلیٰ نے کبیر میں نقل کی ہے ، اس کی سند میں ایک راوی مجالد بن سعید ہے اور اس میں ضعف پایا جاتا ہے ، ویسے اس کی توثیق کی گئی ہے ۔

ابن سیرین بیان کرتے ہیں : سیدنا امام حسن بن علی رضی اللہ عنہما نے ایک خاتون کے ساتھ شادی کی ، راوی کہتے ہیں : تو انہوں نے اس خاتون کی طرف ایک سو کنیزیں بھجوائیں ، جن میں سے ہر ایک کنیز کے پاس ایک ہزار درہم تھے ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ۔

سیدہ عائشہ صدیقہ رضی اللہ عنہا اور مکحول روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عورت کی شرمگاہ کو جس مہر ، یا جس وعدے کے عوض میں حلال قرار دیا گیا ہو ، وہ چیز اس عورت کی ملکیت ہو گی ، اور جس چیز کے ذریعے عورت کے باپ ، یا بھائی کی عزت افزائی کی گئی ہو ، یا اس کے ولی کی عزت افزائی کی گئی ہو ، جو نکاح کا عقد ہو جانے کے بعد ہو ، تو وہ چیز اس شخص کی ملکیت ہو گی ، اور آدمی اس چیز کا سب سے زیادہ حق دار ہوتا ہے ، جس کے ذریعے اس شخص کی ، اُس کی بیٹی یا بہن کے حوالے سے عزت افزائی کی گئی ہو ، ( یعنی داماد کی طرف سے ، جو چیز اُسے تحفے کے طور پر دی گئی ہو ) “ ۔
یہ روایت امام أحمد نے نقل کی ہے اور اس کی سند منقطع ہے ، اس کی سند میں ایک راوی حجاج بن ارطاۃ ہے اور وہ تدلیس کرنے والا ہے ۔