مجمع الزوائد ومنبع الفوائد

سیدنا عمار بن یاسر رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص اپنے غلام کو ظلم کے طور پر مارتا ہے ، قیامت کے دن اسے اس سے بدلہ دلوایا جائے گا “ ۔
یہ روایت امام طبرانی نے نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” غلاموں کو مارو نہیں ! کیونکہ تم نہیں جانتے کہ کیا موافق ہوتا ہے “ ۔
یہ روایت امام ابویعلیٰ اور امام طبرانی نے نقل کی ہے ، اس کی سند میں ایک راوی عکرمہ بن خالد بن سلمہ ہے اور وہ ضعیف ہے ۔

سیدنا کعب بن مالک رضی اللہ عنہ بیان کرتے ہیں : ایک کنیز میری بکریاں چرا رہی تھی ، بھیڑیے نے ایک بکری کو کھا لیا ، میں نے کنیز کے چہرے پر تھپڑ مار دیا ، پھر مجھے ندامت ہوئی ، میں نبی اکرم صلی اللہ علیہ وسلم کی خدمت میں حاضر ہوا ، اور میں نے عرض کی : اگر مجھے یہ پتہ چل جائے کہ یہ مومن عورت ہے ، تو میں اسے آزاد کر دوں گا ، نبی اکرم صلی اللہ علیہ وسلم نے کنیز سے دریافت کیا : میں کون ہوں ؟ اس نے عرض کی : آپ اللہ کے رسول ہیں ، آپ نے دریافت کیا : اللہ تعالیٰ کون ہے ؟ اس نے عرض کی : وہ جو آسمان میں ہے ، نبی اکرم صلی اللہ علیہ وسلم نے فرمایا : تم سے آزاد کر دو ! یہ مومن ہے ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی عبداللہ بن شبیب ہے اور وہ ضعیف ہے ۔

سیدنا عبداللہ بن عمرو رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص غلام کا مثلہ کرے ، یا اُسے آگ میں جلا دے ، تو وہ غلام آزاد شمار ہو گا ، اور وہ اللہ اور اس کے رسول کی طرف سے آزاد کردہ شمار ہو گا “ ۔ راوی بیان کرتے ہیں : شاید اسے خصی کر دیا گیا تھا ، اس کا نام ” سندر “ تھا ، نبی اکرم صلی اللہ علیہ وسلم نے اسے آزاد کر دیا پھر نبی اکرم صلی اللہ علیہ وسلم کے وصال کے بعد وہ سیدنا ابوبکر رضی اللہ عنہ کے پاس آیا ، تو سیدنا ابوبکر رضی اللہ عنہ نے اس کے ساتھ اچھائی کی ، سیدنا ابوبکر رضی اللہ عنہ کے بعد وہ سیدنا عمر رضی اللہ عنہ کے پاس آیا ، تو سیدنا عمر رضی اللہ عنہ نے اس کے ساتھ اچھائی کی ، پھر اس نے مصر کی طرف جانے کا ارادہ کیا ، تو سیدنا عمر رضی اللہ عنہ نے سیدنا عمرو بن العاص رضی اللہ عنہ کو خط لکھا کہ اس کے ساتھ اچھائی کرنا اور اس کے بارے میں نبی اکرم صلی اللہ علیہ وسلم کی تلقین کی حفاظت کرنا ۔
یہ روایت امام أحمد اور امام طبرانی نے نقل کی ہے ، اور اس کے رجال ثقہ ہیں ، اس کی سند میں ایک راوی حجاج بن ارطاۃ ہے اور وہ تدلیس کرنے والا ہے ، لیکن وہ ثقہ ہے ۔

سیدنا سندر رضی اللہ عنہ بیان کرتے ہیں : وہ زنباع بن سلامہ کے غلام تھے ، اس نے ان پر ناراضگی کا اظہار کرتے ہوئے انہیں خصی کر دیا اور ان کا ناک اور کان کاٹ دیے ، وہ نبی اکرم صلی اللہ علیہ وسلم کی خدمت میں حاضر ہوئے ، اور آپ کو اس بارے میں بتایا تو نبی اکرم صلی اللہ علیہ وسلم نے زنباع پر سخت ناراضگی کا اظہار کیا اور انہیں اس کی طرف سے آزاد کر دیا ، سندر نے عرض کی : آپ میرے بارے میں تلقین کر دیجئے ! نبی اکرم صلی اللہ علیہ وسلم نے فرمایا : میں ہر مسلمان کو تمہارے بارے میں تلقین کرتا ہوں ۔
یہ روایت امام بزار اور امام طبرانی نے نقل کی ہے ، اس کی سند میں ایک راوی عبداللہ بن سندر ہے اور میں اس سے واقف نہیں ہوں ، اس روایت کے بقیہ رجال ثقہ ہیں ۔