مجمع الزوائد ومنبع الفوائد

سیدنا معاذ بن جبل رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جب تم میں سے کوئی ایک شخص کوئی کنیز خریدے ، تو اسے سب سے پہلے میٹھی چیز کھلائے ، کیونکہ یہ اس کے لئے زیادہ پاکیزہ ہو گی “ ۔
یہ روایت امام طبرانی نے معجم اوسط میں نقل کی ہے اور اس کی سند کا کم از کم درجہ حسن ہے ۔

سیدنا یزید بن جاریہ رضی اللہ عنہ بیان کرتے ہیں : حجتہ الوداع کے موقع پر نبی اکرم صلی اللہ علیہ وسلم نے ارشاد فرمایا : ” اپنے زیر ملکیت لوگوں کا خیال رکھنا ، اپنے زیر ملکیت لوگوں کا خیال رکھنا ، اپنے زیر ملکیت لوگوں کا خیال رکھنا ، تم انہیں اس چیز میں سے کھلانا جو تم کھاتے ہو اور اس میں سے پہنانا ، جو تم پہنتے ہو ، اگر وہ کسی گناہ کا ارتکاب کریں ، جسے تم معاف نہ کر سکتے ہو ، تو اللہ کے بندوں کو فروخت کر دینا ، انہیں عذاب نہ دینا “ ۔
یہ روایت امام أحمد اور امام طبرانی نے نقل کی ہے ، اس کی سند میں ایک راوی عاصم بن عبیداللہ ہے اور وہ ضعیف ہے ۔

سیدنا ابوبکر صدیق رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایسا شخص جنت میں داخل نہیں ہو گا ، جو غلاموں کے ساتھ اچھا سلوک نہ کرتا ہو ، ایک صاحب نے عرض کی : یا رسول اللہ ! آپ نے ہمیں یہ بات نہیں بتائی ہے کہ اس امت میں سب امتوں سے زیادہ غلام اور یتیم ہوں گے ؟ نبی اکرم صلی اللہ علیہ وسلم نے فرمایا : جی ہاں ! تم ان کی اس طرح عزت افزائی کرنا ، جس طرح اپنی اولاد کی کرتے ہو ، اور انہیں اس چیز میں سے کھلانا جو تم کھاتے ہو ، انہوں نے عرض کی : یا رسول اللہ ! دنیا میں سے ہمارے لئے کیا چیز فائدہ مند ہے ؟ نبی اکرم صلی اللہ علیہ وسلم نے فرمایا : وہ گھوڑا جسے تم باندھ کے رکھو ، اس پر سوار ہو کر اللہ کی راہ میں جنگ میں حصہ لو ، اور وہ غلام جو تمہارے کام کاج کر دے ، جب وہ نماز ادا کرے ، تو پھر وہ تمہارا بھائی ہو گا ، جب وہ نماز ادا کرے ، تو پھر وہ تمہارا بھائی ہو گا “ ۔ ( علامہ ہیثمی فرماتے ہیں : ) میں یہ کہتا ہوں : امام ترمذی اور دیگر حضرات نے اس روایت کا ایک حصہ نقل کیا ہے ۔
یہ روایت امام أحمد اور امام ابویعلیٰ نے نقل کی ہے ، اس کی سند میں ایک راوی فرقد سبخی ہے اور وہ ضعیف ہے ۔

نبی اکرم صلی اللہ علیہ وسلم کے ایک صحابی بیان کرتے ہیں : نبی اکرم صلی اللہ علیہ وسلم نے ارشاد فرمایا : ” ( یہ غلام ) تمہارے بھائی ہیں ، تم ان کے ساتھ اچھا سلوک کرو ، اور جو کام یہ کر سکتے ہوں ، اس کے حوالے سے اُن سے مدد طلب کرو ، اور جو چیز ان پر غالب آ رہی ہو ، اس کے بارے میں ان کی مدد کرو “ ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے غلاموں کے بارے میں فرمایا : ” اگر وہ اچھائی کریں ، تو تم اس کو قبول کرو ، اور اگر وہ برائی کریں ، تو تم درگزر کرو ، اور اگر وہ تمہارے ق ابومیں نہیں آتے ، تو تم انہیں فروخت کر دو “ ۔
یہ روایت امام بزار نے نقل کی ہے ، اور اس کی سند میں ایک راوی عبیداللہ ہے اور وہ ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” غلام کے اپنے آقا پر تین حق ہیں ، یہ کہ اس کی نماز کے حوالے سے اس سے جلدی نہ کروائے ، اور اسے اس کے کھانے سے نہ اٹھائے ، اور اسے اچھی طرح سے سیر کروائے “ ۔
یہ روایت امام طبرانی نے معجم کبیر میں نقل کی ہے اور اس کی سند ضعیف ہے ۔

سیدنا کعب بن مالک رضی اللہ عنہ نے یہ بات بیان کی ہے : نبی اکرم صلی اللہ علیہ وسلم کے وصال سے پانچ دن پہلے ، آپ سے میری آخری ملاقات ہوئی تھی ، میں نے آپ کو یہ ارشاد فرماتے ہوئے سنا : ” ہر نبی کا اُس کی امت میں سے کوئی نہ کوئی خلیل ہوتا ہے ، اور میرا خلیل ’ ابوبکر بن ابوقحافہ ہے ، لیکن اللہ تعالیٰ نے تمہارے آقا کو خلیل بنا لیا ہے ، خبردار ! تم سے پہلے کی امتوں نے اپنے انبیاء کی قبروں کو سجدہ گاہ بنا لیا تھا ، میں تمہیں اس سے منع کرتا ہوں ، اے اللہ ! کیا میں نے تبلیغ کر دی ہے ؟ یہ بات آپ نے تین مرتبہ ارشاد فرمائی ، پھر آپ نے فرمایا : اے اللہ ! تو گواہ ہو جا ! یہ بات آپ نے تین مرتبہ ارشاد فرمائی ، پھر تھوڑی دیر کے لئے آپ پر بے ہوشی طاری ہوئی ، پھر آپ نے فرمایا : اپنے زیر ملکیت لوگوں کے بارے میں اللہ سے ڈرتے رہنا ، اللہ سے ڈرتے رہنا ، تم ان کے پیٹوں کو سیر رکھنا اور ان کی جسموں کو ڈھانپ کے رکھنا اور ان کے ساتھ نرمی سے بات کرنا “ ۔
یہ روایت امام طبرانی نے نقل کی ہے اور اس کی سند میں ایک راوی عبداللہ بن زحر ہے اور علی بن یزید ہے ، یہ دونوں ضعیف ہیں ویسے ان دونوں کی توثیق کی گئی ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم کی وصیت زیادہ تر یہ تھی : ” نماز اور اپنے زیر ملکیت لوگوں کا خیال رکھنا “ ۔ یہاں تک کہ نبی اکرم صلی اللہ علیہ وسلم پر نزع کا عالم طاری ہو گیا اور آپ کی زبان نے کلام کرنا چھوڑ دیا ۔
یہ روایت امام طبرانی نے نقل کی ہے اس کی سند میں ایک راوی عبیداللہ بن ولید وصافی ہے اور وہ متروک ہے ۔

سیدنا حذیفہ رضی اللہ عنہ بیان کرتے ہیں : ایک شخص نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میں نے ایک غلام خریدا ہے ، میں اس کے ساتھ کیا کروں ؟ نبی اکرم صلی اللہ علیہ وسلم نے ارشاد فرمایا : وہ اسلام میں تمہارا بھائی ہے ، اور تم اسے اس چیز میں سے کھلاؤ ، جو تم کھاتے ہو اور اس چیز میں سے پہناؤ ، جو تم پہنتے ہو اور اگر تم اسے ناپسند کرو ، تو اسے فروخت کر دینا “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی سعید بن محمد وراق ہے اور وہ متروک ہے ۔

سیدنا عبدالرحمن بن عوف رضی اللہ عنہ بیان کرتے ہیں : سیدنا طلحہ رضی اللہ عنہ نے عامر بن فہیرہ کو ( کوئی سخت بات ) کہی ، تو نبی اکرم صلی اللہ علیہ وسلم نے ان سے فرمایا : اسے طلحہ ! رک جاؤ ! یہ بدر میں شریک ہوا ہے ، جس طرح تم اس میں شریک ہوئے ہو اور تم میں سب سے بہتر لوگ وہ ہیں جو اپنے غلاموں کے حق میں زیادہ بہتر ہوں ۔
یہ روایت امام طبرانی نے تینوں کتابوں میں نقل کی ہے ، اس کی سند میں ایک راوی مصعب بن مصعب ہے اور وہ ضعیف ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم خیبر تشریف لائے ، آپ کے ساتھ دو غلام تھے ، سیدنا علی رضی اللہ عنہ نے عرض کی : یا رسول اللہ ! ہمیں ایک خدمت گار دے دیں ، نبی اکرم صلی اللہ علیہ وسلم نے فرمایا : تم ان دونوں میں سے جسے چاہو حاصل کر لو ، انہوں نے عرض کی : آپ میرے لئے کوئی منتخب کر دیں ، نبی اکرم صلی اللہ علیہ وسلم نے فرمایا : تم یہ لے لو ! تم نے اسے مارنا نہیں ہے ، کیونکہ میں نے اسے خیبر سے واپسی پر نماز ادا کرتے ہوئے دیکھا ہے اور مجھے نمازیوں کو مارنے سے منع کیا گیا ہے ۔ پھر نبی اکرم صلی اللہ علیہ وسلم نے ایک غلام سیدنا ابوذر غفاری رضی اللہ عنہ کو دے دیا اور فرمایا : اس کے بارے میں بھلائی کی تلقین کو قبول کرو تو سیدنا ابوذر غفاری رضی اللہ عنہ نے اُسے آزاد کر دیا ، نبی اکرم صلی اللہ علیہ وسلم نے اُن سے دریافت کیا : غلام کا کیا حال ہے ؟ انہوں نے عرض کی : یا رسول اللہ ! آپ نے مجھے حکم دیا تھا کہ میں اس کے بارے میں بھلائی کی تلقین کو قبول کروں ، تو میں نے اسے آزاد کر دیا ۔
یہ روایت امام أحمد نے اور امام طبرانی نے نقل کی ہے ۔

ایک روایت میں ۔ انہوں نے یہ الفاظ نقل کیے ہیں : سیدنا علی رضی اللہ عنہ نے نبی اکرم صلی اللہ علیہ وسلم کی خدمت میں عرض کی : آپ ایک خادم مجھے دے دیں ، نبی اکرم صلی اللہ علیہ وسلم نے فرمایا : گھر میں تین ہیں ، تم ان میں سے کسی ایک کو اختیار کر لو ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے اختصار کے ساتھ حدیث نقل کی ہے ۔

ایک روایت میں ۔ انہوں نے یہ الفاظ نقل کیے ہیں : نبی اکرم صلی اللہ علیہ وسلم نے سیدنا ابوذر غفاری رضی اللہ عنہ کو ایک نوجوان دیا اور فرمایا : اسے اُس چیز میں سے کھلانا جس کو تم کھاتے ہو ، اور اس میں سے پہنانا جو تم پہنتے ہو ، سیدنا ابوذر غفاری کا ایک کپڑا تھا ، انہوں نے اسے چیرا اور اس کے نصف حصے کا تہبند بنا لیا اور نصف حصہ اس غلام کو دے دیا ، تو نبی اکرم صلی اللہ علیہ وسلم نے ارشاد فرمایا : کیا وجہ ہے ؟ میں تمہارے کپڑے کو اس طرح دیکھ رہا ہوں ؟ انہوں نے عرض کی : یا رسول اللہ ! آپ نے ارشاد فرمایا تھا کہ اسے اُس چیز میں سے کھلانا ، جو تم کھاتے ہو اور اسے اُس چیز میں سے پہنانا ، جو تم پہنتے ہو ، نبی اکرم صلی اللہ علیہ وسلم نے فرمایا : جی ہاں ! تو میں نے عرض کی : میں نے اس کو آزاد کر دیا ہے ، نبی اکرم صلی اللہ علیہ وسلم نے فرمایا : اے ابوذر ! اللہ تعالیٰ تمہیں اجر دے گا ۔ اس روایت کا مدار ابوغالب پر ہے اور وہ ثقہ ہے ویسے اسے ضعیف قرار دیا گیا ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا علی رضی اللہ عنہ اور سیدہ فاطمہ رضی اللہ عنہا کو ایک غلام دیا اور فرمایا : اس کے ساتھ اچھا سلوک کرنا ، کیونکہ میں نے اسے نماز ادا کرتے ہوئے دیکھا ہے ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔

سیدنا عبداللہ بن عمر رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” انہیں اُس چیز میں سے کھلاؤ ، جو تم کھاتے ہو اور انہیں اس چیز میں سے پہناؤ ، جو تم پہنتے ہو“ ۔
یہ روایت امام بزار نے نقل کی ہے ، اس کی سند میں ایک راوی کوثر بن حکیم ہے اور وہ ضعیف ہے -

سیدنا عبدالله بن مسعود رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم میں سے کسی ایک کے پاس اس کا خادم کھانا لے کر آئے ، تو اسے اپنے خادم کو قریب کر کے اپنے ساتھ ( دستر خوان پر ) بٹھانا چاہیے اور اسے لقمہ دینا چاہیے ، کیونکہ اس نے اس ( کو پکانے کی ) کی تپش اور دھویں کو برداشت کیا ہے “ ۔
یہ روایت امام أحمد نے نقل کی ہے ، اس کی سند میں ایک راوی ابراہیم ہجری ہے اور وہ ضعیف ہے ۔

ابوزبیر بیان کرتے ہیں : انہوں نے سیدنا جابر رضی اللہ عنہ سے آدمی کے خادم کے بارے میں دریافت کیا کہ جب وہ اس کی جگہ مشقت اور گرمی کی کفایت کرتا ہے ، تو سیدنا جابر رضی اللہ عنہ نے یہ فرمایا : نبی اکرم صلی اللہ علیہ وسلم نے ہمیں یہ حکم دیا تھا کہ ہم انہیں بلائیں ( اور اپنے ساتھ کھانا کھلائیں ) اور اگر ہم میں سے کوئی شخص اس بات کو ناپسند کرتا ہو کہ وہ اُس کے ساتھ کھانا کھائے ، تو اسے اس ( خادم ) کے ہاتھ میں کھانا دے دینا چاہیے ۔
یہ روایت امام أحمد نے نقل کی ہے اور امام طبرانی نے معجم صغیر میں اس کی مانند نقل کی ہے اور اس کی سند حسن ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آدمی کے لئے یہ مناسب نہیں ہے کہ غلام نے اُس کے کھانے کی تپش اور ٹھنڈک کو برداشت کیا ہو ، پھر جب کھانا آئے ، تو وہ اس غلام کو اس سے الگ کر دے “ ۔
یہ روایت امام ابویعلیٰ نے نقل کی ہے ، اس کی سند میں ایک راوی حسین بن قیس ہے اور وہ متروک ہے ، ابن محصن نے اسے ثقہ قرار دیا ہے ۔

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جب تم میں سے کسی ایک کے غلام نے کھانا تیار کیا ہو ، اور اس کی تپش کو برداشت کیا ہو اور وہ تیار کر کے اس کے سامنے رکھا ہو ، تو آدمی کو اس غلام کو بلا کر اسے اپنے ساتھ کھلانا چاہیے ، اور اگر وہ ایسا نہیں کرتا ، تو پھر اس نے جو کھانا تیار کیا ہے ، اس میں سے کچھ اس کے ہاتھ میں رکھ دینا چاہیے “ ۔
یہ روایت امام طبرانی نے نقل کی ہے اور اس کی سند منقطع ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کوئی بھی صدقہ ، اس صدقہ سے زیادہ فضیلت نہیں رکھتا ، جو کسی ایسے غلام کو دیا جائے ، جو کسی برے مالک کے پاس ہو“ ۔
یہ روایت امام طبرانی نے معجم اوسط میں نقل کی ہے ۔

سیدنا عبداللہ بن عمر رضی اللہ عنہما بیان کرتے ہیں : ایک شخص نبی اکرم صلی اللہ علیہ وسلم کے پاس آیا اور اس نے عرض کی : یا رسول اللہ ! میرا خادم برائی کرتا ہے اور زیادتی کرتا ہے ، تو کیا میں اس کی پٹائی کر دوں ؟ نبی اکرم صلی اللہ علیہ وسلم نے فرمایا : تم روزانہ ستر مرتبہ اس سے درگزر کیا کرو ۔ ( علامہ ہیثمی فرماتے ہیں : میں یہ کہتا ہوں :
یہ روایت امام ترمذی نے اختصار کے ساتھ نقل کی ہے ۔
یہ روایت امام ابویعلیٰ نے نقل کی ہے اور اس کے رجال ثقہ ہیں ۔