مجمع الزوائد ومنبع الفوائد

حسان بن بلال بیان کرتے ہیں : یزید بن قتادہ نے یہ بات بیان کی کہ ان کے اہل خانہ میں سے ایک شخص کا انتقال ہو گیا ، وہ دین اسلام کا قائل نہیں تھا ، تو میری بجائے میری بہن اس کی وارث بنی ، جو اس کے دین پر تھی ، پھر میرے والد نے اسلام قبول کر لیا اور نبی اکرم صلی اللہ علیہ وسلم کے ساتھ غزوہ حنین میں شرکت کی ، پھر ان کا انتقال ہو گیا ، تو میں نے ان کی پوری وراثت حاصل کر لی ، ۔ انہوں نے ایک غلام اور کھجوروں کا ایک باغ چھوڑا تھا ، پھر میری بہن نے بھی اسلام قبول کر لیا اور وراثت کے بارے میں میرے خلاف مقدمہ سیدنا عثمان رضی اللہ عنہ کے سامنے پیش کیا ، تو سیدنا عبداللہ بن ارقم رضی اللہ عنہ نے مجھے یہ بات بتائی کہ سیدنا عمر رضی اللہ عنہ نے یہ فیصلہ دیا تھا کہ جو شخص وراثت کی تقسیم سے پہلے اسلام قبول کر لیتا ہے ، تو اسے وراثت میں سے حصہ ملے گا ، تو سیدنا عثمان رضی اللہ عنہ نے اس فیصلے کے مطابق فیصلہ دے دیا ، تو وہ خاتون پہلی چیز بھی لے گئی تھی اور پھر اس میں بھی میری شراکت دار بن گئی ۔
یہ روایت امام طبرانی نے نقل کی ہے اور اس کے رجال صحیح کے رجال ہیں ، صرف حسان بن بلال کا معاملہ مختلف ہے اور وہ ثقہ ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” ہر وہ وراثت ، جو اسلام کو پا لے اور ابھی تقسیم نہ ہوئی ہو ، تو وہ اسلام کے احکام کے مطابق تقسیم ہو گی “ ۔
یہ روایت امام طبرانی نے نقل کی ہے اس کی سند میں ایک راوی محمد بن فضل بن عطیہ ہے اور وہ انتہائی ضعیف ہے ۔