مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک ملت ، دوسری ملت کی وارث نہیں بنتی ہے “ ۔
یہ روایت امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی عمر بن راشد ہے اور جمہور کے نزدیک یہ ضعیف ہے ، عجلی نے اسے ثقہ قرار دیا ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کا ایک غلام کھجور سے گر کے مر گیا ، تو نبی اکرم صلی اللہ علیہ وسلم نے اس کی وراثت اُس کے دین سے متعلق افراد کو دی ۔
یہ روایت امام بزار نے نقل کی ہے ، اس کی سند میں ایک راوی حسن بن عمارہ ہے اور وہ ضعیف ہے ۔

حسن نے ، سیدنا جابر رضی اللہ عنہ کے حوالے سے یہ بات ذکر کی ہے : ان سے دریافت کیا گیا : کیا نبی اکرم صلی اللہ علیہ وسلم نے یہ چیز ذکر کی ہے ۔ انہوں نے فرمایا : جی ہاں ! آپ نے یہ فرمایا ہے : ہم اہل کتاب کے وارث نہیں بنیں گے اور وہ ہمارے وارث نہیں بنیں گے ، البتہ کوئی شخص اپنے ( اہل کتاب ) غلام یا کنیز کا وارث بن سکتا ہے ، ہم ان کی عورتوں سے نکاح کر لیں گے ، لیکن وہ ہماری عورتوں کے ساتھ نکاح نہیں کر سکتے ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا انس رضی اللہ عنہ بیان کرتے ہیں : جناب عقیل اور جناب طالب ، جناب ابوطالب کے وارث بنے تھے ، سیدنا علی رضی اللہ عنہ ان کے وارث نہیں بنے تھے ، سیدنا علی رضی اللہ عنہ فرماتے ہیں : اسی وجہ سے ہم نے ” شعب ابی طالب “ میں سے اپنے حصے کو ترک کر دیا ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی علی بن حسین لالی ہے میں اس سے واقف نہیں ہوں اس روایت کے بقیہ رجال ثقہ ہیں ۔