مجمع الزوائد ومنبع الفوائد

سیدہ عائشہ صدیقہ رضی اللہ عنہا بیان کرتی ہیں نبی اکرم صلی اللہ علیہ وسلم نے ارشاد فرمایا : ” بے شک اللہ تعالیٰ نے گانے والی کنیز ، اسے فروخت کرنے ، اس کی قیمت ، اسے تعلیم دینے اور اس کو سننے کو حرام قرار دیا ہے ۔
یہ روایت امام طبرانی نے معجم اوسط میں نقل کی ہے اس کی سند میں دو راوی ایسے ہیں کہ میں نے کسی کو ان کا ذکر کرتے ہوئے نہیں پایا ہے اور لیث بن ابوسلیم نامی راوی تدلیس کرنے والا ہے ۔

سیدنا عمر بن خطاب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” گانے والی کنیز کی قیمت حرام ہے اس کا گانا حرام ہے اس کی طرف دیکھنا حرام ہے اس کی قیمت کتے کی قیمت کی مانند ہے اور کتے کی قیمت حرام ہے اور جس شخص کے گوشت کی نشوونما حرام پر ہوئی ہو تو آگ اس کی زیادہ مستحق ہو گی “ ۔
یہ روایت امام طبرانی نے نقل کی ہے اس کی سند میں ایک راوی یزید بن عبدالملک نوفلی ہے اور وہ متروک ہے جمہور ائمہ نے اسے ضعیف قرار دیا ہے یحیی بن معین کے حوالے سے ایک روایت میں یہ بات نقل کی گئی ہے کہ اس میں کوئی حرج نہیں ہے ۔ اور دوسری روایت کے مطابق انہوں نے اسے ضعیف قرار دیا ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم نے گانے والی کنیزوں اور نوحہ کرنے والی کنیزوں کو فروخت کرنے ، انہیں خریدنے اور انہیں فروخت کرنے اور ان کی تجارت کرنے سے منع کیا ہے آپ نے فرمایا ہے : ان کی کمائی حرام ہے ۔
یہ روایت امام ابویعلیٰ نے نقل کی ہے اس کی سند میں ایک راوی حاریث بن نبہان ہے اور وہ متروک ہے ۔