مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” تم نرمی کرو ! تمہارے ساتھ نرمی کی جائے گی “ ۔
یہ روایت امام أحمد نے نقل کی ہے اس کی سند میں ایک راوی مہدی بن جعفر ہے ، جسے یحیی بن معین اور دیگر حضرات نے ثقہ قرار دیا ہے اس میں ضعف پایا جاتا ہے اس روایت کے بقیہ رجال صحیح کے رجال ہیں ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ایک شخص ادائیگی کرتے ہوئے یا ادائیگی کا تقاضا کرتے ہوئے نرمی کرنے کی وجہ سے جنت میں داخل ہو گیا “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

” بلعد دیہ “ سے تعلق رکھنے والے ایک صاحب بیان کرتے ہیں : میرے دادا نے مجھے یہ بات بیان کی ہے : میں مدینہ منورہ گیا میں وادی کے پاس اترا وہاں دو آدمی موجود تھے جن کے درمیان ایک بکری تھی ، خریدار ، فروخت کرنے والے سے یہ کہہ رہا تھا : تم میرے ساتھ اچھے طریقے سے سودا کرو راوی کہتے ہیں : میں نے دل میں سوچا وہ ہاشمی شخص جس نے لوگوں کو گمراہ کیا ہوا ہے کیا وہ یہی ہے ؟ راوی کہتے ہیں : اسی دوران میں نے دیکھا اس کا جسم خوبصورت تھا پیشانی چوڑی تھی ناک باریک تھی ابرو پتلے تھے ان کی گردن کے نیچے سے لے کے ناف تک سیاہ بالوں کی لکیر تھی ۔ انہوں نے دو چادریں اوڑھی ہوئی تھیں وہ ہمارے قریب آئے اور بولے : السلام علیکم ہم نے انہیں سلام کا جواب دیا تھوڑی دیر بعد جب انہوں نے خریدار کو بلایا تو اس نے عرض کی : یا رسول اللہ آپ اس سے کہیں کہ یہ میرے ساتھ اچھی طرح سے سودا کرے تو انہوں نے اپنا ہاتھ بڑھایا اور فرمایا : تمہارے اموال کے تم مالک ہو مجھے یہ امید ہے کہ جب میں قیامت کے دن اللہ تعالی کی بارگاہ میں حاضر ہوؤں گا تو تم میں سے کسی ایک نے مجھ سے کسی ایسی چیز کا مطالبہ نہیں کرنا ہو گا جو میں نے اس پر مال یا جان یا عزت کے حوالے سے ظلم کیا ہو گا البتہ اس کے حق کا معاملہ مخلف ہے اللہ تعالی اس شخص پر رحم کرے جو فروخت کرنے میں نرم ہو خریدنے میں نرم ہو اور لینے میں نرم ہو ادائیگی میں نرم ہو تقاضا کرنے میں نرم ہو “ ۔ اس کے بعد راوی نے پوری حدیث نقل کی ہے ۔
یہ روایت امام ابویعلیٰ نے نقل کی ہے اس کی سند میں ایک راوی ایسا ہے ، جس کا نام بیان نہیں کیا گیا ہے ۔

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اہل ایمان میں سب سے زیادہ فضیلت رکھنے والا وہ شخص ہے ، جو فروخت کرنے میں نرم ہو خریدنے میں نرم ہو ادائیگی کرنے میں نرم ہو اور تقاضا کرنے میں نرم ہو“ ۔
یہ روایت امام طبرانی نے معجم اوسط میں نقل کی ہے اور اس کے رجال ثقہ ہیں ۔

سیدنا معیقیب رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آگ ، ہر آسان ، نرم ، سہل اور قریب شخص پر حرام قرار دی گئی ہے “ ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی ابوامیہ بن یعلی ہے اور وہ ضعیف ہے ۔

سیدنا جابر بن عبداللہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” کیا میں تمہیں اہل جنت کے بارے میں نہ بتاؤں ، ہر آسان ، نرم ، سہل اور قریب شخص جنتی ہے “ ۔ علامہ ہیثمی فرماتے ہیں : ) میں یہ کہتا ہوں : سیدنا جابر رضی اللہ عنہ کے حوالے سے صحیح میں
یہ روایت منقول ہے ” اللہ تعالیٰ اس شخص پر رحم کرے جو فروخت کرتے ہوئے نرم ہوتا ہے اور خریدتے ہوئے نرم ہوتا ہے “ ۔
یہ روایت امام طبرانی نے معجم اوسط میں نقل کی ہے اور امام ابویعلیٰ نے نقل کی ہے تاہم انہوں نے یہ الفاظ نقل کیے ہیں : ” کیا میں تمہیں یہ نہ بتاؤں کہ کس شخص پر آگ حرام ہے ؟ “ اس روایت کی سند میں ایک راوی عبداللہ بن مصعب زبیری ہے اور وہ ضعیف ہے ۔

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” آگ ، ہر آسان ، نرم ، سہل اور قریب شخص پر حرام ہے “ ۔
یہ روایت امام طبرانی نے معجم اوسط میں نقل کی ہے اس کی سند میں ایسا راوی ہے ، جو معروف نہیں ہے ۔

سیدنا انس رضی اللہ عنہ بیان کرتے ہیں : عرض کی گئی : یا رسول اللہ ! کون شخص آگ پر حرام ہے ؟ نبی اکرم صلی اللہ علیہ وسلم نے ارشاد فرمایا : ” ہر آسان ، نرم ، سہل اور قریب شخص “
یہ روایت امام طبرانی نے معجم اوسط میں نقل کی ہے اس کی سند میں ایک راوی حارث بن عبیدہ ہے اور وہ ضعیف ہے ۔