مجمع الزوائد ومنبع الفوائد

سیدنا عبداللہ بن عمرو رضی اللہ عنہ بیان کرتے ہیں : ایک شخص نے نبی اکرم صلی اللہ علیہ وسلم سے خراب کاریگری کی شکایت کی ، تو آپ نے فرمایا : تم چھوٹے ( بچے ) کی تربیت کرو میں نے آپ سے اس بارے میں دریافت کیا ، تو آپ نے فرمایا : خواہ گھوڑے کا بچہ ہو یا لڑکا ہو ، جب وہ چھوٹا ہو ، تو تربیت کرو ۔
یہ روایت امام طبرانی نے معجم کبیر اور معجم اوسط میں نقل کی ہے اس کی سند میں ایک راوی عبداللہ بن یزید بکری ہے ابوحاتم کہتے ہیں : یہ واہی الحدیث ہے ۔

غسان بن اغر نہشلی بیان کرتے ہیں میرے والد نے مجھے اپنے والد کے حوالے سے یہ بات بیان کی ہے کہ وہ اپنے اونٹ کو لے کر مدینہ منورہ آئے وہ اس پر اناج لاد کر لائے تھے نبی اکرم صلی اللہ علیہ وسلم کی ان سے ملاقات ہوئی تو آپ نے فرمایا : اے دیہاتی ! تم نے کیا لادا ہوا ہے ؟ میں نے کہا: میں نے گندم تیار کی ہے ۔ نبی اکرم صلی اللہ علیہ وسلم نے فرمایا : تم کیا چاہتے ہو ؟ میں نے عرض کی : میں اسے فروخت کرنا چاہتا ہوں تو نبی اکرم صلی اللہ علیہ وسلم نے میرے سر پر ہاتھ پھیرا اور ( لوگوں سے ) فرمایا : دیہاتی کے ساتھ اچھی طرح سے سودا کرنا ۔

ایک روایت میں یہ الفاظ ہیں : غسان بن اغرنہشلی بیان کرتے ہیں : میرے چچا زیاد بن حصین نے اپنے والد سیدنا حصین بن قیس رضی اللہ عنہ کے حوالے سے یہ بات نقل کرتے ہیں : وہ مدینہ منورہ گئے ۔ ۔ ۔ ۔ ۔ ۔ ۔ ۔ ۔ ۔ اس کے بعد راوی نے حسب سابق حدیث ذکر کی ہے ۔ ( علامہ ہیثمی فرماتے ہیں : ) میں یہ کہتا ہوں : امام نسائی رحمہ اللہ نے اس کا کچھ حصہ نقل کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی اسحاق بن ابراہیم صواف ہے اور وہ ضعیف ہے ۔ اس روایت کے مختلف طرق آگے چل کر شہری کے دیہاتی کے لئے کوئی چیز فروخت کرنے سے متعلق باب میں آئیں گے اگر اللہ نے چاہا ۔