مجمع الزوائد ومنبع الفوائد

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے ایک جگہ پڑاؤ کیا آپ قضائے حاجت کے لئے تشریف لے گئے جب آپ واپس تشریف لائے تو کسی شخص نے چیونٹیوں کی بستی پر آگ لگا دی تھی جو یا زمین میں تھی یا درخت پر تھی تو نبی اکرم صلی اللہ علیہ وسلم نے دریافت کیا : تم میں سے کس نے ایسا کیا ہے ؟ اس شخص نے عرض کی : یا رسول اللہ ! میں نے ، نبی اکرم صلی اللہ علیہ وسلم نے فرمایا : تم اسے بجھا دو تم اسے بجھا دو ۔
یہ روایت امام أحمد نے نقل کی ہے اس کی سند میں ایک راوی عبدالرحمن بن عبداللہ مسعودی ہے ، جو اختلاط کا شکار ہو گیا تھا ۔

سیدنا عبداللہ بن مسعود رضی اللہ عنہ فرماتے ہیں : ہم لوگ نبی اکرم صلی اللہ علیہ وسلم کے ساتھ تھے آپ کا گزر چیونٹیوں کی بستی سے ہوا جسے جلا دیا گیا تھا تو نبی اکرم صلی اللہ علیہ وسلم نے ارشاد فرمایا : کسی انسان کے لئے یہ مناسب نہیں ہے کہ وہ اللہ تعالیٰ کے عذاب کی مانند عذاب دے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔

سیدنا سہل بن سعد رضی اللہ عنہ بیان کرتے ہیں : نبی اکرم صلی اللہ علیہ وسلم نے چیونٹی ، شہد کی مکھی ، ہد ہد ، صرد ( نامی پرندوں ) اور مینڈک کو مارنے سے منع کیا ہے ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عبد المہیمن بن عباس بن سہل ہے اور وہ ضعیف ہے ۔