مجمع الزوائد ومنبع الفوائد

قرہ بن ایاس بیان کرتے ہیں : ایک شخص نے عرض کی : یا رسول اللہ ! میں بکری ذبح کرنے لگتا ہوں لیکن مجھے اس پر رحم آتا ہے ( راوی کو شک ہے شاید یہ الفاظ ہیں : ) بکری کو ذبح کرنے کے حوالے سے مجھے بکری پر رحم آتا ہے ، تو نبی اکرم صلی اللہ علیہ وسلم نے فرمایا : ” اگر تم بکری پر رحم کرتے ہو ، تو اللہ تعالیٰ تم پر رحم کرے گا اگر تم بکری پر رحم کرتے ہو ، تو اللہ تعالیٰ تم پر رحم کرے گا “ ۔
یہ روایت امام أحمد نے امام بزار نے اور امام طبرانی نے معجم کبیر اور معجم صغیر میں نقل کی ہے اور ان حضرات نے کسی شک کے بغیر
یہ روایت نقل کی ہے ان حضرات کا یہ کہنا ہے کہ ان صاحب نے عرض کی : یا رسول اللہ ! میں بکری ذبح کرنے لگتا ہوں تو مجھے اس پر رحم آ جاتا ہے ۔ ۔ ۔ ۔ ۔ ۔ ۔ ۔ ۔ ۔ اس روایت کے مختلف الفاظ ہیں اور اس کے رجال ثقہ ہیں ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص ذبیحہ پر رحم کرتا ہے قیامت کے دن اللہ تعالی اس پر رحم کرے گا “ ۔

ایک روایت میں یہ الفاظ ہیں : ” جو شخص رحم کرتا ہے خواہ وہ ایک چڑیا کے ذبیحہ پر ہی کرے تو قیامت کے دن اللہ تعالی اس پر رحم کرے گا“ ۔
یہ روایت امام طبرانی نے معجم کبیر میں نقل کی ہے اور اس کے رجال ثقہ ہیں ۔

سیدنا معقل بن یسار رضی اللہ عنہ بیان کرتے ہیں : میں نے عرض کی : یا رسول اللہ ! بعض اوقات میں کسی اونٹ کو ذبح کرنے کے لئے پکڑتا ہوں اور پھر مجھے اس پر رحم آ جاتا ہے ، نبی اکرم صلی اللہ علیہ وسلم نے فرمایا : اگر تم اس پر رحم کرتے ہو ، تو اللہ تعالیٰ تم پر رحم کرے گا “ ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی عثمان بن عبدالرحمن جمحی ہے ابوحاتم کہتے ہیں : اس کی حدیث کو نوٹ کیا جائے گا لیکن اس سے استدلال نہیں کیا جائے گا ۔