مجمع الزوائد ومنبع الفوائد

سیدنا ابوہریرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں کہ آپ نے رمیہ سے منع کیا ہے یعنی جانور کو تیر مارا جائے ( یعنی اس نشانہ بازی کر کے اسے مار دیا جائے ) اور پھر اس کو کھایا جائے بلکہ اسے ذبح کیا جائے گا پھر اگر وہ چاہے ، تو تیر مار لے “ ۔
یہ روایت امام أحمد نے نقل کی ہے اور امام طبرانی نے معجم اوسط میں نقل کی ہے اس کی سند میں ایک راوی ابن لہیعہ ہے اور اس کی نقل کردہ حدیث حسن ہے ۔

سیدنا سمرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” کسی بھی ایسی چیز کو نشانہ نہ بناؤ جس میں روح موجود ہو “ ۔
یہ روایت امام بزار نے نقل کی ہے اس کی سند میں ایک راوی خلاد بن بزیع ہے کسی نے اس پر جرح نہیں کی ہے اور نہ ہی اس کی توثیق کی ہے اس روایت کے بقیہ رجال ثقہ ہیں ۔

سیدنا سمرہ بن جندب رضی اللہ عنہ بیان کرتے ہیں : نبی اکرم صلی اللہ علیہ وسلم نے اس بات سے منع کیا ہے کہ جانوروں کو باندھ کر ( ان پر نشانہ بازی کی جائے ) اور جب انہیں باندھ کر ( نشانہ بازی کر کے مارا جائے ) تو اس کا گوشت کھانے ( سے بھی نبی اکرم صلی اللہ علیہ وسلم نے منع کیا ہے ) ۔
یہ روایت امام طبرانی نے معجم کبیر میں نقل کی ہے اس کی سند میں ایک راوی خلاد بن یزید ہے ۔ انہوں نے اس کا یہ نام بیان کیا ہے لیکن درست یہ ہے کہ ان کا نام خلاد بن بزیع ہے جیسا کہ اس سے پہلے والی حدیث میں گزر چکا ہے کسی نے بھی اس پر جرح نہیں کی ہے ۔

سیدنا مغیرہ بن شعبہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر کچھ انصار کے پاس سے ہوا جو ایک کبوتری پر تیراندازی کر رہے تھے تو آپ نے ارشاد فرمایا : ” کسی ذی روح چیز کو نشانہ نہ بناؤ “ ۔
یہ روایت امام طبرانی نے معجم اوسط اور معجم کبیر میں نقل کی ہے اور اس کی سند حسن ہے ۔

ابوصالح حنفی نے نبی اکرم صلی اللہ علیہ وسلم کے اصحاب میں سے ایک صاحب کے حوالے سے ، میرا خیال ہے وہ صحابی سیدنا عبداللہ بن عمر رضی اللہ عنہما ہیں ، ان کا یہ بیان نقل کیا ہے میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے ” جو شخص کسی ذی روح چیز کا مثلہ کرتا ہے اور پھر اس عملسے توبہ نہیں کرتا تو قیامت کے دن اللہ تعالیٰ اس شخص کا مثلہ کرے گا “ ۔
یہ روایت امام أحمد نے نقل کی ہے اور اس کے رجال ثقہ ہیں ۔

ابواحوض بیان کرتے ہیں : سیدنا عوف بن مالک رضی اللہ عنہ یعنی راوی کے والد نبی اکرم صلی اللہ علیہ وسلم کی خدمت میں حاضر ہوئے ان کے جسم پر چادریں تھیں ، نبی اکرم صلی اللہ علیہ وسلم نے فرمایا : اے عوف کیا ایسا نہیں ہے کہ جب تمہاری اونٹنی بچے کو جنم دیتی ہے ، تو اس بچے کے کان ٹھیک ہوتے ہیں اور پھر تم اس بچے کے پاس جا کر اس کے کان چیر دیتے ہو اور یہ کہتے ہو یہ بحیرہ ہے یا تم کسی بچے کے پاس جا کر اس کے کان شق کر دیتے ہو اور تم کہتے ہو یہ صرم ہے تم ایسا نہ کرو اللہ تعالیٰ کی کلائی تمہاری کلائی سے زیادہ مضبوط ہے اور اللہ تعالی کا استرا تمہارے استرے سے زیادہ تیز دھار والا ہے ، جو چیز اللہ تعالیٰ نے تمہیں حلال کے طور پر عطا کی ہوئی ہے اسے کھا لو اور تم اپنے مال میں سے کسی چیز کو حرام نہ کرو نبی اکرم صلی اللہ علیہ وسلم نے ان سے فرمایا : اے عوف بن مالک تمہارا وہ غلام جو تمہاری فرمانبرداری کرتا ہے اور تمہارے حکم کی پیروی کرتا ہے وہ تمہارے نزدیک زیادہ پسندیدہ ہو گا ؟ یا تمہارا وہ غلام جو تمہاری فرمانبرداری بھی نہیں کرتا اور تمہارے حکم کی پیروی بھی نہیں کرتا وہ تمہارے نزدیک زیادہ پسندیدہ ہو گا ؟ تو سیدنا عوف بن مالک رضی اللہ عنہ نے کہا: جی نہیں ! بلکہ میرا وہ غلام جو میری فرمانبرداری کرتا ہے اور میرے حکم کی پیروی کرتا ہے ( یقینا وہ زیادہ پسندیدہ ہو گا ) نبی اکرم صلی اللہ علیہ وسلم نے ارشاد فرمایا : اپنے پروردگار کی بارگاہ میں تم لوگ بھی اسی طرح ہو ۔
یہ روایت امام طبرانی نے معجم کبیر میں نقل کی ہے ۔ انہوں نے اس حدیث میں صحابی کا نام سیدنا عوف بن مالک رضی اللہ عنہ بیان کیا ہے : ” سنن “ میں اس روایت کا کچھ حصہ سیدنا مالک بن نضلہ رضی اللہ عنہ کی نقل کردہ حدیث کے طور پر مذکور ہے ، جو ابوملیح نامی راوی کے والد ہیں امام طبرانی کی سند میں ایک راوی عبدالرحمن مسعودی ہے وہ ثقہ ہے لیکن وہ اختلاط کا شکار ہو گیا تھا ۔