مجمع الزوائد ومنبع الفوائد

سیدنا قدامہ بن عبداللہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ اونٹنی پر سوار تھے اور اپنی چھڑی کے ذریعے حجر اسود کا استلام کر رہے تھے ۔
یہ روایت امام أحمد اور امام ابویعلیٰ نے نقل کی ہے ۔ اور امام طبرانی نے معجم کبیر اور معجم اوسط میں نقل کی ہے تاہم انہوں نے یہ الفاظ نقل کیے ہیں : ” میں نے نبی اکرم صلی اللہ علیہ وسلم کو دیکھا آپ اپنی اونٹنی پر بیت اللہ کا طواف کر رہے تھے اور اپنی چھڑی کے ذریعے حجر اسود کا استلام کر رہے تھے “ ۔ اس روایت کے رجال کی توثیق کی گئی ہے اس کے بعض رجال کے بارے میں ایسا کلام کیا گیا ہے ، جو نقصان دہ نہیں ہے ۔

سیدنا عبداللہ بن عمر رضی اللہ عنہما بیان کرتے ہیں : نبی اکرم صلی اللہ علیہ وسلم نے فتح مکہ کے دن اپنی اونٹنی پر طواف کیا تھا آپ اپنے پاس موجود چھڑی کے ذریعے ارکان کا استلام کر رہے تھے ۔
یہ روایت امام ابویعلیٰ نے نقل کی ہے اس کی سند میں ایک راوی موسیٰ بن عبیدہ ہے اور وہ ضعیف ہے اسے ان روایات میں ثقہ قرار دیا گیا ہے ، جو اس نے عبداللہ بن دینار کے علاوہ کسی اور سے نقل کی ہوں اور یہ روایت بھی ان میں سے ایک ہے ۔

سیدنا ابورافع رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو دیکھا آپ نے اپنی سواری پر بیت اللہ کا طواف کیا اور اپنی چھڑی کے ذریعے رکن کا استلام کیا ۔
یہ روایت امام بزار نے نقل کی ہے اس کی سند میں ایک راوی اسحاق بن ابراہیم حنینی ہے ، جسے ابن حبان نے ثقہ قرار دیا ہے وہ فرماتے ہیں : غلطی کر جاتا ہے لوگوں نے اسے ضعیف کہا: ہے ۔

سیدنا عبداللہ بن حنظلہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو اپنی سواری پر بیت اللہ کا طواف کرتے ہوئے دیکھا آپ اپنی چھڑی کے ذریعے رکن ( یعنی حجر اسود ) کا استلام کر رہے تھے ۔
یہ روایت امام بزار نے نقل کی ہے اس کی سند میں دو راوی ایسے ہیں کہ میں نے کسی کو ان کے حالات بیان کرتے ہوئے نہیں پایا ہے ۔

ابومالک اشجعی اپنے والد کے حوالے سے یہ بات نقل کرتے ہیں نبی اکرم صلی اللہ علیہ وسلم نے اپنی سواری پر بیت اللہ کا طواف کیا تھا اور اپنی چھڑی کے ذریعے حجر اسود کا استلام کیا تھا ۔
یہ روایت امام بزار نے نقل کی ہے اس کی سند میں یہ بات مذکور ہے محمد بن عبدالرحمن نے ابومالک اشجعی سے
یہ روایت نقل کی ہے اور میں محمد بن عبدالرحمن سے واقف نہیں ہوں ۔

سیدہ عائشہ صدیقہ رضی اللہ عنہا بیان کرتی ہیں فتح مکہ کے دن نبی اکرم صلی اللہ علیہ وسلم نے اونٹ پر طواف کیا تھا آپ کے پاس چھڑی تھی جس کے ذریعے آپ حجر اسود کا استلام کر رہے تھے آپ اس بات کو ناپسند کرتے تھے آپ کی وجہ سے لوگوں کو پرے کیا جائے ۔
یہ روایت امام طبرانی نے معجم اوسط میں نقل کی ہے اور اس کے رجال صحیح کے رجال ہیں ۔