مجمع الزوائد ومنبع الفوائد

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص عرفہ کے دن روزہ رکھتا ہے ، تو یہ اس کے لئے دو سال کے ( گناہوں کا ) کفارہ بن جاتا ہے ، اور جو شخص محرم کا ایک دن روزہ رکھتا ہے تو ہر ایک دن کے روزے کے عوض میں اسے تیس دن کے روزوں کا اجر ملتا ہے “ ۔
یہ روایت امام طبرانی نے معجم صغیر میں نقل کی ہے ۔ اس کی سند میں ایک راوی ہیثم بن حبیب ہے ، جسے امام ذہبی نے ” ضعیف“ قرار دیا ہے ۔

ان کے حوالے سے یہ بات منقول ہے نبی اکرم صلی اللہ علیہ وسلم نے ارشاد فرمایا : ” جو شخص محرم کے ایک دن کا روزہ رکھتا ہے ، تو اس کو ہر ایک دن کے عوض میں تیس نیکیاں ملتی ہیں “ ۔
یہ روایت امام طبرانی نے معجم کبیر میں نقل کی ہے ، اور اس کی سند میں بھی ہیثم بن حبیب نامی راوی ہے ۔

سیدنا جندب بن سفیان رضی اللہ عنہ بیان کرتے ہیں : نبی اکرم صلی اللہ علیہ وسلم یہ ارشاد فرمایا کرتے تھے : ” فرض نماز کے بعد سب سے زیادہ فضیلت والی نماز وہ ہے ، جو نصف رات وقت ادا کی جائے اور رمضان کے بعد سب سے زیادہ فضیلت والا روزہ اللہ تعالیٰ کے مہینے کا روزہ ہے ، جسے تم محرم کا نام دیتے ہو“ ۔ ( علامہ ہیثمی فرماتے ہیں : ) میں یہ کہتا ہوں : ” اطراف“ کے مصنف نے اس کی نسبت امام نسائی رحمہ اللہ کی طرف کی ہے ، لیکن میں نے اپنے پاس موجود نسخے میں
یہ روایت نہیں پائی ہے یہ ” سنن کبری“ میں موجود ہے ۔

یہ روایت امام طبرانی نے معجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص حرمت والے مہینوں میں تین روزے رکھے جمعرات جمعہ اور ہفتہ کے دن تو اس کے لئے ساٹھ سال کی عبادت نوٹ کی جاتی ہے “ ۔
یہ روایت امام طبرانی نے معجم اوسط میں یعقوب بن موسیٰ مدنی کے حوالے سے مسلمہ سے نقل کی ہے ۔ یعقوب نامی راوی مجہول ہے ، اور مسلمہ نامی راوی مسلمہ بن راشد حمانی ہے ، جس کے بارے میں ابوحاتم نے یہ کہا: ہے : یہ مضطرب الحدیث ہے ازدی نے ضعفاء میں یہ بات بیان کی ہے کہ اس سے استدلال نہیں کیا جائے گا انہوں نے اس کے حوالے سے یہ حدیث روایت کی ہے اس کا باپ راشد بن نجیح ابومحمد حمانی ہے ، جس کے حوالے سے امام ابن ماجہ نے روایت نقل کی ہے ۔ ابوحاتم کہتے ہیں : یہ صالح الحدیث ہے ۔ ابن حبان نے اس کا تذکرہ کتاب ” الثقات “ میں کیا ہے ، اور یہ بات بیان ہے کہ یہ بعض اوقات غلطی کر جاتا ہے ۔ ابن جوزی کہتے ہیں : یہ مجہول ہے ، حالانکہ ویسا نہیں ہے ، جس طرح انہوں نے بیان کیا ہے کیونکہ حماد بن زید ، عبداللہ بن مبارک ، ابونعیم فضل بن دکین اور دیگر حضرات نے اس سے روایات نقل کی ہیں ( اور ایسا شخص مجہول نہیں ہو سکتا ) ۔