مجمع الزوائد ومنبع الفوائد

سیدنا جابر بن عبداللہ انصاری رضی اللہ عنہما بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص رمضان کے روزے رکھتا ہے ، اور شوال کے چھ روزے رکھتا ہے گویا اس نے پورا سال روزے رکھے “ ۔
یہ روایت امام أحمد نے اور امام بزار نے اور امام طبرانی نے معجم اوسط میں نقل کی ہے ۔ اس کی سند میں ایک راوی عمرو بن جابر ہے ، اور وہ ضعیف ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص رمضان کے روزے رکھتا ہے پھر اس کے بعد شوال کے چھ روزے بھی رکھ لیتا ہے ، تو گویا اس نے پورے سال کے روزے رکھے “ ۔
یہ روایت امام بزار نے نقل کی ہے ۔ اس کے مختلف طرق ہیں جن میں سے بعض کے رجال ” صحیح“ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص عیدالفطر کے بعد چھ روزے مسلسل رکھ لیتا ہے ، تو گویا اس نے پورا سال روزے رکھے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایسا راوی ہے ، جس سے میں واقف نہیں ہوں ۔

سیدنا عبداللہ بن عباس رضی اللہ عنہما اور سیدنا جابر رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص رمضان کے روزے رکھتا ہے ، اور پھر وہ اس کے بعد شوال کے چھ روزے رکھ لیتا ہے ، تو اس نے پورا سال روزے رکھے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یحیی بن سعید مازنی ہے ، اور وہ متروک ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس نے رمضان کے روزے رکھے ، اور پھر وہ اس کے بعد شوال کے چھ روزے رکھتا ہے وہ اپنے گناہوں سے اس طرح نکل جاتا ہے ، جس طرح وہ اس دن تھا جس دن اس کی والدہ نے اسے جنم دیا تھا “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مسلمہ بن علی خشنی ہے ، اور وہ ضعیف ہے ۔

سیدنا ابوایوب انصاری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص رمضان کے روزے رکھتا ہے ، اور پھر اس کے بعد شوال کے چھ روزے رکھتا ہے ، تو یہ پورا سال روزے رکھنے کی مانند ہے “ ۔ راوی کہتے ہیں : میں نے دریافت کیا : اس سے مراد یہ ہے کہ ایک دن کے مقابلے میں دس دن کا ( اجر و ثواب حاصل ہو گا انہوں نے جواب دیا : جی ہاں ۔
( علامہ ہیثمی فرماتے ہیں : ) میں یہ کہتا ہوں :
یہ روایت ” صحیح “ میں مذکور ہے ، تا ہم اس میں یہ الفاظ نہیں ہیں : ” ہر ایک دن کے بدلے میں دس دن کا اجر ہو گا ۔ انہوں نے جواب دیا : جی ہاں “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

سیدنا غنام رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص عیدالفطر کے بعد چھ روزے رکھ لیتا ہے ، تو گویا اس نے پورا زمانہ اور پورا سال روزے رکھے “ ۔
یہ روایت امام طبرانی نے معجم کبیر میں نقل کی ہے ۔ عبدالرحمن بن غنام نامی راوی سے میں واقف نہیں ہوں ۔