مجمع الزوائد ومنبع الفوائد

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم کا گزر کچھ یہودیوں کے پاس سے ہوا جنہوں نے عاشوراء کے دن روزہ رکھا ہوا تھا آپ نے دریافت کیا : یہ روزہ کسی وجہ سے ہے ؟ انہوں نے بتایا یہ وہ دن ہے ، جس میں اللہ تعالیٰ نے سیدنا موسیٰ علیہ السلام اور بنی اسرائیل کو ڈوبنے سے نجات دی تھی اور فرعون کو اس دن میں ڈبو دیا تھا یہ وہ دن ہے ، جس میں ( سیدنا نوح علیہ السلام کی ) کشتی جودی پہاڑ کے ساتھ لگ گئی تھی تو سیدنا نوح علیہ السلام نے اور سیدنا موسیٰ علیہ السلام نے اللہ تعالیٰ کا شکر ادا کرنے کے لئے ( اس دن ) روزہ رکھا تھا نبی اکرم صلی اللہ علیہ وسلم نے ارشاد فرمایا : ہم لوگ سیدنا موسیٰ علیہ السلام کے زیادہ قریبی ہیں اور روزہ رکھنے کے زیادہ حق دار ہیں پھر نبی اکرم صلی اللہ علیہ وسلم نے اپنے اصحاب کو ( اس دن ) روزہ رکھنے کا حکم دیا ۔
یہ روایت امام أحمد نے نقل کی ہے ۔ اس کی سند میں ایک راوی حبیب بن عبداللہ ازدی ہے اس کے حوالے سے اس کے بیٹے کے علاوہ کسی اور نے روایت نقل نہیں کی ہے ۔

سیدنا ابوہریرہ رضی اللہ عنہ بیان کرتے ہیں : نبی اکرم صلی اللہ علیہ وسلم عاشوراء کے دن روزہ رکھا کرتے تھے ، اور اپنے اصحاب سے فرمایا کرتے تھے : جس نے روزہ دار ہونے کے عالم میں صبح کی ہے وہ اپنا روزہ مکمل کرے اور جس نے اپنے گھر میں ناشتہ کر لیا تھا ، تو وہ بقیہ دن میں اس ( روزے ) کو مکمل کرے ۔
یہ روایت امام أحمد نے نقل کی ہے ، اور اس کی سند میں بھی حبیب نامی راوی ہے ، جس کے حوالے سے اس کے بیٹے کے علاوہ اور کسی نے روایت نقل نہیں کی ہے ۔

سیدنا علی رضی اللہ عنہ بیان کرتے ہیں : نبی اکرم صلی اللہ علیہ وسلم عاشوراء رضی اللہ عنہ کے دن روزہ رکھا کرتے تھے ، اور اس کا حکم بھی دیتے تھے ۔
یہ روایت عبداللہ بن أحمد نے اور امام بزار نے نقل کی ہے ۔ اس کی سند میں ایک راوی جابر جعفی ہے ، جسے شعبہ اور ثوری نے ” ثقہ “ قرار دیا ہے ، اور اس کے بارے میں بہت زیادہ کلام کیا گیا ہے ۔

ثویر بن ابوفاختہ بیان کرتے ہیں : میں نے سیدنا عبداللہ بن زبیر رضی اللہ عنہما کو منبر پر یہ ارشاد فرماتے ہوئے سنا ” یہ عاشوراء کا دن ہے تم اس دن روزہ رکھو کیونکہ نبی اکرم صلی اللہ علیہ وسلم نے اس کے روزے کا حکم دیا ہے “ ۔
یہ روایت امام أحمد نے امام بزار نے اور امام طبرانی نے معجم کبیر میں نقل کی ہے ۔ ثویر نامی راوی ضعیف ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے چار فرسخ ( راوی کو شک ہے شاید یہ الفاظ ہیں : ) دو فرسخ کے فاصلے پر موجود بستی والوں کو پیغام بھیجا یہ عاشوراء کے دن کی بات ہے آپ نے یہ حکم دیا کہ جس نے کچھ کھا لیا ہے وہ باقی دن میں کچھ نہ کھائے اور جس نے کچھ نہیں کھایا ہے وہ باقی دن میں روزے کو مکمل کرے ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ اس کی سند میں ایک راوی جابر جعفی ہے ، جسے شعبہ اور ثوری نے ” ثقہ “ قرار دیا ہے ، اور اس کے بارے بہت زیادہ کلام کیا گیا ہے ۔

بعجہ بن عبدالله بن بدر بیان کرتے ہیں : ان کے والد نے انہیں یہ بات بتائی ایک دن نبی اکرم صلی اللہ علیہ وسلم نے لوگوں سے ارشاد فرمایا : یہ عاشوراء کا دن ہے ، تو تم اس میں روزہ رکھو بنو عمرو بن عوف سے تعلق رکھنے والے ایک صاحب نے عرض کی : یا رسول اللہ ! میں نے اپنی قوم کو ایسی حالت میں چھوڑا ہے کہ ان میں سے کچھ لوگوں نے روزہ رکھا ہوا تھا اور کچھ نے روزہ نہیں رکھا ہوا تھا نبی اکرم صلی اللہ علیہ وسلم نے ارشاد فرمایا : تم ان لوگوں کی طرف جاؤ اور ان میں سے جس نے روزہ نہیں رکھا ہوا تھا وہ اپنے روزے کو مکمل کرے ( یعنی باقی دن میں کچھ نہ کھائے پیئے ) ۔
یہ روایت امام أحمد نے اور امام طبرانی نے معجم کبیر اور معجم اوسط میں نقل کی ہے ، اور امام بزار نے نقل کی ہے ، اور اس کی سند حسن ہے ۔

سیدنا ہند بن اسماء اسلمی رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے میری قوم اسلم قبیلے کی طرف بھیجا آپ نے ارشاد فرمایا : تم اپنی قوم کو یہ ہدایت کرو کہ اس دن یعنی عاشوراء کے دن روزہ رکھیں اور ان میں سے جس شخص کو تم پاؤ کہ اس نے دن کے ابتدائی حصے میں کچھ کھا لیا ہو تو وہ دن کے آخری حصے تک ( روزے کو ) مکمل کرے ۔
یہ روایت امام أحمد نے اور امام طبرانی نے معجم کبیر میں نقل کی ہے ۔ امام أحمد کے رجال ثقہ ہیں ۔

یحیی بن ہند بن حارثہ بیان کرتے ہیں : سیدنا ہند رضی اللہ عنہ کو غزوہ حدیبیہ میں شرکت کا شرف حاصل ہے ، اور ان کے بھائی وہ شخص ہیں جنہیں نبی اکرم صلی اللہ علیہ وسلم نے بھیجا تھا کہ وہ اپنی قوم کو عاشوراء کے دن روزہ رکھنے کا حکم دیں ان کا نام سیدنا اسماء بن حارثہ رضی اللہ عنہ ہے ، تو یحیی بن ہند نے سیدنا اسماء بن حارثہ رضی اللہ عنہ کے حوالے سے یہ بات مجھے بیان کی کہ نبی اکرم صلی اللہ علیہ وسلم نے مجھے بھیجا اور ارشاد فرمایا : تم اپنی قوم کو اس دن روزہ رکھنے کا حکم دو ! انہوں نے عرض کی : آپ کی اس بارے میں کیا رائے ہے ؟ اگر میں ان لوگوں کو پاتا ہوں کہ وہ کھانا کھا چکے ہوں ؟ نبی اکرم صلی اللہ علیہ وسلم نے فرمایا : پھر وہ دن کے آخری حصے تک ( روزے کو ) مکمل کریں ( یعنی پھر کچھ نہ کھائیں پیئیں ) ۔
یہ روایت امام أحمد نے نقل کی ہے ، اور انہوں نے اسے اسی طرح ” مرسل “ روایت کے طور پر نقل کیا ہے ان سے ان کے صاحبزادے نے یحیی بن ہند بن حارثہ کے حوالے سے ان کے والد کے حوالے سے اسے نقل کیا ہے ، اور اس کے رجال ثقہ ہیں ۔

سیدنا اسماء بن حارثہ رضی اللہ عنہ بیان کرتے ہیں : عاشوراء کے دن نبی اکرم صلی اللہ علیہ وسلم نے مجھے بھیجا اور ارشاد فرمایا : تم اپنی قوم کے پاس جاؤ اور انہیں یہ ہدایت کرو کہ وہ آج کے دن روزہ رکھیں انہوں نے عرض کی : یا رسول اللہ ! اپنے بارے میں میرا یہ خیال ہے کہ جب میں ان کے پاس پہنچوں گا ، تو وہ لوگ کچھ کھا چکے ہوں گے ۔ نبی اکرم صلی اللہ علیہ وسلم نے ارشاد فرمایا : ان میں سے جس نے کچھ کھا لیا ہو اس کو تم یہ ہدایت کرنا کہ وہ باقی دن میں روزہ رکھے “ ۔
یہ روایت امام طبرانی نے معجم کبیر اور معجم اوسط میں نقل کی ہے ، اور اس کے رجال ” صحیح“ کے رجال ہیں ۔

سیدنا جابر رضی اللہ عنہ بیان کرتے ہیں : نبی اکرم صلی اللہ علیہ وسلم نے ہمیں عاشوراء کے دن کے بارے میں یہ حکم دیا تھا کہ ہم اس دن روزہ رکھیں ۔ ( راوی کہتے ہیں : ) یہ وہ دن تھا جس میں یہودی روزہ رکھا کرتے تھے ۔
یہ روایت امام أحمد نے اور امام طبرانی نے معجم اوسط میں نقل کی ہے ۔ اس کی سند میں ایک راوی ابن لہیعہ ہے ، اور وہ حسن الحدیث ہے ، اور اس کے بارے میں کلام کیا گیا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” عاشوراء تم سے پہلے کے ایک نبی کی عید کا دن ہے ، تو تم لوگ اس دن روزہ رکھو “ ۔
یہ روایت امام بزار نے نقل کی ہے ۔ اس کی سند میں ایک راوی ابراہیم ہجری ہے ، جسے ابن عدی نے ” ثقہ “ قرار دیا ہے ، اور ائمہ نے اسے ضعیف کہا: ہے ۔

مجزاة بن زاہر نے اپنے والد کا یہ بیان نقل کیا ہے : میں نے نبی اکرم صلی اللہ علیہ وسلم کے منادی کو عاشوراء کے دن یہ کہتے ہوئے سنا : ” آج جس نے روزہ رکھا ہوا ہے وہ اپنے روزے کو مکمل کرے اور جس نے روزہ نہیں رکھا ہوا تو وہ باقی رہ جانے والے ( دن کے حصے کو مکمل کرے ( راوی کو شک ہے شاید یہ الفاظ ہیں : ) روزہ رکھنے “ ۔
یہ روایت امام بزار نے امام طبرانی نے معجم کبیر اور معجم اوسط میں نقل کی ہے ، اور انہوں نے یہ الفاظ نقل کیے ہیں : ” نبی اکرم صلی اللہ علیہ وسلم نے یہ حکم دیا ۔ ۔ ۔ ۔ ۔ ۔ ۔ ۔ “ ۔ امام بزار کے رجال ثقہ ہیں ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے عاشوراء کے دن روزہ رکھنے کا حکم دیا تھا اور آپ خود یہ روزہ نہیں رکھتے تھے ۔
یہ روایت امام ابویعلیٰ نے نقل کی ہے ۔ اس کی سند میں ایک راوی ہارون عبدی ہے ، اور وہ ضعیف ہے ۔

علیلہ نامی خاتون اپنی والدہ کا یہ بیان نقل کرتی ہیں : میں نے امتہ اللہ بنت رزینہ سے کہا: اے امتہ اللہ ! کیا آپ کی والدہ نے آپ کو یہ حدیث بیان کی ہے کہ انہوں نے نبی اکرم صلی اللہ علیہ وسلم کو عاشوراء کے روزے کے بارے میں کوئی بات ارشاد فرماتے ہوئے سنا ہے ؟ تو اس خاتون نے جواب دیا : جی ہاں ۔ نبی اکرم صلی اللہ علیہ وسلم اس دن کی تعظیم کرتے تھے ، یہاں تک کہ آپ اپنے اور اپنی صاحبزادی سیدہ فاطمہ رضی اللہ عنہ کے دودھ پیتے بچوں کو بلاتے تھے ، اور ان کے منہ میں لعاب دہن ڈال دیتے تھے اور ان کی ماؤں سے یہ فرماتے تھے کہ رات ہونے تک انہیں دودھ نہ پلانا ۔
یہ روایت امام ابویعلیٰ نے اور امام طبرانی نے معجم کبیر اور معجم اوسط میں نقل کی ہے ، اور اس کے الفاظ یہ ہیں : ” نبی اکرم صلی اللہ علیہ وسلم اس کی تعظیم کرتے تھے ، یہاں تک کہ آپ اپنے اور سیدہ فاطمہ رضی اللہ عنہ کے دودھ پیتے بچوں کو بھی بلواتے تھے ، اور ان کے منہ میں لعاب دہن ڈال دیتے تھے ، اور ان کی ماؤں سے یہ کہتے تھے : رات ہونے تک تم انہیں دودھ نہ پلانا نبی اکرم صلی اللہ علیہ وسلم کا لعاب دہن ان بچوں کے لئے کفایت کر جاتا تھا “ ۔ علیلہ نامی خاتون اور اس سے اوپر کی خواتین کے حالات بیان کرتے ہوئے میں نے کسی کو نہیں پایا ہے ۔ امام طبرانی نے یہ بات بیان کی ہے علیلہ بنت کمیت نے اپنی والدہ امینہ کے حوالے سے
یہ روایت نقل کی ہے ۔

سیدنا ابوسعید خدری رضی اللہ عنہ بیان کرتے ہیں : نبی اکرم صلی اللہ علیہ وسلم نے عاشوراء کے دن کا ذکر کرتے ہوئے اس کی عظمت کا اظہار کیا ، اور اپنے آس پاس موجود افراد سے یہ فرمایا : ” تم میں سے جس شخص نے کچھ نہ کھایا ہو تو وہ آج کے دن روزہ رکھ لے اور تم میں سے جس شخص نے کچھ کھا لیا ہو تو وہ باقی دن میں روزہ رکھے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال ثقہ ہیں ۔

سیدنا ابوموسی اشعری رضی اللہ عنہ کے بارے میں یہ بات منقول ہے ۔ انہوں نے عاشوراء کے دن ارشاد فرمایا : تم اس دن روزہ رکھو کیونکہ نبی اکرم صلی اللہ علیہ وسلم نے ہمیں یہ روزہ رکھنے کا حکم دیا ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی مزیدہ بن جابر ہے ، اور وہ ضعیف ہے ۔

سیدنا خباب رضی اللہ عنہ بیان کرتے ہیں : نبی اکرم صلی اللہ علیہ وسلم نے عاشوراء کے دن ارشاد فرمایا : ” اے لوگو ! تم میں سے جس شخص نے کچھ کھا لیا ہو تو وہ باقی دن میں کچھ نہ کھائے اور تم میں سے جس شخص نے روزہ رکھنا ہو وہ روزہ رکھ لے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی ایوب بن جابر ہے ، جسے امام أحمد نے اور دیگر حضرات نے ” ثقہ “ قرار دیا ہے یحیی بن معین اور دیگر حضرات نے اسے ضعیف کہا: ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم کسی بھی دن کے روزے کو رمضان کے بعد کسی دوسرے دن پر فضیلت نہیں دیتے تھے البتہ عاشوراء کا معاملہ مختلف ہے ۔ ( علامہ ہیثمی فرماتے ہیں : ) میں یہ کہتا ہوں : سیدنا عبداللہ بن عباس رضی اللہ عنہما کے حوالے سے ” صحیح “ میں ایک حدیث منقول ہے ، جو اس کے علاوہ ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن عبدالرحمن بن بکر علاف ہے میں نے کسی کو اس کے حالات بیان کرتے ہوئے نہیں پایا ہے اس کے بقیہ رجال ثقہ ہیں ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” روزہ رکھنے میں کسی دن کو دوسرے دن پر فضیلت حاصل نہیں ہے ، البتہ رمضان کے مہینے اور عاشوراء کے دن کا معاملہ مختلف ہے “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

سعید بن مسیب بیان کرتے ہیں : انہوں نے سیدنا معاویہ رضی اللہ عنہ کو عاشوراء کے دن منبر پر یہ ارشاد فرماتے ہوئے سنا کہ میں نے نبی اکرم صلی اللہ علیہ وسلم کو اس دن کا روزہ رکھنے کا حکم دیتے ہوئے سنا ہے ۔ ( علامہ ہیثمی فرماتے ہیں : ) میں یہ کہتا ہوں : سیدنا معاویہ رضی اللہ عنہ کے حوالے سے ” صحیح “ میں ایک حدیث منقول ہے ، جو اس کے علاوہ ہے ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی محمد بن ہشام حلبی ہے ۔ ابن مبارک سے اس کے روایت کرنے کے بارے میں کلام کیا گیا ہے ، اور یہ حدیث ان میں سے نہیں ہے ۔

سیدنا عبداللہ بن عباس رضی اللہ عنہما بیان کرتے ہیں : نبی اکرم صلی اللہ علیہ وسلم نے عاشوراء کے دن فجر کی نماز ادا کی جب آپ نماز پڑھ کر فارغ ہوئے تو آپ نے ارشاد فرمایا : ” تم میں سے جس شخص نے روزہ رکھا ہوا ہے وہ اپنا روزہ مکمل کرے اور جس شخص نے روزہ نہیں رکھا ہوا تو اب وہ کچھ نہ کھائے کیونکہ آج عاشوراء کا دن ہے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حکیم بن جبیر ہے ابوزرعہ کہتے ہیں : اگر اللہ نے چاہا تو اس کا محل صدق ہو گا اس کے بارے میں بہت زیادہ کلام کیا گیا ہے ، اور اس کی نسبت کی جھوٹ کی طرف کی گئی ہے ۔

سیدنا عبادہ بن صامت رضی اللہ عنہ بیان کرتے ہیں : نبی اکرم صلی اللہ علیہ وسلم نے اسماء بن عبداللہ کو عاشوراء کے دن بھیجا اور ارشاد فرمایا : تم اپنی قوم کے پاس جاؤ اور ان میں سے جس شخص کو تم پاؤ کہ اس نے کچھ نہ کھایا ہو تو وہ روزہ رکھ لے اور جس شخص نے کچھ کھا لیا ہو اسے بھی روزہ رکھ لینا چاہے ( یعنی وہ بقیہ دن میں کچھ نہ کھائے ) ۔
یہ روایت امام طبرانی نے معجم کبیر میں نقل کی ہے ۔ اسحاق نامی راوی نے سیدنا عبادہ رضی اللہ عنہ کا زمانہ نہیں پایا ہے ۔

معبد قرشی بیان کرتے ہیں : نبی اکرم صلی اللہ علیہ وسلم قدید کے مقام پر موجود تھے ایک شخص آپ کے پاس آیا نبی اکرم صلی اللہ علیہ وسلم نے اس سے دریافت کیا : کیا تم نے آج کچھ کھایا ہے ۔ ( راوی بیان کرتے ہیں : ) یہ عاشوراء کے دن کی بات ہے اس شخص نے جواب دیا : جی نہیں میں نے صرف پانی پیا ہے نبی اکرم صلی اللہ علیہ وسلم نے فرمایا : اب تم سورج غروب ہونے تک کچھ نہ کھانا اپنے پیچھے موجود افراد کو بھی یہ ہدایت کر دو کہ وہ آج کے دن روزہ رکھیں ۔
یہ روایت امام طبرانی نے معجم کبیر میں نقل کی ہے ، اور اس کے رجال ثقہ ہیں ۔

عبداللہ بن ابوسعد بیان کرتے ہیں : ہم لوگ عاشوراء کے دن عائذ بن عمرو کی خدمت میں حاضر ہوئے تو انہوں نے فرمایا : اے غلام تم ان کے لئے دودھ دوہ لو ! وہ غلام اٹھ کر ایک بکری کے پاس گیا اس نے اس کا دودھ دوہ لیا پھر وہ ان لوگوں کے پاس آیا تو عائذ نے اپنے دائیں طرف موجود فرد سے کہا: تم پی لو اس نے کہا: میں نے روزہ رکھا ہوا ہے عائذ نے کہا: اللہ تعالیٰ ہماری طرف سے اور تمہاری طرف سے قبول کرے پھر انہوں نے دوسرے شخص سے کہا: تو اس نے بھی کہا: کہ میں نے روزہ رکھا ہوا ہے ، تو عائذ نے اس کی مانند کلمات کہے ۔ انہوں نے تیسرے سے کہا: تو اس نے اس کی مانند کلمات کہے ۔ انہوں نے دریافت کیا : کیا تم سب لوگوں نے روزہ رکھا ہوا ہے ؟ عنقریب ایسا ہو گا کہ تم اس دن کو رمضان کی مانند سمجھنا شروع کر دو گے ہم اس دن کا روزہ رمضان کا فرض لازم ہونے سے پہلے رکھا کرتے تھے ، جب رمضان ہم پر فرض ہو گیا تو رمضان کے روزے نے اس دن کے روزے کو منسوخ کر دیا تو آج کا دن نفلی روزے کا ہے فرض نہیں ہے ، جو شخص چاہے وہ روزہ رکھ لے اور جو شخص چاہے ، تو وہ روزہ ترک کر دے جب لوگوں نے یہ بات سنی تو ان سب نے روزہ ترک کر دیا ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی حشرج بن عبداللہ ہے میں نے کسی کو اس کے حالات بیان کرتے ہوئے نہیں پایا ہے ۔

سیدنا زید بن ثابت رضی اللہ عنہ بیان کرتے ہیں : عاشوراء کے دن سے مراد وہ دن نہیں ہے ، جس کے بارے میں لوگ یہ کہتے ہیں : یہ ایک ایسا دن ہے ، جس دن میں خانہ کعبہ کو غلاف پہنایا گیا اور حبشیوں نے نبی اکرم صلی اللہ علیہ وسلم کی موجودگی میں اس دن کرتب دکھائے تھے ، وہ قحط سالی میں گھوما کرتے تھے ، پہلے لوگ فلاں یہودی کے پاس جا کر اس سے سوال کرتے ( یعنی مانگتے ) تھے ، جب وہ یہودی مر گیا ، تو وہ لوگ سیدنا زید بن ثابت رضی اللہ عنہ کے پاس آئے اور انہوں نے ان سے سوال کیا ( یا کچھ مانگا ) ۔
یہ روایت امام طبرانی نے معجم کبیر میں نقل کی ہے ، اور مجھے یہ سمجھ نہیں آئی کہ اس کا مفہوم کیا ہے ۔ اس کی سند میں ایک راوی عبدالرحمن بن ابوزناد ہے ، اور اس کے بارے میں بہت زیادہ کلام کیا گیا ہے ویسے اس کی توثیق کی گئی ہے ۔

سیدنا عمار بن یاسر رضی اللہ عنہ فرماتے ہیں : رمضان کا حکم نازل ہونے سے پہلے ہمیں عاشوراء کا حکم دیا گیا تھا ، جب رمضان کا حکم نازل ہو گیا تو پھر ہمیں اس کا حکم نہیں دیا گیا ۔
یہ روایت امام طبرانی نے معجم کبیر میں نقل کی ہے ، اور اس کے رجال ” صحیح “ کے رجال ہیں ۔

قیس بن عبد بیان کرتے ہیں : میں سیدنا عبداللہ بن مسعود رضی اللہ عنہ کی خدمت میں ایک سال تک آتا جاتا رہا ہوں میں نے انہیں کبھی بھی چاشت کی نماز ادا کرتے ہوئے نہیں دیکھا اور کبھی بھی نفلی روزہ رکھتے ہوئے نہیں دیکھا البتہ عاشوراء کے دن کا معاملہ مختلف ہے ۔
یہ روایت امام طبرانی نے معجم کبیر میں نقل کی ہے ۔ قیس بن عبد کا ذکر ابن ابوحاتم نے کیا ہے شعبی جو ان کے بھتیجے ہیں ان کے علاوہ اور کسی نے ان سے روایت نقل نہیں کی ہے ۔

عبدالعزیز بن سعید اپنے والد کا یہ بیان نقل کرتے ہیں : سیدنا عثمان بن مطر رضی اللہ عنہ جنہیں صحابی ہونے کا شرف حاصل ہے وہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” رجب ایک عظیم مہینہ ہے ، جس میں اللہ تعالیٰ نیکیوں کا بدلہ کئی گنا دیتا ہے ، جو شخص رجب کے ایک دن روزہ رکھتا ہے ، تو گویا اس نے ایک سال روزہ رکھا اور جو شخص اس کے سات روزے رکھتا ہے اس کے لئے جہنم کے ساتوں دروازے بند کر دیے جاتے ہیں جو شخص اس کے آٹھ روزے رکھتا ہے اس کے لئے جنت کے آٹھوں دروازے کھول دیے جاتے ہیں جو شخص اس کے دس روزے رکھتا ہے وہ اللہ تعالٰی سے جو بھی چیز مانگے گا اللہ تعالیٰ وہ چیز اسے عطا کرے گا ، جو شخص اس کے پندرہ روزے رکھتا ہے ، تو آسمان میں ایک منادی اعلان کر کے یہ کہتا ہے تمہارے گزشتہ گناہوں کی مغفرت ہو گئی ہے اب تم نئے سرے سے عمل کرو جو شخص جتنا زیادہ کرتا ہے اللہ تعالی اسے مزید اجر و ثواب عطا کرتا ہے رجب کے مہینے میں اللہ تعالیٰ نے سیدنا نوح علیہ السلام کو کشتی پر سوار کرایا انہوں نے رجب کے روزے رکھے تھے ، اور اپنے ساتھیوں کو بھی روزہ رکھنے کا حکم دیا تھا ان کی کشتی سات ماہ تک چلتی رہی تھی اور پھر عاشوراء کے دن وہ جودی پہاڑ کے ساتھ آ کر لگ گئی تھی تو سیدنا نوح علیہ السلام نے اور ان کے ساتھیوں نے اور جانوروں نے اللہ تعالیٰ کا شکر ادا کرتے ہوئے روزہ رکھا تھا اور عاشوراء کے دن اللہ تعالیٰ نے بنی اسرائیل کے لئے سمندر ( دریائے نیل ) کو چیر دیا تھا اور عاشوراء کے دن اللہ تعالیٰ نے سیدنا آدم علیہ السلام کی اور سیدنا یونس علیہ السلام کے شہر والوں کی ، توبہ قبول کی تھی اور اسی دن میں سیدنا ابرہیم علیہ السلام پیدا ہوئے تھے “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عبدالغفور ہے ، اور وہ متروک ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” بنی اسرائیل کے لئے عاشوراء کے دن سمندر کو چیر دیا گیا تھا“ ۔
یہ روایت امام ابویعلیٰ نے نقل کی ہے ۔ اس کی سند میں ایک راوی یزید رقاشی ہے اس کے بارے میں کلام کیا گیا ہے ویسے اس کی توثیق کی گئی ہے ۔