مجمع الزوائد ومنبع الفوائد

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی نابینا کو چالیس ” ذراع “ ( یعنی دونوں ہاتھوں کے پھیلاؤ جتنی مقدار ) تک ساتھ لے کے چلتا ہے ، تو اسے غلام آزاد کرنے کا ثواب ملتا ہے “ ۔
یہ روایت امام طبرانی نے معجم اوسط میں نقل کی ہے ۔ اس کی سند میں ایک راوی یوسف بن عطیہ صفار ہے ، اور وہ متروک ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص چالیس قدم نابینا شخص کو ساتھ لے کے چلتا ہے اس کے لئے جنت واجب ہو جاتی ہے “ ۔
یہ روایت امام طبرانی نے معجم کبیر میں نقل کی ہے ، اور امام ابویعلیٰ نے نقل کی ہے ، اور اس کی سند میں ایک راوی علی بن عروہ ہے ، اور وہ کذاب ہے ۔

سیدنا عبداللہ بن عباس رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص کسی نابینا کو ساتھ لے کے چلتا ہے یہاں تک کہ اسے اس کی منزل تک پہنچا دیتا ہے ، تو اس شخص کے چالیس کبیرہ گناہوں کی مغفرت ہو جاتی ہے ، اور چار ایسے کبیرہ گناہوں کی مغفرت ہوتی ہے ، جو جہنم کو واجب کرتے ہیں “ ۔
یہ روایت امام طبرانی نے معجم کبیر میں نقل کی ہے ۔ اس کی سند میں ایک راوی عمر بن یحیی املی ہے میں نے کسی کو اس کے حالات بیان کرتے ہوئے نہیں پایا ہے ، اور اس کی سند میں ایک راوی علی بن یزید ہے ، جس کے بارے میں کلام کیا گیا ہے ۔