مجمع الزوائد ومنبع الفوائد

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” انسانوں میں سے ہر مسلمان جب صبح کرتا ہے ، تو اس پر صلوٰۃ لازم ہوتی ہے حاضرین میں سے ایک صاحب نے کہا: یہ تو بہت مشکل ہے کون اس کی طاقت رکھتا ہے نبی اکرم صلی اللہ علیہ وسلم نے ارشاد فرمایا : نیکی کا حکم دینا نماز ہے برائی سے روکنا نماز ہے کمزور شخص کے لئے وزن لاد دینا نماز ہے ہر وہ قدم جسے کوئی شخص اٹھا کر نماز کی طرف جاتا ہے وہ نماز ہے “ ۔

ایک روایت میں یہ الفاظ ہیں : ” اولاد آدم میں سے ہر مسلمان جب صبح کرتا ہے ، تو روزانہ اس پر صدقہ لازم ہوتا ہے “ ۔ یہ لفظ نماز کی جگہ استعمال ہوا ہے ۔
یہ روایت امام ابویعلیٰ امام بزار امام طبرانی نے معجم کبیر اور معجم اوسط میں نقل کی ہے ۔ معجم صغیر میں اس کی مانند نقل کی ہے ، اور اس میں یہ الفاظ زائد نقل کیے ہیں : ” ان سب کی جگہ چاشت کی دو رکعات کفایت کر جاتی ہیں “ ۔ امام ابویعلیٰ کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” ہر مسلمان پر روزانہ صدقہ دینا لازم ہوتا ہے ایک صاحب نے عرض کی : یا رسول اللہ ! کون اس کی طاقت رکھتا ہے ؟ نبی اکرم صلی اللہ علیہ وسلم نے ارشاد فرمایا : تمہارا راستے سے تکلیف دہ چیز کو ہٹا دینا صدقہ ہے تمہارا کسی شخص کی راستے کے بارے میں رہنمائی کر دینا صدقہ ہے تمہارا برائی سے روکنا صدقہ ہے تمہارا بیمار کی عیادت کرنا صدقہ ہے تمہارا جنازے کے ساتھ جانا صدقہ ہے مسلمان کا مسلمان کو سلام کا جواب دینا صدقہ ہے “ ۔

ایک روایت میں یہ الفاظ ہیں : نبی اکرم صلی اللہ علیہ وسلم نے ارشاد فرمایا : ” انسان میں تین سو ساٹھ ہڈیاں ہوتی ہیں ( راوی کو شک ہے شاید یہ الفاظ ہیں : ) تین سو تریسٹھ جوڑ ہوتے ہیں جن میں سے ہر ایک پر روزانہ صدقہ دینا لازم ہے ۔ لوگوں نے عرض کی : یا رسول اللہ ! جو شخص اس کی طاقت نہ پاتا ہو ؟ نبی اکرم صلی اللہ علیہ وسلم نے ارشاد فرمایا : وہ نیکی کا حکم دے اور برائی سے منع کرے لوگوں نے عرض کی : جو اس کی بھی استطاعت نہ رکھتا ہو نبی اکرم صلی اللہ علیہ وسلم نے ارشاد فرمایا : وہ راستے سے ہڈی کو اٹھا دے لوگوں نے عرض کی : جو شخص اس کی بھی استطاعت نہ رکھتا ہو نبی اکرم صلی اللہ علیہ وسلم نے ارشاد فرمایا : وہ راستے کے بارے میں لوگوں کی رہنمائی کر دے لوگوں نے عرض کی : جو شخص اس کی بھی استطاعت نہ رکھتا ہو نبی اکرم صلی اللہ علیہ وسلم نے فرمایا : وہ لوگوں کی مدد کر دے لوگوں نے عرض کی : جو شخص اس کی بھی استطاعت نہ رکھتا ہو نبی اکرم صلی اللہ علیہ وسلم نے فرمایا : وہ لوگوں کو اپنے شر سے بچا کے رکھے “ ۔
علامہ ہیثمی فرماتے ہیں : ) میں یہ کہتا ہوں : یہ روایت ” صحیح “ میں اختصار کے ساتھ منقول ہے ۔ یہ پوری روایت امام بزار نے نقل کی ہے ، اور اس کے رجال ” صحیح “ کے رجال ہیں ۔