مجمع الزوائد ومنبع الفوائد

سیدنا عبدالرحمن بن عوف رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزیں ہیں اس ذات کی قسم ! جس کے دست قدرت میں میری جان ہے اگر میں چاہوں تو ان پر حلف بھی اٹھا سکتا ہوں یہ کہ صدقہ سے مال میں کمی نہیں ہوتی تو تم لوگ صدقہ کیا کرو اور جب بھی کوئی بندہ کوئی زیادتی معاف کرتا ہے ، اور اس کا مقصد اللہ تعالیٰ کی رضا کا حصول ہو ، تو اللہ تعالیٰ قیامت کے دن اس کی وجہ سے اس کی عزت میں اضافہ کرے گا ، اور جو بندہ مانگنے کا دروازہ کھولتا ہے اللہ تعالٰی اس پر غربت کا دروازہ کھول دیتا ہے “ ۔
یہ روایت امام أحمد امام ابویعلیٰ اور امام بزار نے نقل کی ہے ۔ اس کی سند میں ایک راوی ایسا ہے ، جس کا نام یان نہیں کیا گیا ہے ۔ امام بزار نے اسے ایک اور سند کے ساتھ ابوسلمہ کے حوالے سے نقل کیا ہے ، اور یہ بات بیان کی ہے۔ یہ روایت مستند ہے باقی اللہ بہتر جانتا ہے ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جس شخص کے ساتھ کوئی زیادتی کی جائے اور پھر وہ اللہ تعالیٰ کی خاطر اسے چھوڑ دے تو اللہ تعالیٰ اس وجہ سے اس کی عزت میں اضافہ کرتا ہے ، اور تم لوگ صدقہ کرو کیونکہ صدقہ مال میں کمی نہیں کرتا بلکہ اس میں اضافہ کرتا ہے “ ۔
یہ روایت امام بزار نے نقل کی ہے ، اور اس کے ضعیف ہونے کی طرف انہوں نے اشارہ کیا ہے ۔

سیدہ ام سلمہ رضی اللہ عنہا بیان کرتی ہیں : نبی اکرم صلی اللہ علیہ وسلم نے ارشاد فرمایا : ” صدقہ سے مال کم نہیں ہوتا اور جب آدمی کوئی زیادتی معاف کرتا ہے ، تو اللہ تعالیٰ اس وجہ سے اس کی عزت میں اضافہ کرتا ہے ، تو تم معاف کر دیا کرو اللہ تعالیٰ تمہیں عزت عطا کرے گا ، اور جو شخص اپنی ذات کے حوالے سے مانگنے کا دروازہ کھولتا ہے اللہ تعالیٰ اس پر غربت کا دروازہ کھول دیتا ہے “ ۔
یہ روایت امام طبرانی نے معجم صغیر اور معجم اوسط میں نقل کی ہے ۔ اس کی سند میں ایک راوی زکریا بن دوید ہے ، اور وہ انتہائی ضعیف ہے ۔