مجمع الزوائد ومنبع الفوائد

نبی اکرم صلی اللہ علیہ وسلم ایک صحابی کے بارے میں یہ بات منقول ہے : وہ یہ پڑھتے تھے : ” اے اللہ ! تو سیدنا محمد صلی اللہ علیہ وسلم پر اور سیدنا محمد صلی اللہ علیہ وسلم کی آل بیت ( شاید یہاں لفظ اہل بیت ہونا چاہیے ، لیکن کتاب کے مطبوعہ نسخے میں بھی یہ لفظ اسی طرح مذکور ہے ) اور ان کی ازواج پر اور ان کی ذریت پر درود نازل فرما جس طرح تو نے آل ابراہیم پر درود نازل کیا بے شک تو لائق حمد ہے ، اور بزرگی کا مالک ہے ، اور تو سیدنا محمد صلی اللہ علیہ وسلم پر اور ان کے اہل بیت پر اور ان کی ازواج اور ان کی ذریت پر برکت نازل فرما جس طرح تو نے آل ابراہیم پر برکت نازل کی بے شک تو لائق حمد اور بزرگی کا مالک ہے “ ۔ ابن طاؤس بیان کرتے ہیں : میرے والد اس کی مانند پڑھا کرتے تھے :
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ۔

سیدنا بریدہ رضی اللہ عنہ بیان کرتے ہیں : ہم نے عرض کی : یا رسول اللہ ! یہ بات تو ہم نے جان لی ہے کہ آپ پر سلام کیسے بھیجنا ہے ، تو ہم آپ پر درود کیسے بھیجیں ؟ راوی بیان کرتے ہیں : نبی اکرم صلی اللہ علیہ وسلم نے فرمایا : تم لوگ یہ پڑھو : ” اے اللہ ! تو اپنا درود اور اپنی رحمت اور اپنی برکتیں سیدنا محمد صلی اللہ علیہ وسلم اور سیدنا محمد صلی اللہ علیہ وسلم کی آل کے لئے مقرر کر دے جس طرح تو نے اسے آل ابراہیم کے لئے مقرر کیا ہے بے شک تو لائق حمد ہے ، اور بزرگی کا مالک ہے “ ۔
یہ روایت امام أحمد نے نقل کی ہے ، اس کی سند میں ایک راوی ابوداؤد نابینا ہے ، اور وہ ” ضعیف “ ہے ۔

سیدنا ابوہریرہ رضی اللہ عنہ بیان کرتے ہیں : لوگوں نے نبی اکرم صلی اللہ علیہ وسلم سے دریافت کیا : ہم آپ پر درود کیسے بھیجیں ؟ نبی اکرم صلی اللہ علیہ وسلم نے فرمایا : تم لوگ یہ پڑھو : ” اے اللہ ! تو سیدنا محمد صلی اللہ علیہ وسلم پر درود نازل فرما اور سیدنا محمد صلی اللہ علیہ وسلم پر اور سیدنا محمد صلی اللہ علیہ وسلم کی آل پر برکت نازل فرما جس طرح تو نے آل ابراہیم پر درود اور برکت نازل کیا بے شک تو لائق حمد اور بزرگی کا مالک ہے “ ۔ ( پھر نبی اکرم صلی اللہ علیہ وسلم نے ارشاد فرمایا : ) سلام کا طریقہ وہ ہے ، جو تم جان چکے ہو
یہ روایت امام بزار نے نقل کی ہے ، اور اس کے رجال ” صحیح “ کے رجال ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” مجھ پر بکثرت درود بھیجو کیونکہ یہ تمہارے لئے پاکیزگی کا باعث ہو گا “ ۔
یہ روایت امام ابویعلیٰ نے نقل کی ہے ، اس کی سند میں ایک راوی لیث بن ابوسلیم ہے وہ ” ثقہ “ اور تدلیس کرنے والا ہے ۔

سیدنا عبداللہ بن مسعود رضی اللہ عنہ بیان کرتے ہیں : نبی اکرم صلی اللہ علیہ وسلم نے مجھے ( تشہد میں یہ کلمات پڑھنے کی ) تعلیم دی تھی : ” ہر طرح کی جسمانی زبانی اور مالی عبادات اللہ تعالی کے لئے مخصوص ہیں اے نبی آپ پر سلام ہو اللہ تعالیٰ کی رحمت اور برکتیں نازل ہوں ، ہم پر اور اللہ تعالیٰ کے تمام نیک بندوں پر سلام ہو میں اس بات کی گواہی دیتا ہوں کہ اللہ تعالی کے علاوہ اور کوئی معبود نہیں ہے ، اور میں اس بات کی گواہی دیتا ہوں کہ سیدنا محمد صلی اللہ علیہ وسلم اس کے بندے اور اس کے رسول ہیں اے اللہ ! تو سیدنا محمد صلی اللہ علیہ وسلم اور ان کے اہل بیت پر درود نازل فرما جس طرح تو نے سیدنا ابراہیم علیہ السلام پر درود نازل کیا بے شک تو لائق حمد ہے بزرگی کا مالک ہے اے اللہ ! تو ان کے ہمراہ ہم پر بھی درود نازل فرما اے اللہ ! تو سیدنا محمد صلی اللہ علیہ وسلم پر اور ان کے اہل بیت پر برکت نازل فرما جس طرح تو نے سیدنا ابراہیم علیہ السلام پر برکت نازل کی بے شک تو لائق حمد ہے بزرگی کا مالک ہے اے اللہ ! ان کے ہمراہ تو ہم پر بھی برکت نازل فرما اللہ تعالی کا درود اہل ایمان کا درود سیدنا محمد صلی اللہ علیہ وسلم پر نازل ہو جو امی نبی ہیں ، ان پر سلام ہو اللہ تعالٰی کی رحمتیں اور برکتیں ان پر نازل ہوں “ ۔ علامہ ہیثمی فرماتے ہیں : ) میں یہ کہتا ہوں : ” صحیح “ میں اس روایت میں سے صرف تشہد کا ذکر ہے ۔ نبی اکرم صلی اللہ علیہ وسلم پر درود بھیجنے کا ذکر نہیں ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبدالوہاب بن مجاہد ہے ، اور وہ ” ضعیف“ ہے ۔ ( علامہ ہیثمی فرماتے ہیں : ) میں یہ کہتا ہوں : نبی اکرم صلی اللہ علیہ وسلم پر درود بھیجنے کے بارے میں بہت سی احادیث منقول ہیں جو دعاؤں سے متعلق باب میں آگے آئیں گی اگر اللہ نے چاہا ۔