مجمع الزوائد ومنبع الفوائد

سیدنا سہل بن سعد انصاری رضی اللہ عنہ بیان کرتے ہیں : نبی اکرم صلی اللہ علیہ وسلم نماز میں دائیں طرف اور بائیں طرف سلام پھیرتے تھے یہاں تک کہ ہم آپ کے رخساروں کی سفیدی دیکھ لیتے تھے
یہ روایت امام أحمد نے نقل کی ہے ، اس کی سند میں ایک راوی ابن لہیعہ ہے ، اور اس کے بارے میں کلام کیا گیا ہے ۔

سیدنا طلق بن علی رضی اللہ عنہ بیان کرتے ہیں : نبی اکرم صلی اللہ علیہ وسلم دائیں طرف اور بائیں طرف سلام پھیرتے تھے یہاں تک کہ ہم آپ کے دائیں رخسار کی سفیدی اور بائیں رخسار کی سفیدی دیکھ لیتے تھے
یہ روایت امام أحمد نے اور امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

ایک دیہاتی نے اپنے والد کے حوالے سے یہ بات نقل کی ہے کہ انہوں نے نبی اکرم صلی اللہ علیہ وسلم کی اقتداء میں نماز ادا کی تو نبی اکرم صلی اللہ علیہ وسلم نے دائیں طرف اور بائیں طرف ( دونوں طرف ) سلام پھیرا ۔
یہ روایت امام أحمد نے نقل کی ہے ، اور اس کی سند میں ایک راوی ایسا ہے ، جس کا نام بیان نہیں کیا گیا ہے ۔

بسطام نے ایک دیہاتی کے حوالے سے یہ روایت نقل کی ہے ، جو ان کے ہاں مہمان کے طور پر ٹھہرے تھے کہ اس دیہاتی نے نبی اکرم صلی اللہ علیہ وسلم کی اقتداء میں نماز ادا کی تھی تو نبی اکرم صلی اللہ علیہ وسلم نے دو مرتبہ ( یعنی دونوں طرف ) سلام پھیرا تھا ۔
یہ روایت امام أحمد نے نقل کی ہے بسطام نامی یہ راوی بسطام بن نضر ہے ، استاد جمال الدین مزی نے ان کے شاگرد عمرو بن فروغ کے حالات میں ان کا ذکر اسی طرح کیا ہے یہ شریف الحسینی یہ سمجھتے ہیں کہ یہ شاید بسطام بن مسلم ہے انہوں نے ان کا ذکر نہیں کیا باقی اللہ بہتر جانتا ہے ۔ اس روایت کے بقیہ رجال ” ثقہ “ ہیں بسطام بن نضر کا ذکر ابن حبان نے کتاب ” الثقات“ میں کیا ہے ، اور انہوں نے ان صاحب کی دیہاتی کے حوالے سے نقل کردہ یہ روایت اسی طرح ذکر کی ہے ، جس طرح یہاں ذکر ہوئی ہے ۔

واسع بن حبان بیان کرتے ہیں : وہ مسجد میں کھڑے ہوئے نماز ادا کر رہے تھے ۔ سیدنا عبداللہ بن عمران کے سامنے موجود تھے انہوں نے مسجد کی قبلہ کی سمت والی دیوار کے ساتھ ٹیک لگا لی ہوئی تھی جب واسع نے نماز ختم کی تو وہ بائیں طرف سے اٹھ کر سیدنا عبداللہ بن عمر کے پاس گئے اور ان کے پاس جا کر بیٹھ گئے تو سیدنا عبداللہ بن عمر نے ان سے دریافت کیا : کہ تم دائیں طرف سے کیوں نہیں اُٹھے ؟ انہوں نے جواب دیا : اس لئے کیونکہ میں نے آپ کو دیکھ لیا تھا اس لئے میں اٹھ کر آپ کی طرف آ گیا تو سیدنا عبداللہ بن عمر نے فرمایا : تم نے ٹھیک کیا ہے کچھ لوگ یہ کہتے ہیں : جب تم نماز ادا کرو اور پھر اٹھنے لگو تو دائیں طرف سے اٹھو سیدنا عبداللہ بن عمر نے فرمایا : جب تم نماز ادا کرو اور اٹھنے لگو تو تم اگر دائیں طرف سے چاہو تو دائیں طرف سے اٹھ جاؤ اگر بائیں طرف سے چاہو تو اس طرف سے اٹھ جاؤ ۔
یہ روایت امام ابویعلیٰ نے نقل کی ہے ، اور اس کے رجال ” ثقہ “ ہیں ۔

سیدنا انس بن مالک رضی اللہ عنہ بیان کرتے ہیں : نبی اکرم صلی اللہ علیہ وسلم سیدنا ابوبکر رضی اللہ عنہ اور سیدنا عمر رضی اللہ عنہ ( بلند آواز میں ) قرأت کا آغاز الْحَمْدُ لِلَّهِ رَبِّ الْعَالَمِينَ سے کیا کرتے تھے ، اور ایک مرتبہ سلام پھیرتے تھے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں اس کا کچھ حصہ مذکور ہے ۔
یہ روایت امام بزار نے اور امام طبرانی نے معجم کبیر اور معجم اوسط میں نقل کی ہے ، جس میں ایک مرتبہ سلام پھیرنے کا ذکر ہے ، اس روایت کے رجال ” صحیح“ کے رجال ہیں ۔

سیدنا عمار بن یاسر بیان کرتے ہیں : نبی اکرم صلی اللہ علیہ وسلم دائیں طرف اور بائیں طرف سلام پھیرتے ہوئے السلام عَلَيْكُمْ و َرَحْمَةُ اللَّهِ السَّلَامُ عَلَيْكُمْ وَ رَحْمَةُ اللَّهِ کہا: کرتے تھے ۔
یہ روایت امام طبرانی نے معجم کبیر اور معجم اوسط میں نقل کی ہے ، اس کی سند میں ایک راوی ابوبکر بن عیاش ہے ، جس نے یہ روایت اہل کوفہ سے نقل کی ہے ، اور وہ راوی ” ضعیف “ ہے ان روایات کے بارے میں جو اس نے اپنے شہر کے علاوہ لوگوں سے نقل کی ہوں اس روایت کے بقیہ رجال ” ثقہ “ ہیں ۔

سیدنا عبداللہ بن عمر رضی اللہ عنہا بیان کرتے ہیں : نبی اکرم صلی اللہ علیہ وسلم دو مرتبہ ( یعنی دونوں طرف ) سلام پھیرتے تھے ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی بقیہ ہے ، جو ثقہ اور تدلیس کرنے والا ہے ، اس نے
یہ روایت معنعن روایت کے طور پر نقل کی ہے ۔

سیدنا ابورمثہ رضی اللہ عنہ بیان کرتے ہیں : میں نبی اکرم صلی اللہ علیہ وسلم کے ساتھ موجود تھا جب آپ نے نماز ادا کی تو آپ نے دائیں طرف سلام پھیرا اور بائیں طرف سلام پھیرا یہاں تک کہ ہم نے آپ کے رخسار کی چمک دیکھ لی ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی منہال بن خلیفہ ہے ، جسے ابن معین امام نسائی رحمہ اللہ اور امام ابن حبان رحمہ اللہ نے ضعیف قرار دیا ہے ، جب کہ ابوحاتم نے اسے ” ثقہ “ قرار دیا ہے امام بخاری رحمہ اللہ فرماتے ہیں : یہ صالح ہے ، لیکن اس میں غور و فکر کی گنجائش ہے ۔

عباس بن سہل بن سعد بیان کرتے ہیں : وہ ایک محفل میں موجود تھے جس میں ان کے والد موجود تھے ۔ سیدنا ابوہریرہ رضی اللہ عنہ تھے ۔ سیدنا ابواسید تھے ، اور سیدنا ابوحمید تھے ان حضرات نے نبی اکرم صلی اللہ علیہ وسلم کی نماز کا ذکر کیا تو انہوں نے یہ بات بھی ذکر کی کہ نبی اکرم صلی اللہ علیہ وسلم دائیں طرف اور بائیں طرف سلام پھیرا کرتے تھے ( علامہ ہیثمی فرماتے ہیں : ) میں یہ کہتا ہوں : سیدنا ابوحمید کے حوالے سے منقول حدیث ” صحیح “ میں مذکور ہے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ۔

سیدنا اوس بن اوس رضی اللہ عنہ بیان کرتے ہیں : ہم لوگ نصف مہینہ بی اکرم صلی اللہ علیہ وسلم کے ہاں مقیم رہے میں نے آپ کو ( نماز ادا کرنے کے بعد ) دائیں طرف سے بھی اٹھتے ہوئے دیکھا ہے ، اور بائیں طرف سے بھی اٹھتے ہوئے دیکھا ہے ، اور میں نے دیکھا کہ آپ کے جوتوں کے دو تسمے ہوتے تھے ۔
یہ روایت امام طبرانی نے معجم کبیر میں نقل کی ہے ، اور اس کے رجال کی توثیق کی گئی ہے ، اور اس کے ہمراہ اس کے بعض راویوں کے بارے میں اختلاف پایا جاتا ہے ۔

سیدنا اسماء بن حارثہ رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو ( نماز سے فارغ ہونے کے بعد ) بائیں طرف سے اٹھ کر اپنے گھر جاتے ہوئے دیکھا ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ہیثم بن عدی ہے ، اور وہ ضعیف ہے ، اس کی نسبت جھوٹ کی طرف کی گئی ہے ۔

سیدنا زید بن ارقم رضی اللہ عنہ بیان کرتے ہیں : نبی اکرم صلی اللہ علیہ وسلم نماز میں جب ہماری طرف سلام پھیرتے تھے تو ہم یہ کہتے تھے : وَ عَلَيْكُمُ السَّلَامُ و َرَحْمَةُ اللَّهِ وَ بَرَكَاتُهُ
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابراہیم بن مختار ہے ، جسے امام ابوداؤد اور ابوحاتم نے ” ثقہ “ قرار دیا ہے یحیی بن معین کہتے ہیں : یہ اتنے پائے کا نہیں ہے ، اس روایت کے بقیہ رجال ” ثقہ “ ہیں ۔

سیدنا انس بن مالک رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کی اقتداء میں نماز ادا کی آپ نے جیسے ہی سلام پھیرا تو آپ اٹھ گئے پھر میں نے سیدنا ابوبکر کی اقتداء میں نماز ادا کی انہوں نے جب سلام پھیرا تو وہ فورا اٹھ گئے یوں جیسے وہ کسی انگارے پر بیٹھے ہوئے ہوں
یہ روایت امام طبرانی نے معجم کبیر میں نقل کی ہے ، اس کی سند میں ایک راوی عبداللہ بن فروخ ہے ابراہیم جو زجانی بیان کرتے ہیں : اس کی نقل کردہ احادیث منکر ہوتی ہیں ابن ابومریم کہتے ہیں : وہ میرے نزدیک روئے زمین کا سب سے زیادہ پسندیدہ آدمی ہے ۔ ابن حبان نے اسے ” ثقہ “ قرار دیا ہے وہ بیان کرتے ہیں : یہ ( بعض اوقات دوسرے راویوں کے ) برخلاف روایت نقل کر دیتا ہے ، اس روایت کے بقیہ رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : جب امام سلام پھیر دے اور آدمی کوئی کام ہو ، تو وہ امام کا یہ انتظار نہ کرے کہ وہ سلام پھیرنے کے بعد لوگوں کی طرف رُخ کرے کیونکہ سلام پھیر کر نماز ختم ہو جاتی ہے ۔ سیدنا عبداللہ کا یہ معمول تھا جب وہ سلام پھیرتے تھے تو فورا اٹھ جاتے تھے یا اپنی جگہ تبدیل کر دیتے تھے یا لوگوں کی طرف رخ کر لیتے تھے
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

غالب بن فرقد بیان کرتے ہیں : سیدنا انس بن مالک رضی اللہ عنہ دائیں طرف اور بائیں طرف سلام پھیرتے ہوئے السَّلَام عَلَيْكُمْ وَرَحْمَةُ اللَّهِ کہا: کرتے تھے ۔ ( علامہ ہیثمی فرماتے ہیں : ) میں یہ کہتا ہوں : ” صحیح “ میں ان کے حوالے سے ایک ” مرفوع “ حدیث مذکور ہے ، جو اس کے علاوہ ہے ۔
یہ روایت امام طبرانی نے معجم کبیر میں نقل کی ہے غالب نامی راوی کے حالات بیان کرتے ہوئے میں نے کسی کو نہیں پایا ہے ۔