مجمع الزوائد ومنبع الفوائد

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اپنی اولاد کو نماز کی تعلیم دو ! جب وہ سات سال کے ہو جائیں اور ، جب وہ دس سال کے ہو جائیں ، تو نماز ( ترک کرنے ) کے حوالے سے اُن کی پٹائی کرو اور ان کے بستر الگ کر دو “ ۔
یہ روایت امام بزار نے نقل کی ہے ، اس کی سند میں ایک راوی محمد بن حسن عوفی ہے ، جس کے بارے میں یہ کہا: گیا ہے : یہ حدیث میں کمزور ہے یا اس کی مانند کلمات کہے گئے ہیں ، میں نے ایسے کسی شخص کو نہیں پایا ، جس نے اُس کی توثیق کی ہو ۔

سیدنا ابورافع رضی اللہ عنہ بیان کرتے ہیں : نبی اکرم صلی اللہ علیہ وسلم کے وصال کے بعد ، ہم نے نبی اکرم صلی اللہ علیہ وسلم کی تلوار کی میان میں ایک صحیفہ موجود پایا ، جس میں یہ تحریر تھا : ” اللہ تعالیٰ کے نام سے برکت حاصل کرتے ہوئے ، جو بڑا مہربان نہایت رحم کرنے والا ہے ، سات سال کی عمر میں بچوں اور بچیوں ، بھائیوں اور بہنوں کے بستر الگ کر دو ، اور نماز کی وجہ سے سات سال کی عمر میں ، اپنے بچوں کی پٹائی کرو ، وہ شخص ملعون ہے ، ملعون ہے ، جو اپنی قوم کے علاوہ کسی اور کی طرف نسبت کا دعوی کرے ( راوی کو شک ہے ، شاید یہ الفاظ ہیں : ) اپنے آزاد کرنے والے آقاؤں کی بجائے ، کسی اور کی طرف خود کو منسوب کرے ، اور وہ شخص ملعون ہے ، جو زمین کا کوئی بھی ٹکڑا ہتھیا لیتا ہے “ ۔ ( راوی بیان کرتے ہیں : ) اس کے ذریعے نبی اکرم صلی اللہ علیہ وسلم کی مراد یہ تھی کہ مسلمانوں کے راستے میں سے کوئی چیز ہتھیا لیتا ہے ۔
یہ روایت امام بزار نے نقل کی ہے ، اس کی سند میں یہ مذکور ہے : اسے عنسان بن عبیداللہ نے یوسف بن نافع سے روایت کیا ہے ، اور میں نے کسی کو ان دونوں کا ذکر کرتے ہوئے نہیں پایا ہے ۔

سیدنا عبداللہ بن خبیب رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا : ” جب بچے کو بائیں کے مقابلے میں دائیں کی سمجھ آنے لگے ، تو اُسے نماز کا حکم دو “ ۔
یہ روایت امام طبرانی نے معجم اوسط اور معجم صغیر میں نقل کی ہے ، معجم اوسط میں انہوں نے یہ بات بیان کی ہے : کہ یہ روایت نبی اکرم صلی اللہ علیہ وسلم کے حوالے سے صرف اسی سند کے ساتھ منقول ہے ، جب کہ معجم صغیر میں انہوں نے یہ بات نقل کی ہے : یہ روایت صرف سیدنا عبداللہ بن خبیب رضی اللہ عنہ سے منقول ہے ، اور اس کے رجال ” ثقہ “ ہیں ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” انہیں سات سال کی عمر میں نماز کا حکم دو ، اور تیرہ سال کی عمر میں نماز کے حوالے سے اُن کی پٹائی کرو ! “ ۔
یہ روایت امام طبرانی نے نقل کی ہے ، اس کی روایت میں ایک راوی داؤد بن محبر ہے ، جسے امام أحمد ، امام بخاری رحمہ اللہ اور ایک جماعت نے ضعیف قرار دیا ہے ، یحیی بن معین نے اسے ” ثقہ “ قرار دیا ہے ۔

ابوحوراء بیان کرتے ہیں : میں نے سیدنا امام حسن بن علی رضی اللہ عنہ سے دریافت کیا : آپ کو نبی اکرم صلی اللہ علیہ وسلم کے حوالے سے کیا بات یاد ہے ؟ انہوں نے جواب دیا : پانچ نمازیں یہ روایت امام طبرانی نے معجم کبیر میں نقل کی ہے ، جب کہ امام أحمد نے اسے قنوت سے متعلق حدیث کے ضمن میں نقل کیا ہے ،
اور اس روایت کے رجال ” ثقہ “ ہیں ۔

سیدنا عبداللہ بن مسعود رضی اللہ عنہ فرماتے ہیں : اپنے بچوں کو نماز کا عادی بناؤ ! اور انہیں بھلائی کا عادی بناؤ ! کیونکہ بھلائی عادت ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابونعیم ضرار بن صرد ہے ، اور وہ ” ضعیف“ ہے ۔