مجمع الزوائد ومنبع الفوائد

سیدنا عثمان غنی رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” جو شخص یہ بات جان لے ، کہ نماز حق اور واجب ہے ، وہ جنت میں داخل ہو گا “ ۔
یہ روایت عبداللہ بن أحمد نے اپنی ” زیادات “ میں نقل کی ہے ، اسے امام ابویعلیٰ نے بھی نقل کیا ہے ، تاہم انہوں نے یہ الفاظ نقل کیے ہیں : ” حق ہے ، لازم کی گئی ہے ، واجب ہے “ ۔ امام بزار نے اس کی مانند روایت نقل کی ہے ، اس کے رجال کی توثیق کی گئی ہے ۔

سیدہ عائشہ صدیقہ رضی اللہ عنہا بیان کرتی ہیں : انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے ، ہر دن اور رات میں ، بندوں پر پانچ نمازیں فرض قرار دی ہیں “ ۔
یہ روایت امام طبرانی نے معجم اوسط میں ، اپنے استاد محمد بن راشد کے حوالے سے نقل کی ہے ، میں اُن سے واقف نہیں ہوں رؤاد بن جراح نامی راوی کو امام أحمد نے ” ثقہ “ قرار دیا ہے ، اور ابن حبان نے بھی ” ثقہ “ قرار دیا ہے ، اس میں ضعف پایا جاتا ہے ، نماز کی فرضیت کے بارے میں ، احادیث آگے چل کر ، سفر کی نماز سے متعلق باب میں آئیں گی ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” بے شک اللہ تعالیٰ نے بندوں پر ، اُن کے دین کے حوالے سے ، سب سے پہلے اُن پر نماز فرض کی ہے ، اور آخری باقی رہ جانے والی چیز بھی نماز ہے ، بندے سے سب سے پہلے جس چیز کا حساب لیا جائے گا ، وہ نماز ہے ، اللہ تعالی ( فرشتوں سے ) فرمائے گا : میرے بندے کی نماز کا جائزہ لو ! اگر وہ مکمل ہوئی ، تو وہ مکمل نوٹ کی جائے گی ، اور اگر وہ ناقص ہوئی ، تو اللہ تعالیٰ فرمائے گا : تم اس بات کا جائزہ لو ! کہ کیا اس کی کوئی نفل نماز ہے ؟ اگر اس کی کوئی نفل نماز مل گئی ، تو نفل کے ذریعے اُس کے فریضے کو مکمل کر دیا جائے گا ، پھر اللہ تعالیٰ فرمائے گا : اس بات کا جائزہ لو ! کہ کیا اس کی زکوٰۃ مکمل ہے ؟ تو اگر اس بندے کی زکوٰۃ مکمل پائی گئی ، تو وہ مکمل نوٹ کی جائے گی ، اور اگر وہ ناقص ہوئی ، تو اللہ تعالیٰ فرمائے گا : اس بات کا جائزہ لو ! کہ کیا اس نے کوئی صدقہ کیا ہے ؟ اگر اس کا کوئی صدقہ ہوا ، تو صدقے کے ذریعے اس کی زکوٰۃ کو مکمل کیا جائے گا “ ۔
یہ روایت امام ابویعلیٰ نے نقل کی ہے ، اس کی سند میں ایک راوی یزید رقاشی ہے ، جسے شعبہ اور دیگر حضرات نے ضعیف قرار دیا ہے ، یحییٰ بن معین اور ابن عدی نے اسے ” ثقہ “ قرار دیا ہے ۔

سیدنا حنظلہ کاتب رضی اللہ عنہ بیان کرتے ہیں : میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص پانچ نمازوں ، اُن کے رکوع ، اُن کے سجود اور اُن کے اوقات کی حفاظت کرے گا ، اور یہ بات جان لے گا کہ یہ اللہ تعالیٰ کی طرف سے آنے والا حق ہے ، تو وہ شخص جنت میں داخل ہو گا ( راوی کو شک ہے ، یا شاید یہ الفاظ ہیں : ) اُس کے لئے جنت واجب ہو جائے گی ( راوی کو شک ہے ، یا شاید یہ الفاظ ہیں : ) وہ جہنم پر حرام ہو گا “ ۔
یہ روایت امام أحمد نے اور امام طبرانی نے معجم کبیر میں نقل کی ہے امام أحمد کے رجال ” صحیح “ کے رجال ہیں ۔

سیدنا عبداللہ بن عباس رضی اللہ عنہما بیان کرتے ہیں : بنو سعد بن بکر نے ضمام بن ثعلبہ کو وافد ( یعنی نمائندے کے طور پر ) نبی اکرم صلی اللہ علیہ وسلم کی خدمت میں بھیجا ، وہ نبی اکرم صلی اللہ علیہ وسلم کی خدمت میں حاضر ہوا ، اُس نے مسجد کے دروازے پر اپنے اونٹ کو بٹھایا اور پھر اُسے باندھ دیا ، پھر وہ مسجد میں داخل ہوا ، نبی اکرم صلی اللہ علیہ وسلم اس وقت اپنے اصحاب کے درمیان تشریف فرما تھے ، ضمام ایک ایسا شخص تھا ، جس کے بال زیادہ تھے ، اور اس نے زلفیں رکھی ہوئی تھیں ، وہ آیا اور نبی اکرم صلی اللہ علیہ وسلم کے اصحاب کے درمیان موجود ، نبی اکرم صلی اللہ علیہ وسلم کے پاس آ کر ٹھہر گیا ، اُس نے دریافت کیا : آپ لوگوں میں سے جناب عبدالمطلب کے صاحبزادے کون ہیں ؟ نبی اکرم صلی اللہ علیہ وسلم نے ارشاد فرمایا : میں عبدالمطلب کا صاحبزادہ ہوں ، اُس نے دریافت کیا : آپ سیدنا محمد صلی اللہ علیہ وسلم ہیں ؟ نبی اکرم صلی اللہ علیہ وسلم نے جواب دیا : جی ہاں ! اس نے کہا: جناب عبدالمطلب کے صاحبزادے ! میں آپ سے کچھ پوچھنا چاہتا ہوں ، سوال کرتے ہوئے میرے لہجے میں سختی ہو سکتی ہے ، تو آپ اس بات کا برا نہ منائیے گا ، نبی اکرم صلی اللہ علیہ وسلم نے فرمایا : میں برا نہیں مناؤں گا ، تمہیں جو مناسب لگتا ہے ، تم پوچھو ! اس نے کہا: میں آپ کو اس اللہ کا واسطہ دے کر دریافت کرتا ہوں ، جو آپ کا معبود ہے ، اور آپ سے پہلے والوں کا معبود ہے ، اور آپ کے بعد جو لوگ بھی ہوں گے ، اُن کا معبود ہے ، کیا اللہ تعالیٰ نے آپ کو ہماری طرف رسول بنا کر مبعوث کیا ہے ؟ نبی اکرم صلی اللہ علیہ وسلم نے فرمایا : اللہ جانتا ہے ، جی ہاں ! اس نے کہا: میں آپ کو اس اللہ کا واسطہ دے کر دریافت کرتا ہوں ، جو آپ کا بھی معبود ہے ، اور ہر اس فرد کا معبود ہے ، جو آپ کے بعد ہو گا ، کیا اللہ تعالیٰ نے آپ کو یہ حکم دیا ہے کہ آپ ہمیں اس بات کا حکم دیں کہ ہم اُسی کی عبادت کریں اور کسی کو اس کا شریک نہ ٹھہرائیں ، اور اپنے ان باطل معبودوں سے الگ ہو جائیں ، جن کی ہمارے آباؤ اجداد ، اللہ تعالیٰ کے ہمراہ عبادت کیا کرتے تھے ؟ نبی اکرم صلی اللہ علیہ وسلم نے ارشاد فرمایا : اللہ جانتا ہے ، ایسا ہی ہے ، اُس نے کہا: میں آپ کو اُس اللہ کا واسطہ دے کر دریافت کرتا ہوں ، جو آپ کا معبود ہے ، اور آپ سے پہلے والوں کا اور آپ کے بعد جتنے بھی ہوں گے ، اُن کا معبود ہے ، کیا اللہ تعالیٰ نے آپ کو یہ حکم دیا ہے کہ آپ نے یہ پانچ نمازیں ادا کرنی ہیں ؟ نبی اکرم صلی اللہ علیہ وسلم نے فرمایا : اللہ جانتا ہے ، جی ہاں ! راوی بیان کرتے ہیں : پھر اُس شخص نے اسلام کے فرائض کو ایک ، ایک کر کے ذکر کیا ، زکوۃ ، روزوں ، حج اور شریعت کے تمام بنیادی احکام کا ذکر کیا اور ہر فرض کا ذکر کرتے ہوئے ، اُس نے نبی اکرم صلی اللہ علیہ وسلم کو اللہ کا واسطہ دیا ، اور جس طرح اُس سے پہلے والے فرض کے بارے میں ، اُس نے نبی اکرم صلی اللہ علیہ وسلم کو واسطہ دے کر دریافت کیا تھا ، جب وہ اس بات سے فارغ ہوا ، تو وہ بولا: کہ میں اس کی بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، اور میں اس بات کی گواہی دیتا ہوں کہ سیدنا محمد صلی اللہ علیہ وسلم اللہ کے رسول ہیں ، میں آگے چل کر یہ فرائض سرانجام دوں گا ، اور آپ نے مجھے جن چیزوں سے منع کیا ہے ، اُن سے اجتناب کروں گا میں ان احکام میں کوئی کمی یا کوئی اضافہ نہیں کروں گا ، راوی کہتے ہیں : پھر وہ اپنے اونٹ کی طرف جانے کے لئے مڑ گیا ۔ راوی بیان کرتے ہیں : جب وہ مڑ گیا ، تو نبی اکرم صلی اللہ علیہ وسلم نے ارشاد فرمایا : اگر یہ زلفوں والا شخص سچ کہہ رہا ہے ، تو یہ جنت میں داخل ہو گا “ ۔ راوی بیان کرتے ہیں : وہ شخص اپنے اونٹ کے پاس آیا ، اُس نے اپنے اونٹ کی رسی کھولی ، پھر وہ وہاں سے روانہ ہوا ، یہاں تک کہ وہ اپنی قوم کے پاس آیا ، لوگ اکھٹے ہو کر اس کے پاس آئے ، تو اس نے جو سب سے پہلی بات کی وہ یہ کہی : لات اور عزیٰ بہت برے ہیں ، اُن لوگوں نے کہا: اے ضمام رک جاؤ ! تم برص اور جذام سے بچ کے رہو ! تم جنون سے بچ کے رہو ! اُس نے کہا: تم لوگوں کا ستیاناس ہو ، اللہ کی قسم ! یہ دونوں نہ تو کوئی نقصان دے سکتے ہیں ، اور نہ کوئی نفع دے سکتے ہیں ، اللہ تعالیٰ نے رسول کو مبعوث کیا ہے ، اور ان پر کتاب نازل کی ہے ، تاکہ وہ اُس رسول کے ذریعے تمہیں اس چیز ( یعنی شرک ) سے بچائے ، جس میں تم مبتلا ہو ، میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے ، صرف وہی معبود ہے ، اُس کا کوئی شریک نہیں ہے ، اور سیدنا محمد صلی اللہ علیہ وسلم اس کے بندے اور اس کے رسول ہیں ، میں ان کے پاس سے تمہارے پاس وہ چیز لے کے آیا ہوں ، جس کا انہوں نے تمہیں حکم دیا ہے ، اور جس چیز سے انہوں نے تمہیں منع کیا ہے ۔ راوی بیان کرتے ہیں : اللہ کی قسم ! اس دن شام ہونے سے پہلے ، وہاں جتنے بھی مرد اور عورت موجود تھے ۔ ان میں سے ہر ایک مسلمان ہو گیا ۔ سیدنا عبداللہ بن عباس رضی اللہ عنہما بیان کرتے ہیں : کسی بھی قوم کے نمائندے کے بارے میں ، ہم نے یہ نہیں سنا ، جو ضمام سے زیادہ فضیلت رکھتا ہو ۔ ( علامہ ہیثمی فرماتے ہیں : ) ” اطراف “ کے مصنف نے اس روایت کی نسبت امام ابوداؤد کی طرف کی ہے ، لیکن میں نے سنن ابوداؤد میں یہ روایت نہیں پائی ، اس کا صرف ابتدائی حصہ پایا ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، امام أحمد کے رجال کی توثیق کی گئی ہے ۔

سیدنا عبداللہ بن عباس رضی اللہ عنہما بیان کرتے ہیں : بنو سعد بن بکر سے تعلق رکھنے والا ایک دیہاتی ، نبی اکرم صلی اللہ علیہ وسلم کی خدمت میں حاضر ہوا اور بولا: اسے اولاد عبدالمطلب سے تعلق رکھنے والے نوجوان ! آپ پر سلام ہو ، نبی اکرم صلی اللہ علیہ وسلم نے اس سے فرمایا : تم پر بھی سلام ہو ، اس نے کہا: میں آپ کے ننھیالی عزیز بنو سعد بن بکر سے تعلق رکھنے والا شخص ہوں ، اور میں اپنی قوم کے قاصد اور اُن کے نمائندے کے طور پر آپ کے پاس آیا ہوں ، میں آپ سے کچھ سوالات کروں گا ، آپ سے کیے جانے والے سوالات میں ، لہجہ تیز ہو سکتا ہے ، اور آپ کے ساتھ ہونے والے مکالمے میں کچھ شدت ہو سکتی ہے ، نبی اکرم صلی اللہ علیہ وسلم نے اس سے فرمایا : اے بنو سعد سے تعلق رکھنے والے فرد ! تم بولو ! اس نے دریافت کیا : آپ کو کس نے پیدا کیا ہے ، اور آپ سے پہلے لوگوں کو کس نے پیدا کیا ہے ؟ اور آپ کے بعد والوں کو پیدا کرنے والا کون ہے ؟ نبی اکرم صلی اللہ علیہ وسلم نے جواب دیا : اللہ تعالی اس نے کہا: پھر میں آپ کو اسی کا واسطہ دے کر دریافت کرتا ہوں ، کہ کیا آپ کو اس نے مبعوث کیا ہے ؟ نبی اکرم صلی اللہ علیہ وسلم نے جواب دیا : جی ہاں ! اس نے دریافت کیا : سات آسمانوں اور سات زمینوں کو کس نے پیدا کیا ہے ؟ اور ان کے درمیان رزق کس نے جاری کیا ہے ؟ نبی اکرم صلی اللہ علیہ وسلم نے جواب دیا : اللہ تعالیٰ نے ، اُس نے کہا: پھر میں آپ کو اسی کا واسطہ دے کر یہ دریافت کرتا ہوں ، کیا اُسی نے آپ کو مبعوث کیا ہے ؟ نبی اکرم صلی اللہ علیہ وسلم نے جواب دیا : جی ہاں ! اُس نے کہا: آپ کے مکتوب میں ہم نے یہ بات پائی ہے ، اور آپ کے قاصدوں نے ہمیں یہ حکم دیا ہے : کہ ہم دن اور رات میں پانچ نمازیں ان کے مخصوص اوقات میں ادا کریں ، میں آپ کو اُسی ذات کا واسطہ دے کر دریافت کرتا ہوں ، کہ کیا اُس نے آپ کو اس چیز کا حکم دیا ہے ؟ نبی اکرم صلی اللہ علیہ وسلم نے جواب دیا : جی ہاں ! اس شخص نے کہا: ہم نے آپ کے مکتوب میں یہ بات پائی ہے ، اور آپ کے قاصدوں نے ہمیں یہ حکم دیا ہے : کہ ہم رمضان کے مہینے کے روزے رکھیں ، تو میں آپ کو اُسی ذات کا واسطہ دے کر دریافت کرتا ہوں ؛ کیا اُس نے آپ کو اس بات کا بھی حکم دیا ہے ؟ نبی اکرم صلی اللہ علیہ وسلم نے جواب دیا : جی ہاں ! اُس نے کہا: ہم نے آپ کے مکتوب میں یہ بات پائی ہے ، اور آپ کے قاصدوں نے ہمیں یہ بات بتائی ہے : کہ ہم اپنے اموال میں سے کچھ حصہ لے کر اُسے اپنے غریبوں میں تقسیم کر دیں ، میں آپ کو اسی ذات کا واسطہ دے کر دریافت کرتا ہوں : کیا اُس نے آپ کو اس کا حکم دیا ہے ؟ نبی اکرم صلی اللہ علیہ وسلم نے جواب دیا : جی ہاں ! اس نے کہا: جہاں تک پانچویں چیز کا تعلق ہے ، تو اس کے بارے میں ، میں آپ سے سوال نہیں کروں گا ، اور نہ ہی اس بات میں مجھے دلچسپی ہے ، راوی کہتے ہیں : اس کی مراد ” فواحش “ تھی ، پھر اُس نے کہا: اُس ذات قسم ! جس نے آپ کو حق کے ہمراہ مبعوث کیا ہے ، میں اُن چیزوں پر عمل کروں گا ، اور میری قوم میں سے ، جو شخص بھی میری اطاعت کرے گا ، وہ بھی اس پر عمل کرے گا ، پھر وہ شخص واپس چلا گیا ، تو نبی اکرم صلی اللہ علیہ وسلم مسکرا دیئے ، یہاں تک کہ آپ صلی اللہ علیہ وسلم کے اطراف کے دانت نظر آنے لگے ، پھر آپ صلی اللہ علیہ وسلم نے ارشاد فرمایا : اگر یہ سچ کہہ رہا ہے ، تو یہ ضرور جنت میں داخل ہو گا ۔
یہ روایت امام طبرانی نے معجم کبیر اور مجم اوسط میں نقل کی ہے ، اس کی سند میں ایک راوی عطاء بن سائب ہے ، اور وہ ” ثقہ “ ہے ، لیکن وہ اختلاط کا شکار ہو گیا تھا ۔

سیدنا ابوطفیل عامر بن واثلہ رضی اللہ عنہ بیان کرتے ہیں : ایک شخص کا گزر ، کچھ لوگوں کے پاس سے ہوا ، اُس نے ان کو سلام کیا ، لوگوں نے اُسے جواب دیا : جب وہ اُن لوگوں سے آگے چلا گیا ، تو ان افراد میں سے ایک شخص نے یہ کہا: اللہ کی قسم ! میں اللہ تعالیٰ کی ذات کی خاطر ، اس شخص کو ناپسند کرتا ہوں ، حاضرین محفل نے کہا: اللہ کی قسم ! تم نے بری بات کہی ہے ، اللہ کی قسم ! میں اس شخص کو اس بارے میں ضرور بتاؤں گا ، پھر انہوں نے اپنے میں سے ایک فرد سے یہ کہا: اے فلاں ! تم اُٹھو اور اسے اس بارے میں بتا دو ! ان لوگوں کا قاصد دوسرے شخص کے پاس گیا ، اور اس شخص کے قول کے بارے میں اسے بتایا ، تو وہ شخص مڑا ، اور نبی اکرم صلی اللہ علیہ وسلم کی خدمت میں حاضر ہوا ، اس نے عرض کی : یا رسول اللہ ! میں مسلمانوں کی ایک محفل کے پاس سے گزرا ، جن میں فلاں شخص موجود تھا ، میں نے ان لوگوں کو سلام کیا ، اُن لوگوں نے سلام کا جواب دیا : ، جب میں ان لوگوں سے آگے چلا گیا ، تو اُس کے بعد اُن میں سے ایک شخص میرے پاس آیا اور اس نے مجھے بتایا : فلاں شخص نے یہ کہا: ہے : اللہ کی قسم ! میں اللہ کی ذات کی خاطر اس شخص سے بغض رکھتا ہوں یا رسول اللہ ! آپ اُسے بلوائیے اور اس سے دریافت کیجئے کہ وہ کس وجہ سے مجھ سے بغض رکھتا ہے ؟ نبی اکرم صلی اللہ علیہ وسلم نے اس دوسرے شخص کو بلوایا اور اس سے اس چیز کے بارے میں دریافت کیا : جو پہلے شخص نے آپ صلی اللہ علیہ وسلم کو بتایا تھا ، تو دوسرے شخص نے اس بات کا اعتراف کر لیا ، اس نے عرض کی : یا رسول اللہ ! میں نے اس شخص کے لئے یہ بات کہی ہے ، نبی اکرم صلی اللہ علیہ وسلم نے فرمایا : تم کیوں اس سے بغض رکھتے ہو ؟ اس دوسرے شخص نے جواب دیا : میں اس کا پڑوسی ہوں ، اور میں اس کے بارے میں بتاتا ہوں ، اللہ کی قسم ! میں نے اسے کبھی نماز ادا کرتے ہوئے نہیں دیکھا ، یہ صرف فرض نماز ادا کرتا ہے ، جسے ہر نیک اور گنہگار پڑھ لیتا ہے ، تو پہلے شخص نے کہا: یا رسول اللہ ! آپ اس سے یہ پوچھ لیں کہ کیا اس نے مجھے کبھی دیکھا ہے کہ میں نے نماز کو اس کے مخصوص وقت سے تاخیر سے ادا کیا ہو ؟ یا میں نے نماز کے لئے وضو کرتے ہوئے غلطی کی ہو ؟ یا نماز کے دوران رکوع ، یا سجدے میں غلطی کی ہو ؟ نبی اکرم صلی اللہ علیہ وسلم نے دوسرے شخص سے دریافت کیا : تو اس نے جواب دیا : جی نہیں ! اللہ کی قسم ! ( یعنی میں نے اسے کبھی ایسا کرتے ہوئے نہیں دیکھا ) پھر اس دوسرے شخص نے کہا: اللہ کی قسم ! میں نے اسے کبھی ( کوئی نفلی روزہ رکھتے ہوئے نہیں دیکھا ، یہ صرف اس مخصوص مہینے کے روزے رکھتا ہے ، جس کے روزے ہر نیک اور گنہگار رکھ لیتا ہے ، تو پہلے شخص نے کہا: یا رسول اللہ ! آپ اس سے یہ پوچھیے کہ کیا اس نے مجھے کبھی ایسا کرتے ہوئے دیکھا ہے کہ میں نے روزے کے بارے میں افراط سے کام لیا ہو ؟ یا روزے کے حق کے حوالے سے کوئی کمی کی ہو ؟ نبی اکرم صلی اللہ علیہ وسلم نے دوسرے شخص سے دریافت کیا : تو اُس نے جواب دیا : جی نہیں ! ( یعنی میں نے اسے کبھی ایسا کرتے ہوئے نہیں دیکھا ) پھر اس دوسرے شخص نے کہا: اللہ کی قسم ! میں نے اسے کبھی کسی مانگنے والے کو کچھ دیتے ہوئے نہیں دیکھا ، اور نہ ہی میں نے اسے کبھی اپنے مال میں سے ، اللہ کی راہ میں کوئی چیز خرچ کرتے ہوئے دیکھا ہے ، البتہ اس زکوٰۃ کا معاملہ مختلف ہے ، جسے ہر نیک اور گنہگار شخص ادا کرتا ہے ، تو پہلے شخص نے کہا: یا رسول اللہ ! ! آپ اس سے پوچھیے ! کہ کیا میں نے زکوٰۃ میں سے کوئی چیز چھپائی ہے ؟ یا میں نے زکوٰۃ وصول کرنے والے شخص کے ساتھ کبھی کوئی جھگڑا کیا ہے ؟ راوی بیان کرتے ہیں : نبی اکرم صلی اللہ علیہ وسلم نے دوسرے شخص سے اس بارے میں دریافت کیا : تو اس نے جواب دیا : جی نہیں ! تو نبی اکرم صلی اللہ علیہ وسلم نے اس سے فرمایا : تم اُٹھ جاؤ ! میں یہ سمجھتا ہوں کہ یہ شخص تم سے زیادہ بہتر ہے ۔
یہ روایت امام أحمد نے اور امام طبرانی نے معجم کبیر میں نقل کی ہے ، اور امام أحمد کے رجال ” ثقہ “ اور ثبت ہیں ۔

سیدنا نعمان بن قوقل رضی اللہ عنہ بیان کرتے ہیں : وہ نبی اکرم صلی اللہ علیہ وسلم کی خدمت میں حاضر ہوئے ، انہوں نے عرض کی : یا رسول اللہ ! ! اس بارے میں آپ کی کیا رائے ہے ؟ اگر میں فرض نماز ادا کروں ، رمضان کے روزے رکھوں ، حرام کو حرام سمجھوں ، حلال کو حلال سمجھوں اور میں اس پر کوئی اضافہ نہ کروں ، تو کیا میں جنت میں داخل ہو جاؤں گا ؟ نبی اکرم صلی اللہ علیہ وسلم نے ارشاد فرمایا : جی ہاں ! تو ان صاحب نے کہا: اللہ کی قسم ! میں اس میں کوئی اضافہ نہیں کروں گا ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابن لہیعہ ہے ، اور وہ ضعیف ہے ، اور یہ روایت ” صحیح “ میں سیدنا جابر رضی اللہ عنہ سے منقول حدیث ہونے کے طور پر مذکور ہے ۔

سیدنا ابودرداء رضی اللہ عنہ بیان کرتے ہیں : انصار سے تعلق رکھنے والے ایک شخص نے یہ حلف اٹھایا کہ وہ کبھی بھی کوئی نفلی کام نہیں کرے گا ، اور اللہ تعالیٰ نے ، جو چیز اس پر فرض قرار دی ہے ، اس میں سے کچھ بھی ترک نہیں کرے گا ، تو نبی اکرم صلی اللہ علیہ وسلم نے ارشاد فرمایا : کیا تم لوگ ایک ایسے شخص پر اعتراض کر رہے ہو ، کہ اگر وہ اللہ کے نام پر قسم اٹھا لے ، تو اللہ تعالی اس بات کو پورا کر دے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی صدقہ بن عبداللہ سمین ہے ، جسے امام أحمد اور ایک جماعت نے ضعیف قرار دیا ہے ، جب کہ دحیم اور ابوحاتم نے اسے ” ثقہ “ قرار دیا ہے ۔

عبدالرحمن بن معاویہ بن خدیج بیان کرتے ہیں : میں نے کندہ سے تعلق رکھنے والے ایک شخص کو یہ بیان کرتے ہوئے سنا ہے : وہ کہتا ہے : میں نے انصار سے تعلق رکھنے والے ایک صحابی کو یہ حدیث بیان کرتے ہوئے سنا ہے : وہ فرماتے ہیں : اُنہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” جو شخص اپنی نماز میں کوئی کمی کرے گا ، تو اللہ تعالیٰ اُس کمی کو اُس کے نوافل میں سے مکمل کر دے گا“ ۔
یہ روایت امام أحمد نے نقل کی ہے ، اس کی سند میں ایک راوی ایسا ہے ، جس کا نام بیان نہیں کیا گیا ہے ۔

یحییٰ بن یعمر نے ، ایک صحابی کے حوالے سے ، نبی اکرم صلی اللہ علیہ وسلم کا یہ فرمان نقل کیا ہے : ” بندے سے ، سب سے پہلے اس کی نماز کے حوالے سے حساب لیا جائے گا ، اگر وہ مکمل ہو گی ، تو اسے مکمل نوٹ کیا جائے گا ، اور اگر وہ مکمل نہیں ہو گی ، تو اللہ تعالی ( فرشتوں سے ) یہ فرمائے گا : کہ کیا تم میرے بندے کی کوئی نفل نماز پاتے ہو ؟ جس کے ذریعے تم فرض نماز کو مکمل کر دو ، پھر زکوٰۃ کا معاملہ بھی اسی طرح ہو گا ، اور پھر دیگر تمام اعمال کا معاملہ بھی اس طرح ہو گا“ ۔
علامہ ہیثمی بیان کرتے ہیں : میں یہ کہتا ہوں : یہ روایت امام نسائی رحمہ اللہ نے یحییٰ بن یعمر کے حوالے سے سیدنا ابوہریرہ رضی اللہ عنہ سے اس کی مانند نقل کی ہے ، مجھے نہیں معلوم کہ کیا وہ یہی حدیث ہے ؟ یا اس کے علاوہ کوئی اور ہے ؟ اس روایت کو امام أحمد نے سیدنا ابوہریرہ رضی اللہ عنہ کے علاوہ ایک اور شخص کے حوالے سے نقل کیا ہے ، اور اس روایت کے رجال ” صحیح “ کے رجال ہیں ۔

سیدنا عائذ بن قرط رضی اللہ عنہ بیان کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص نماز ادا کرے اور اسے مکمل نہ کرے ، تو اس کے نوافل میں سے ، اس کی ( نماز ) میں اضافہ کیا جائے گا ، یہاں تک کہ وہ ( فرض نماز ) مکمل ہو جائے گی“ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا عبداللہ بن قرط رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص نماز ادا کرے ، اور اسے مکمل ادا نہ کرے ، تو اس کے نوافل میں سے اُس ( فرض نماز ) میں اضافہ کیا جائے گا “ ۔
یہ روایت امام طبرانی نے معجم کبیر میں نقل کی ہے ، اور اس کے رجال ” ثقہ “ ہیں ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” قیامت کے دن ، بندے سے سب سے پہلے نماز کے بارے میں حساب لیا جائے گا ، اگر وہ ٹھیک ہو گی ، تو اس بندے کے دیگر تمام اعمال بھی ٹھیک ہوں گے ، اور اگر وہ خراب ہو گی ، تو اُس کے دیگر تمام اعمال بھی خراب ہوں گے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی قاسم بن عثمان ہے ، امام بخاری رحمہ اللہ فرماتے ہیں : اس کے حوالے سے ایسی احادیث منقول ہیں ، جن کی متابعت نہیں کی گئی ہے ، ابن حبان نے اس راوی کا تذکرہ کتاب ” الثقات “ میں کیا ہے ، اور یہ بات بیان کی ہے : یہ بعض اوقات غلطی کر جاتا ہے ۔

سیدنا انس رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” قیامت کے دن ، بندے سے سب سے پہلے جس چیز کے بارے میں سوال کیا جائے گا ، وہ یہ ہے کہ اُس کی نماز کا جائزہ لیا جائے گا ، اگر وہ ٹھیک ہوئی ، تو وہ بندہ کامیاب ہو جائے گا ، اور اگر وہ خراب ہوئی ، تو وہ بندہ رُسوائی اور خسارے کا شکار ہو جائے گا “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی خلید بن علج ہے ، جسے امام أحمد ، امام نسائی رحمہ اللہ اور امام دارقطنی رحمہ اللہ نے ضعیف قرار دیا ہے ، اور امام ابن عدی رحمہ اللہ کہتے ہیں : اس کی نقل کردہ زیادہ تر احادیث کی دیگر راویوں نے متابعت کی ہے ۔

حسن بصری نے ، سیدنا ابوہریرہ کے حوالے سے یہ بات نقل کی ہے : ( راوی بیان کرتے ہیں : ) میرا خیال ہے انہوں نے اسے نبی اکرم صلی اللہ علیہ وسلم کے حوالے سے ذکر کیا ہے ( یعنی نبی اکرم صلی اللہ علیہ وسلم نے یہ ارشاد فرمایا ہے : ) ” غلام بندے سے ، اُس کی نماز کے بارے میں حساب لیا جائے گا ، جب اس میں کوئی کمی ہو گی ، تو اس سے کہا: جائے گا : تم نے اس میں کیوں کمی کی ؟ تو وہ عرض کرے گا : اے میرے پروردگار ! ! تو نے مجھ پر ایک ایسا فرض مسلط کر دیا تھا ، جس نے مجھے نماز سے غافل کر دیا تھا ، تو اللہ تعالیٰ فرمائے گا : میں نے تمہیں دیکھا تھا کہ تم اس کے ( یعنی اپنے مالک کے ) مال میں سے ، اپنی ذات کے لئے چوری کر لیتے تھے ، تو کیا تم اپنے عمل میں سے ، اپنی ذات کے لئے چوری نہیں کر سکتے تھے ؟ ( نبی اکرم صلی اللہ علیہ وسلم نے ارشاد فرمایا : ) تو اس کے خلاف اللہ تعالیٰ کی حجت لازم ہو جائے گی “ ۔
یہ روایت امام أحمد نے نقل کی ہے ، اس کی سند میں ایک راوی مبارک بن فضالہ ہے ، جسے عثمان ، امام أحمد اور ایک جماعت نے ” ثقہ “ قرار دیا ہے ، اس سے استدلال کرنے کے بارے میں اختلاف کیا گیا ہے ۔

سیدنا عبداللہ بن عمرو بیان کرتے ہیں : ایک دن نبی اکرم صلی اللہ علیہ وسلم نے نماز کا ذکر کرتے ہوئے ارشاد فرمایا : ” جو شخص اس کی حفاظت کرے گا ، یہ اس کے لئے قیامت کے دن نور ، برہان اور نجات کا باعث ہو گی ، اور جو شخص اس کی حفاظت نہیں کرے گا ، تو اُس کے لئے نہ کوئی نور ہو گا ، اور نہ برہان ہو گی ، اور نہ نجات ہو گی ، اور ایسا شخص قیامت کے دن فرعون ، ہامان اور اُبی بن خلف کے ساتھ ہو گا“ ۔
یہ روایت امام أحمد نے ، اور امام طبرانی نے معجم کبیر اور معجم اوسط میں نقل کی ہے ، اور امام أحمد کے رجال ” ثقہ “ ہیں ۔

سیدنا ابوہریرہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اس شخص کا اسلام میں کوئی حصہ نہیں ہے ، جس کی نماز نہ ہو ، اور اس شخص کی نماز نہیں ہوتی ، جس کا وضو نہ ہو “ ۔
یہ روایت امام بزار نے نقل کی ہے ، اس کی سند میں ایک راوی عبداللہ بن سعید بن ابوسعید ہے ، جس کے ” ضعیف“ ہونے پر محدثین کا اتفاق ہے ۔

سیدنا حذیفہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” اسلام کے آٹھ حصے ہیں ، اسلام ( یعنی ایمان کا زبانی اقرار ) ایک حصہ ہے ، نماز ایک حصہ ہے “ ۔ اس سے پہلے یہ حدیث مکمل گزر چکی ہے ، اور دیگر احادیث بھی ایمان سے متعلق باب میں گزر چکی ہیں ،
سیدنا حذیفہ رضی اللہ عنہ کی نقل کردہ حدیث حسن ہے ۔

سیدنا عبداللہ بن عمر رضی اللہ عنہما روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” اس شخص کا ایمان نہیں ہے ، جس کی امانت نہ ہو اور اس شخص کی نماز نہیں ہوتی ، جس کی طہارت نہ ہو ، اور اس شخص کا دین نہیں ہوتا ، جس کی نماز نہ ہو ، دین میں نماز کو وہی حیثیت حاصل ہے ، جو جسم میں سر کو حاصل ہے “ ۔
یہ روایت امام طبرانی نے معجم اوسط اور معجم صغیر میں نقل کی ہے ، وہ فرماتے ہیں : حسین بن حکم خبری نامی راوی اسے نقل کرنے میں منفرد ہے ۔

ابوسلمہ نے ، سیدنا ابوہریرہ رضی اللہ عنہ کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” جس شخص نے وتر ادا نہ کیے ہوں ، اُس کی نماز نہیں ہوتی “ ۔ راوی بیان کرتے ہیں : جب سیدہ عائشہ رضی اللہ عنہا کو اس روایت کے بارے میں پتہ چلا ، تو انہوں نے فرمایا : سیدنا ابوالقاسم صلی اللہ علیہ وسلم سے یہ روایت کس نے سنی ہے ؟ اللہ کی قسم ! نہ تو زیادہ عرصہ گزرا ہے ، اور نہ ہی میں بات بھولی ہوں ، نبی اکرم صلی اللہ علیہ وسلم نے یہ بات ارشاد فرمائی تھی : ” جو شخص قیامت کے دن پانچ نمازیں لے کے آئے گا ، یوں کہ اُس نے ان نمازوں کے وضو ، اُن کے اوقات ، ان کے رکوع اور ان کے سجود کی حفاظت کی ہو ، اور اس میں کوئی کمی نہ کی ہو ، تو جب وہ شخص آئے گا ، تو اس شخص کے لئے اللہ تعالیٰ کی طرف سے یہ عہد ہو گا کہ اللہ تعالیٰ اُسے عذاب نہیں دے گا ، اور جو شخص ایسی حالت میں آئے کہ اس نے ان نمازوں میں کسی حوالے سے کوئی کمی کی ہو ، تو اس شخص کے لئے اللہ تعالیٰ کی بارگاہ میں کوئی عہد نہیں ہو گا ، اگر اللہ تعالیٰ چاہے گا ، تو اس پر رحم کرے گا ، اور اگر چاہے گا ، تو اسے عذاب دے گا “ ۔
یہ روایت امام طبرانی نے معجم اوسط میں نقل کی ہے ، وہ فرماتے ہیں ۔ محمد بن عمرو نامی راوی کے حوالے سے ، اس روایت کو صرف عیسیٰ بن واقد نے نقل کیا ہے ۔ علامہ ہیثمی فرماتے ہیں : ) : میں یہ کہتا ہوں : میں نے کسی کو اس کا ذکر کرتے ہوئے نہیں پایا ہے ۔

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں : ” تین چیزیں ایسی ہیں کہ جو شخص ان کی حفاظت کرے گا ، تو وہ در حقیقت ولی ہو گا ، اور جو شخص ان کو ضائع کرے گا ، وہ درحقیقت دشمن ہو گا ، نماز ، روزہ اور جنابت “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی عدی بن فضل ہے ، اور وہ ” ضعیف“ ہے ۔

سیدنا ابوہریرہ رضی اللہ عنہ بیان کرتے ہیں : ایک مرتبہ نبی اکرم صلی اللہ علیہ وسلم نے اپنے آس پاس موجود اپنی امت کے افراد سے فرمایا : تم لوگ مجھے چھ چیزوں کی ضمانت دو ! میں تمہیں جنت کی ضمانت دیتا ہوں ، راوی کہتے ہیں : میں نے عرض کی : یا رسول اللہ ! وہ کیا ہیں ؟ نبی اکرم صلی اللہ علیہ وسلم نے ارشاد فرمایا : نماز ، زکوۃ ، امانت ، شرمگاہ ، پیٹ اور زبان ۔
یہ روایت امام طبرانی نے معجم اوسط میں نقل کی ہے ، وہ یہ فرماتے ہیں : یہ روایت سیدنا ابوہریرہ رضی اللہ عنہ کے حوالے سے صرف اسی سند کے ساتھ نقل کی گئی ہے ، ( علامہ ہیثمی فرماتے ہیں : ) میں یہ کہتا ہوں : اس کی سند حسن ہے ۔

سیدنا ابومالک اشجعی رضی اللہ عنہ اپنے والد کا یہ بیان نقل کرتے ہیں : جب کوئی شخص اسلام قبول کرتا تھا ، تو نبی اکرم صلی اللہ علیہ وسلم سب سے پہلے ہمیں نماز کی تعلیم دیتے تھے ، راوی کو شک ہے شاید یہ الفاظ ہیں : اسے نماز کی تعلیم دیتے تھے ۔
یہ روایت امام بزار نے اور امام طبرانی نے مجم کبیر میں نقل کی ہے ، اور اس کے رجال ” صحیح“ کے رجال ہیں ۔

سیدہ عائشہ صدیقہ رضی اللہ عنہا بیان کرتی ہیں ۔ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے : ” بے شک اللہ تعالیٰ نے ہر دن اور رات میں ، بندوں پر پانچ نمازیں فرض قرار دی ہیں “ ۔
یہ روایت امام طبرانی نے معجم اوسط میں نقل کی ہے ، اور اس کی سند حسن ہے ۔

سیدنا ابوہریرہ رضی اللہ عنہ اور سیدنا ابوسعید خدری رضی اللہ عنہ فرماتے ہیں : ” جو نماز ، نبی اکرم صلی اللہ علیہ وسلم پر سب سے پہلے فرض کی گئی ، وہ ظہر کی نماز ہے “ ۔
یہ روایت امام طبرانی نے معجم اوسط میں نقل کی ہے ، اس کی سند میں ایک راوی یسین زیات ہے ، اور وہ متروک ہے ۔

سیدنا علی رضی اللہ عنہ فرماتے ہیں : جو نماز ہم نے سب سے پہلے ادا کی ، وہ عصر کی نماز ہے ( یا شاید یہ ترجمہ ہو گا : جس نماز میں ہم نے سب سے پہلے رکوع کیا ، وہ عصر کی نماز ہے ) ۔ میں نے عرض کی : یا رسول اللہ ! یہ کیا ہے ؟ آپ صلی اللہ علیہ وسلم نے ارشاد فرمایا : مجھے اس کا حکم دیا گیا ہے ۔
یہ روایت امام بزار نے اور امام طبرانی نے معجم اوسط میں نقل کی ہے ، اس کی سند میں ایک راوی ابوعبدالرحیم ہے ، اگر تو یہ خالد بن یزید ہے ، تو پھر یہ ” ثقہ “ ہے ، اور صحیح کے رجال میں سے ہے ، میں نے ” میزان الاعتدال “ میں ابوعبدالرحیم کا ذکر نہیں پایا ہے ، یہ شخص مجہول ہے ۔

سیدنا ابورافع رضی اللہ عنہ بیان کرتے ہیں : جب نبی اکرم صلی اللہ علیہ وسلم کا وصال ہوا ، تو اس وقت آپ کا سر مبارک سیدنا علی بن ابوطالب رضی اللہ عنہ کی گود میں تھا ، اور آپ نے سیدنا علی رضی اللہ عنہ سے یہ فرمایا : اپنے زیر ملکیت لوگوں کے بارے میں اللہ تعالیٰ سے ڈرتے رہنا ) اور نماز کے بارے میں اللہ تعالیٰ ( کے حکم کی پابندی کرنا ) راوی بیان کرتے ہیں : نبی اکرم صلی اللہ علیہ وسلم نے جو آخری کلام ارشاد فرمایا تھا ، وہ یہ تھا ۔
یہ روایت امام بزار نے نقل کی ہے ، اس کی سند میں ایک راوی عنسان بن عبداللہ ہے ، میں نے کسی کو اس کے حالات بیان کرتے ہوئے نہیں پایا ہے ، اس روایت کے بقیہ رجال ” ثقہ “ ہیں ۔

واصل بیان کرتے ہیں : میں نے نبی اکرم صلی اللہ علیہ وسلم کے اصحاب میں سے ایک صاحب کو پایا ہے ، جن کا نام سیدنا ناجیہ طفاوی رضی اللہ عنہ تھا ، وہ قرآن مجید کی کتابت کرتے تھے ، ایک عورت اُن کے پاس آئی اور بولی: میں آپ سے نماز کے بارے میں دریافت کرنے کے لئے آئی ہوں ، تو انہوں نے فرمایا : تم ایک گنہگار عورت ہو ، یا تم ایک گنہگار شخص کے پاس سے آئی ہو ، اُس عورت نے عرض کی : جی نہیں ! بلکہ میں گنہگار شخص کے پاس سے آئی ہوں ، میرے گھر والوں نے میری شادی کر دی تھی ، میں ان دنوں کنواری لڑکی تھی ، بنو تمیم سے تعلق رکھنے والے ایک شخص نے میرے ساتھ شادی کی تھی ، جس پر کئی دن اس طرح گزر جاتے ہیں کہ وہ اس دوران پانی استعمال نہیں کرتا اور نماز ادا نہیں کرتا ، پھر تین دن گزرنے کے بعد وہ آتا ہے ، اور پانی کے ذریعے وضو کرتا ہے ، پھر دو مرتبہ ٹھونگے مارتا ہے ، اور یہ کہتا ہے : ( اللہ تعالیٰ نے ارشاد فرمایا ہے : ) ” نمازوں کی حفاظت کرو ، اور درمیانی نماز کی ، اور اللہ تعالیٰ کی بارگاہ میں عاجزی کے ساتھ کھڑے رہو “ ۔ تو سیدنا ناجیہ طفاوی رضی اللہ عنہ نے اس عورت سے فرمایا : اللہ کے رسول نے پانچ نمازیں ادا کی ہیں ، ظہر ، عصر ، مغرب ، عشاء اور صبح ( یعنی فجر کی نماز ) وہ عورت اپنے گھر والوں کے پاس گئی ، اور بولی: تم لوگ مجھے میرے شوہر سے الگ کروا دو ! کیونکہ وہ ایک گنہگار شخص ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی براء بن عبداللہ عننوی ہے ، جسے امام أحمد اور دیگر حضرات نے ضعیف قرار دیا ہے ، ابن عدی کہتے ہیں : میرے نزدیک وہ شخص ضعیف ہونے کے قریب ہونے کی بہ نسبت سچا ہونے کے زیادہ قریب ہے ۔ ( علامہ ہیثمی فرماتے ہیں : ) میں یہ کہتا ہوں : جن حضرات نے اسے ضعیف قرار دیا ہے ، اس راوی کے بارے میں اُن کا کلام کمزور ہے ۔

سیدنا بچرہ بن عامر بیان کرتے ہیں : ہم لوگ نبی اکرم صلی اللہ علیہ وسلم کی خدمت میں حاضر ہوئے ، ہم نے اسلام قبول کیا ، ہم نے آپ صلی اللہ علیہ وسلم سے یہ درخواست کی : کہ آپ ہمیں عشاء کی نماز معاف کر دیں ، نبی اکرم صلی اللہ علیہ وسلم نے دریافت کیا ہے : عشاء کی نماز کیوں ؟ ہم نے عرض کی : ہم اس وقت اپنے اونٹوں کا دودھ دوہنے میں مصروف ہوتے ہیں ، نبی اکرم صلی اللہ علیہ وسلم نے ارشاد فرمایا : اگر اللہ نے چاہا ، تو تم لوگ دودھ بھی دوہ لو گے اور نماز بھی پڑھ لو گے ۔
یہ روایت امام طبرانی نے معجم کبیر میں رحال بن منذر کے حوالے سے ، اُس کے والد کے حوالے سے ، اس کے دادا سیدنا بچرہ رضی اللہ عنہ سے نقل کی ہے ، میں نے کسی کو رحال ، یا اُس کے والد کا ذکر کرتے ہوئے نہیں پایا ہے ، باقی اللہ بہتر جانتا ہے ۔

ابوبختری بیان کرتے ہیں : سیدنا سلمان رضی اللہ عنہ نے ایک کنیز کے ساتھ صحبت کی ، اور پھر فارسی میں اُس عورت سے کہا: تم نماز پڑھ لو ! اُس نے جواب دیا : جی نہیں ! سیدنا سلمان رضی اللہ عنہ نے کہا: تم ایک سجدہ کر لو ! اس نے جواب دیا : جی نہیں ! سیدنا سلمان فارسی رضی اللہ عنہ سے کہا: گیا : اے ابوعبداللہ ! ایک سجدہ اس عورت کے کس کام آئے گا ؟ تو سیدنا سلمان فارسی رضی اللہ عنہ نے فرمایا : اگر یہ نماز پڑھ لیتی ، تو پڑھ لیتی اُس شخص کا جس کا اسلام میں کوئی حصہ ہو ، وہ اُس شخص کی مانند نہیں ہے ، جس کا کوئی حصہ نہ ہو ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ضرار بن صرد ابونعیم ہے ، اور وہ انتہائی ” ضعیف “ ہے ۔