مجمع الزوائد ومنبع الفوائد

سیدنا عبداللہ بن عباس رضی اللہ عنہما بیان فرماتے ہیں : جب میری بینائی کمزور ہو گئی ، تو یہ کہا: گیا : ہم آپ کا علاج کرتے ہیں ، آپ کچھ دن تک نماز ترک کر دیں ، تو سیدنا عبداللہ بن عباس رضی اللہ عنہما نے فرمایا : جی نہیں ! نبی اکرم صلی اللہ علیہ وسلم نے ارشاد فرمایا ہے : ” جو شخص نماز ترک کر دے گا ، جب وہ اللہ تعالیٰ کی بارگاہ میں حاضر ہو گا ، تو اللہ تعالیٰ اس پر غضبناک ہو گا“ ۔ یہ روایت امام بزار نے اور امام طبرانی نے معجم کبیر میں نقل کی ہے ، اور اس کی سند میں ایک راوی سہل بن محمود ہے ، جس کا ذکر ابن ابوحاتم نے کیا ہے ، وہ فرماتے ہیں : أحمد بن ابراہیم دورقی اور سعدان بن یزید نے اس سے روایت نقل کی ہے ۔
( علامہ ہیثمی فرماتے ہیں : ) میں یہ کہتا ہوں : محمد بن عبداللہ مخرمی نے اس سے روایت نقل کی ہے ، اس کے بارے میں کسی نے کلام نہیں کیا ہے ، اس روایت کے بقیہ رجال ” صحیح“ کے رجال ہیں ۔

مکول نے ، سیدہ ام ایمن رضی اللہ عنہا کے حوالے سے نبی اکرم صلی اللہ علیہ وسلم کا یہ فرمان نقل کیا ہے : ” تم جان بوجھ کر نماز ترک نہ کرنا ، کیونکہ جو شخص جان بوجھ کر نماز ترک کر دیتا ہے ، اس سے اللہ اور اس کے رسول کا ذمہ لاتعلق ہو جاتا ہے “ ۔
یہ روایت امام أحمد نے نقل کی ہے ، اور اس کے رجال ” صحیح “ کے رجال ہیں ، البتہ مکحول نامی راوی نے سیدہ ام ایمن رضی اللہ عنہا سے سماع نہیں کیا ہے ، باقی اللہ بہتر جانتا ہے ۔

سیدنا انس بن مالک رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جان بوجھ کر نماز ترک کرتا ہے ، وہ کھلے عام کفر کرتا ہے “ ۔
یہ روایت امام طبرانی نے معجم اوسط میں نقل کی ہے ، اور اس کے رجال کی توثیق کی گئی ہے ، صرف محمد بن ابوداؤد نامی راوی کا معاملہ مختلف ہے ، میں نے کسی کو اس کے حالات بیان کرتے ہوئے نہیں پایا ہے ، ابن حبان نے کتاب ” الثقات“ میں محمد بن أبو داود : بغدادی کا ذکر کیا ہے ، مجھے نہیں معلوم کہ یہ وہی ہے یا وہ نہیں ہے ؟

سیدنا معاذ بن جبل رضی اللہ عنہ بیان کرتے ہیں : نبی اکرم صلی اللہ علیہ وسلم نے سیدنا معاذ بن جبل رضی اللہ عنہ سے فرمایا : ” جو شخص جان بوجھ کر نماز ترک کر دیتا ہے ، اُس سے اللہ تعالیٰ کا ذمہ لاتعلق ہو جاتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی بقیہ بن ولید ہے ، وہ تدلیس کرنے والا ہے ، اور یہ روایت بھی اس نے عنعنہ کے ساتھ نقل کی ہے ۔

سیدنا مسور بن مخرمہ رضی اللہ عنہ بیان کرتے ہیں : میں سیدنا عمر بن خطاب رضی اللہ عنہ کے پاس آیا ، اُس وقت انہیں ڈھانپ دیا گیا تھا ، میں نے دریافت کیا : تم لوگوں نے انہیں کس حالت میں پایا ہے ؟ لوگوں نے کہا: جیسے آپ دیکھ رہے ہیں ، میں نے کہا: تم انہیں نماز کے حوالے سے جگاؤ ! کیونکہ تم انہیں ، اور کسی ایسی چیز کے حوالے سے نہیں جگا سکتے ، جو ان کے نزدیک نماز سے زیادہ اہم ہو ، تو لوگوں نے کہا: اے امیر المؤمنین ! نماز کا وقت ہو گیا ہے ، انہوں نے فرمایا : جی ہاں ! اللہ کی قسم ! جی ہاں ! ایسے شخص کا اسلام میں کوئی حق نہیں ہے ، جو نماز کو ترک کر دیتا ہے ، پھر انہوں نے نماز ادا کی ، حالانکہ اُن کے زخم سے خون بہہ رہا تھا ۔
یہ روایت امام طبرانی نے معجم اوسط میں نقل کی ہے ، اور اس کے رجال ” صحیح “ کے رجال ہیں ۔

سیدنا عبداللہ بن مسعود رضی اللہ عنہ فرماتے ہیں : جو شخص نماز ادا نہیں کرتا ، اُس کا دین نہیں ہے ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی ابونعیم ضرار بن صرد ہے ، اور وہ ” ضعیف “ ہے ۔

قاسم بن عبدالرحمن نے ، حضرت عبداللہ بن مسعود رضی اللہ عنہ کا یہ قول نقل کیا ہے : جو شخص نماز ترک کر دے ، وہ کفر کا مرتکب ہوتا ہے ۔

سیدنا ابودرداء رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا ہے : ” جو شخص جان بوجھ کر نماز ترک کر دے ، اُس کا عمل ضائع ہو گیا “ ۔
یہ روایت امام أحمد نے نقل کی ہے ، اور اس کے رجال ” صحیح“ کے رجال ہیں ۔