مجمع الزوائد ومنبع الفوائد

سیدنا معاویہ بن ابوسفیان رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” آنکھیں ، شرمگاہ کا بندھن ہیں ، جب آنکھیں سو جاتی ہیں ، تو بندش کھل جاتی ہے “ ۔
یہ روایت امام أحمد ، امام ابویعلیٰ اور امام طبرانی نے معجم کبیر میں نقل کی ہے ، اس کی سند میں ایک راوی ابوبکر بن ابومریم ہے اور وہ اختلاط کا شکار ہونے کی وجہ سے ضعیف ہے ۔

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں : ” اس شخص پر وضو لازم نہیں ہوتا ، جو سجدے کی حالت میں سو جاتا ہے ، جب تک وہ لیٹ نہ جائے ، کیونکہ جب وہ لیٹ جائے گا تو اُس کے جوڑ ڈھیلے پڑ جائیں گے “ ۔
یہ روایت امام أحمد اور امام ابویعلیٰ نے نقل کی ہے ، اور اس کے رجال کی توثیق کی گئی ہے ۔

سیدنا عبداللہ بن عمرو رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” جو شخص بیٹھے ہوئے سو جائے ، اُس پر وضو لازم نہیں ہو گا ، لیکن جب وہ اپنا پہلو ( زمین پر ) رکھ دے ، تو اُس پر وضو لازم ہو گا “ ۔
یہ روایت امام طبرانی نے معجم اوسط میں نقل کی ہے اس کی سند میں ایک راوی حسن بن ابوجعفر جفری ہے ، جسے امام بخاری رحمہ اللہ اور دیگر حضرات نے ” ضعیف “ قرار دیا ہے ، ابن عدی کہتے ہیں : اس سے صالح احادیث منقول ہیں ، یہ جان بوجھ کر جھوٹ بیان نہیں کرتا ہے ۔

سیدنا ابوامامہ رضی اللہ عنہ بیان کرتے ہیں : نبی اکرم صلی اللہ علیہ وسلم سو گئے ، یہاں تک کہ آپ صلی اللہ علیہ وسلم خراٹے لینے لگے ، بعد میں آپ صلی اللہ علیہ وسلم نے ارشاد فرمایا : ” وضو اس پر لازم ہوتا ہے ، جو لیٹ جائے ( یعنی لیٹ کر سو جائے ) ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی جعفر بن زبیر ہے اور وہ کذاب ہے ۔

سیدنا انس رضی اللہ عنہ بیان کرتے ہیں : نبی اکرم صلی اللہ علیہ وسلم کے اصحاب پہلو رکھ لیتے تھے ( یعنی پہلو رکھ کر سو جاتے تھے ) تو اُن میں سے بعض حضرات دوبارہ وضو کر لیتے تھے اور بعض ( دوبارہ ) وضو نہیں کرتے تھے ۔
یہ روایت امام بزار نے نقل کی ہے اور اس کے رجال ”صحیح“ کے رجال ہیں ۔

یہ روایت امام ابویعلیٰ نے سیدنا انس رضی اللہ عنہ کے حوالے سے ، نبی اکرم صلی اللہ علیہ وسلم کے کچھ اصحاب کے بارے میں نقل کی ہے کہ وہ حضرات پہلو رکھ کر سو جاتے تھے ، اُن میں سے بعض دوبارہ وضو کر لیتے تھے اور بعض ( دوبارہ ) وضو نہیں کرتے تھے ۔ اس کے رجال ” صحیح“ کے رجال ہیں ۔

عبدالکریم ابوامیہ بیان کرتے ہیں : سیدنا علی رضی اللہ عنہ ، سیدنا عبداللہ بن مسعود رضی اللہ عنہ اور امام شعبی ، ایسے شخص کے بارے میں فرماتے ہیں : جو بیٹھا ہوا سو جاتا ہے ، کہ اُس پر وضو لازم نہیں ہو گا ۔
یہ روایت امام طبرانی نے معجم کبیر میں نقل کی ہے ، عبدالکریم نامی راوی ضعیف ہے ، اس نے سیدنا علی رضی اللہ عنہ اور سیدنا عبداللہ بن مسعود رضی اللہ عنہ کا زمانہ نہیں پایا ہے ۔

سیدنا ابوامامہ رضی اللہ عنہ روایت کرتے ہیں : نبی اکرم صلی اللہ علیہ وسلم نے ارشاد فرمایا : ” نیند کے بعد کا وضو یہ ہے کہ تم پانی کو چھو لو ، اور پھر اُس کے ذریعے اپنے چہرے ، دونوں بازؤں اور پاؤں پر یوں مسح کر لو ، جس طرح تیمم میں مسح کیا جاتا ہے “ ۔
یہ روایت امام طبرانی نے معجم کبیر میں نقل کی ہے ، اس کی سند میں ایک راوی علاء بن کثیر لیثی ہے ، جس کے ضعیف ہونے پر محدثین کا اتفاق ہے ۔