مجمع الزوائد ومنبع الفوائد

حمید بیان کرتے ہیں : ہم لوگ سیدنا انس بن مالک رضی اللہ عنہ کے ساتھ تھے ، اُنہوں نے ارشاد فرمایا : اللہ کی قسم ! ہم لوگ ( یعنی صحابہ کرام ) نبی اکرم صلی اللہ علیہ وسلم کے حوالے سے ، تم لوگوں کو جو کچھ بھی بیان کرتے ہیں ، وہ سب ہم نے ( براہ راست ) نبی اکرم صلی اللہ علیہ وسلم سے نہیں سنا ہوتا ، لیکن ہم میں سے کوئی ایک کسی دوسرے کے ساتھ جھوٹ نہیں بولتا تھا ۔
یہ روایت امام طبرانی نے معجم کبیر میں نقل کی ہے اور اس کے رجال صحیح کے رجال ہیں ۔

سیدنا براء رضی اللہ عنہ بیان کرتے ہیں : ہر حدیث ہم نے نبی اکرم صلی اللہ علیہ وسلم کی زبانی نہیں سنی ہوئی ہے ، آپ صلی اللہ علیہ وسلم کے اصحاب ، آپ صلی اللہ علیہ وسلم کے حوالے سے ہمیں حدیث بیان کر دیا کرتے تھے ، کیونکہ ہم اونٹوں کی دیکھ بھال کی وجہ سے مصروف رہتے تھے ۔
یہ روایت امام أحمد نے نقل کی ہے اور اس کے رجال صحیح کے رجال ہیں ۔