السنن الكبرى للبيهقي

سیدنا عبداللہ بن سرجس رضی اللہ عنہ فرماتے ہیں کہ نبی ﷺ جب سفر کرتے تو فرماتے: «اللَّهُمَّ أَنْتَ الصَّاحِبُ فِي السَّفَرِ، وَالْخَلِيفَةُ فِي الْأَهْلِ، اللَّهُمَّ اصْحَبْنَا فِي سَفَرِنَا، وَاخْلُفْنَا فِي أَهْلِنَا، اللَّهُمَّ إِنِّي أَعُوذُ بِكَ مِنْ وَعْثَاءِ السَّفَرِ، وَكَآبَةِ الْمُنْقَلَبِ، وَالْحَوْرِ بَعْدَ الْكَوْرِ، وَدَعْوَةِ الْمَظْلُومِ، وَسُوءِ الْمَنْظَرِ فِي الْأَهْلِ وَالْمَالِ» ”اے اللہ! تو ہی سفر میں ساتھی اور گھر والوں میں نائب ہے۔ اے اللہ! تو ہمارا ساتھی بن ہمارے سفر میں اور ہمارا نائب بن ہمارے گھر والوں میں۔ اے اللہ! میں تجھ سے سفر کی مشقت اور ناکام لوٹنے کے غم اور زیادتی کے بعد کمی اور مظلوم کی بددعا سے اور برے منظر سے مال و اہل میں پناہ چاہتا ہوں۔“

عکرمہ رحمہ اللہ، سیدنا ابن عباس رضی اللہ عنہما سے نقل فرماتے ہیں کہ رسول اللہ ﷺ جب سفر میں نکلنے کا ارادہ فرماتے (زیاد نے ”سفر میں“ کے الفاظ ذکر نہیں کیے) تو فرماتے: «اللَّهُمَّ أَنْتَ الصَّاحِبُ فِي السَّفَرِ وَالْخَلِيفَةُ فِي الْأَهْلِ، اللَّهُمَّ إِنِّي أَعُوذُ بِكَ مِنَ الضُّبْنَةِ فِي السَّفَرِ، وَالْكَآبَةِ فِي الْمُنْقَلَبِ، اللَّهُمَّ اقْبِضْ لَنَا الْأَرْضَ وَهَوِّنْ عَلَيْنَا السَّفَرَ» ”اے اللہ! تو سفر میں ساتھی اور گھر والوں میں نائب ہے۔ اے اللہ! میں سفر میں (دوسروں پر) بوجھ بننے اور واپسی میں غم سے تیری پناہ چاہتا ہوں۔ اے اللہ! ہمارے لیے زمین کو لپیٹ دے اور ہمارے لیے سفر آسان کر دے۔“ اور جب واپسی کا ارادہ ہوتا (تو فرماتے): «آيِبُونَ تَائِبُونَ لِرَبِّنَا حَامِدُونَ» ”ہم واپس لوٹنے والے، توبہ کرنے والے، اپنے رب کی حمد کرنے والے ہیں۔“ جب اپنے گھر آتے تو فرماتے: «تَوْبًا تَوْبًا لِرَبِّنَا أَوْبًا لَا يُغَادِرُ عَلَيْنَا حُوبًا» ”اپنے رب سے خوب توبہ کرتا ہوں، ہمارے گناہوں کو نہ چھوڑ۔“

ایضاً (یہی روایت سماک سے ایک اور سند کے ساتھ عثمان بن عمر کی حدیث کی طرح منقول ہے)۔

سیدنا انس بن مالک رضی اللہ عنہ فرماتے ہیں کہ جب بھی رسول اللہ ﷺ نے سفر کا ارادہ کیا تو جب اپنی جگہ سے کھڑے ہوتے تو فرماتے: «اللَّهُمَّ بِكَ انْتَشَرْتُ، وَإِلَيْكَ تَوَجَّهْتُ، وَبِكَ اعْتَصَمْتُ، أَنْتَ ثِقَتِي وَرَجَائِي، اللَّهُمَّ اكْفِنِي مَا أَهَمَّنِي وَمَا لَا أَهْتَمُّ بِهِ وَمَا أَنْتَ أَعْلَمُ بِهِ مِنِّي، اللَّهُمَّ زَوِّدْنِي التَّقْوَى، وَاغْفِرْ لِي ذَنْبِي، وَوَجِّهْنِي إِلَى الْخَيْرِ حَيْثُمَا تَوَجَّهْتُ» ”اے اللہ! تیری مدد سے میں (سفر کے لیے) نکلا، تیری ہی طرف میں نے رخ کیا اور تیرا ہی سہارا میں نے پکڑا، تو ہی میرا بھروسا اور میری امید ہے۔ اے اللہ! مجھے ان باتوں سے کافی ہو جا جو مجھے فکر میں ڈالیں اور جن کی میں فکر نہیں کرتا اور جنہیں تو مجھ سے زیادہ جانتا ہے۔ اے اللہ! مجھے تقویٰ کا زادِ راہ عطا فرما، میرا گناہ معاف فرما اور میں جدھر بھی رخ کروں مجھے بھلائی کی طرف متوجہ فرما۔“ پھر (سفر کے لیے) نکل جاتے۔
عام لوگ اسی طرح «بِكَ انْتَشَرْتُ» کہتے ہیں، جبکہ ابو سلیمان خطابی رحمہ اللہ فرماتے تھے: صحیح «ابْتَسَرْتُ» ہے، یعنی میں نے اپنا سفر شروع کیا۔