صحيح الادب المفرد

سیدنا ابوموسیٰ اشعری رضی اللہ عنہ سے روایت ہے، انہوں نے کہا: نبی صلی اللہ علیہ وسلم ایک دن اپنی کسی ضرورت سے مدینہ کے باغوں میں سے ایک باغ کی طرف نکلے، اور میں آپ کے پیچھے پیچھے نکلا، جب آپ باغ میں داخل ہو گئے تو میں اس کے دروازے پر بیٹھ گیا اور (دل میں) کہا: آج میں ضرور نبی صلی اللہ علیہ وسلم کا دربان بنوں گا، حالانکہ آپ نے مجھے اس کا حکم نہیں دیا تھا۔ نبی صلی اللہ علیہ وسلم گئے اور اپنی ضرورت پوری کی، اور کنویں کی منڈیر پر بیٹھ گئے، اپنی دونوں پنڈلیوں سے کپڑا ہٹایا اور انہیں کنویں میں لٹکا دیا۔ پھر سیدنا ابوبکر رضی اللہ عنہ آئے تاکہ آپ سے اندر آنے کی اجازت طلب کریں، میں نے کہا: اپنی جگہ ٹھہریے، یہاں تک کہ میں آپ کے لیے اجازت لے لوں۔ وہ ٹھہر گئے، اور میں نبی صلی اللہ علیہ وسلم کے پاس آیا اور عرض کیا: اے اللہ کے رسول! ابوبکر آپ سے (اندر آنے کی) اجازت مانگ رہے ہیں؟ آپ صلی اللہ علیہ وسلم نے فرمایا : ”انہیں اجازت دے دو اور انہیں جنت کی خوشخبری دے دو ۔“ چنانچہ وہ اندر آئے اور نبی صلی اللہ علیہ وسلم کی دائیں جانب آ (کر بیٹھ) گئے، اپنی پنڈلیوں سے کپڑا ہٹایا اور انہیں کنویں میں لٹکا دیا۔ پھر سیدنا عمر رضی اللہ عنہ آئے تو میں نے کہا: اپنی جگہ ٹھہریے، یہاں تک کہ میں آپ کے لیے اجازت لے لوں۔ تو نبی صلی اللہ علیہ وسلم نے فرمایا : ”انہیں اجازت دے دو اور انہیں جنت کی خوشخبری دے دو ۔“ چنانچہ سیدنا عمر رضی اللہ عنہ نبی صلی اللہ علیہ وسلم کی بائیں جانب آ (کر بیٹھ) گئے، اپنی پنڈلیوں سے کپڑا ہٹایا اور انہیں کنویں میں لٹکا دیا، تو منڈیر بھر گئی اور (اس پر) بیٹھنے کی جگہ نہ رہی۔ پھر سیدنا عثمان رضی اللہ عنہ آئے، میں نے کہا: اپنی جگہ ٹھہریے، یہاں تک کہ میں آپ کے لیے اجازت لے لوں۔ تو نبی صلی اللہ علیہ وسلم نے فرمایا : ”انہیں اجازت دے دو اور انہیں جنت کی خوشخبری دے دو، اس کے ساتھ ایک آزمائش ہے جو انہیں پہنچے گی ۔“ چنانچہ وہ اندر آئے تو انہوں نے ان کے ساتھ بیٹھنے کی جگہ نہ پائی، تو وہ گھوم کر ان کے سامنے کنویں کے کنارے پر آ گئے، اپنی پنڈلیوں سے کپڑا ہٹایا، پھر انہیں کنویں میں لٹکا دیا۔ میں تمنا کرنے لگا کہ میرا کوئی بھائی (بھی) آ جائے، اور میں اللہ سے دعا کرنے لگا کہ وہ اسے لے آئے، مگر وہ نہ آیا یہاں تک کہ وہ (سب) اٹھ گئے۔ (سعید) بن مسیب نے کہا: میں نے اس کی تعبیر ان کی قبروں سے کی کہ (تینوں کی قبریں) یہاں اکٹھی ہیں اور عثمان (رضی اللہ عنہ کی قبر) الگ ہے۔

سیدنا ابوہریرہ رضی اللہ عنہ سے روایت ہے، انہوں نے کہا: نبی صلی اللہ علیہ وسلم دن کے ایک حصے میں نکلے، نہ آپ مجھ سے بات کر رہے تھے اور نہ میں آپ سے بات کر رہا تھا، یہاں تک کہ آپ بنو قینقاع کے بازار میں آئے، پھر سیدہ فاطمہ (رضی اللہ عنہا) کے گھر کے صحن میں بیٹھ گئے اور فرمایا: ”کیا یہاں ننھا ہے؟ کیا یہاں ننھا ہے؟“ (یعنی سیدنا حسن رضی اللہ عنہ) تو سیدہ فاطمہ رضی اللہ عنہا نے انہیں کچھ دیر روکے رکھا، میں نے گمان کیا کہ وہ انہیں (خوشبودار دانوں کا) ہار پہنا رہی ہیں یا انہیں نہلا رہی ہیں، پھر وہ دوڑتے ہوئے آئے یہاں تک کہ آپ نے انہیں گلے لگایا اور ان کا بوسہ لیا، اور فرمایا: «اللهم أحبِبْه، وأحبب من يحبه» ”اے اللہ! اس سے محبت فرما اور جو اس سے محبت کرے اس سے بھی محبت فرما ۔“