صحيح الادب المفرد

سیدنا ابوہریرہ رضی اللہ عنہ سے روایت ہے کہ ایک آدمی رسول اللہ صلی اللہ علیہ وسلم کے پاس سے گزرا جبکہ آپ ایک مجلس میں تھے، اس نے کہا: السلام علیکم۔ تو آپ نے فرمایا: ”دس نیکیاں۔“ پھر ایک اور آدمی گزرا اور اس نے کہا: السلام علیکم ورحمۃ اللہ۔ تو آپ نے فرمایا: ”بیس نیکیاں۔“ پھر ایک اور آدمی گزرا اور اس نے کہا: السلام علیکم ورحمۃ اللہ وبرکاتہ۔ تو آپ نے فرمایا: ”تیس نیکیاں۔“ پھر مجلس میں سے ایک آدمی اٹھا اور سلام نہیں کیا! تو رسول اللہ صلی اللہ علیہ وسلم نے فرمایا: ”تمہارا ساتھی کتنی جلدی بھول گیا! جب تم میں سے کوئی مجلس میں آئے تو سلام کرے، پھر اگر اس کا بیٹھنے کا ارادہ ہو تو بیٹھ جائے، اور جب اٹھے (اور ایک روایت میں ہے: پھر اگر وہ بیٹھ جائے، پھر مجلس کے برخاست ہونے سے پہلے اس کا اٹھنے کا ارادہ ہو) تو سلام کرے، پہلا (سلام) دوسرے سے زیادہ حق دار نہیں ہے۔“

سیدنا عمر رضی اللہ عنہ سے روایت ہے، انہوں نے کہا: میں سیدنا ابوبکر رضی اللہ عنہ کے پیچھے سواری پر بیٹھا ہوا تھا، وہ لوگوں کے پاس سے گزرتے تو کہتے: السلام علیکم، وہ جواب دیتے: السلام علیکم ورحمۃ اللہ۔ اور وہ کہتے: السلام علیکم ورحمۃ اللہ، تو وہ جواب دیتے: السلام علیکم ورحمۃ اللہ وبرکاتہ۔ تو سیدنا ابوبکر رضی اللہ عنہ نے فرمایا: آج لوگ ہم پر بہت زیادہ فضیلت لے گئے۔

سیدہ عائشہ رضی اللہ عنہا رسول اللہ صلی اللہ علیہ وسلم سے روایت کرتی ہیں کہ آپ صلی اللہ علیہ وسلم نے فرمایا : ”یہودی تم سے کسی چیز پر اتنا حسد نہیں کرتے جتنا سلام کہنے اور آمین کہنے پر تم سے حسد کرتے ہیں ۔“