صحيح الادب المفرد

بشیر بن یسار سے روایت ہے، انہوں نے کہا: ”کوئی بھی سیدنا ابن عمر رضی اللہ عنہما سے سلام میں پہل نہیں کر پاتا تھا — یا کہا: سبقت نہیں لے جا پاتا تھا۔“

سیدنا جابر رضی اللہ عنہ سے روایت ہے، انہوں نے فرمایا: ”سوار پیدل چلنے والے کو سلام کرے، اور پیدل چلنے والا بیٹھے ہوئے کو، اور دو پیدل چلنے والوں میں سے جو سلام میں پہل کرے وہ افضل ہے۔“

سیدنا ابن عمر رضی اللہ عنہما سے روایت ہے کہ سیدنا اغر رضی اللہ عنہ — جو قبیلہ مزینہ کے ایک آدمی تھے اور انہیں نبی صلی اللہ علیہ وسلم کی صحبت حاصل تھی — کی بنو عمرو بن عوف کے ایک آدمی کے ذمے کئی وسق کھجوریں تھیں، وہ کئی بار اس کے پاس گئے۔ انہوں نے کہا: تو میں نبی صلی اللہ علیہ وسلم کے پاس آیا تو آپ نے میرے ساتھ سیدنا ابوبکر صدیق رضی اللہ عنہ کو بھیجا۔ انہوں نے کہا: ہمیں جو بھی ملتا وہ ہمیں سلام کرتا، تو سیدنا ابوبکر رضی اللہ عنہ نے فرمایا: ”کیا تم نہیں دیکھتے کہ لوگ تم سے سلام میں پہل کرتے ہیں اور اجر انہیں مل جاتا ہے؟ تم ان سے سلام میں پہل کرو، اجر تمہیں ملے گا۔“ ابن عمر یہ بات (اغر کی زبانی) خود ان کے بارے میں بیان کرتے ہیں۔

سیدنا ابو ایوب رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”کسی مسلمان آدمی کے لیے حلال نہیں کہ وہ اپنے بھائی کو تین دن سے زیادہ چھوڑے رکھے کہ وہ دونوں ملیں تو یہ بھی منہ پھیر لے اور وہ بھی منہ پھیر لے، اور ان دونوں میں بہتر وہ ہے جو سلام میں پہل کرے۔“