المستدرك على الصحيحين

سیدنا علی رضی اللہ عنہ سے روایت ہے کہ نبی کریم ﷺ نے دودھ دینے والے جانوروں کو ذبح کرنے سے اور سورج نکلنے سے پہلے (منڈی میں) سودا بازی کرنے سے منع فرمایا ہے۔

سیدنا عبداللہ بن عمرو بن عاص رضی اللہ عنہما سے روایت ہے کہ رسول اللہ ﷺ نے فرمایا: ”چالیس خصلتیں ایسی ہیں جن میں سب سے اعلیٰ درجہ کسی کو دودھ پینے کے لیے بکری کا عطیہ دینا ہے، جو بندہ بھی ثواب کی امید اور اللہ کے وعدے کی تصدیق کرتے ہوئے ان میں سے کسی ایک پر بھی عمل کرے گا، اللہ تعالیٰ اس کی وجہ سے اسے جنت میں داخل فرما دے گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا جابر رضی اللہ عنہ سے روایت ہے کہ نبی کریم ﷺ اور آپ کے صحابہ کا گزر ایک خاتون کے پاس سے ہوا، اس نے ان کے لیے ایک بکری ذبح کی اور کھانا تیار کیا، جب آپ ﷺ واپس تشریف لائے تو اس نے عرض کیا: اے اللہ کے رسول ﷺ! ہم نے آپ کے لیے کھانا تیار کیا ہے، تشریف لائیے اور تناول فرمائیے، چنانچہ نبی کریم ﷺ اور صحابہ داخل ہوئے، اور صحابہ اس وقت تک (کھانا) شروع نہیں کرتے تھے جب تک نبی کریم ﷺ ابتدا نہ فرمائیں، پھر نبی کریم ﷺ نے ایک لقمہ لیا لیکن آپ اسے حلق سے نیچے نہ اتار سکے، تو آپ ﷺ نے فرمایا: ”یہ ایسی بکری ہے جو اپنے مالکوں کی اجازت کے بغیر ذبح کی گئی ہے“، اس خاتون نے عرض کیا: اے اللہ کے نبی! ہم آلِ معاذ سے جھجک محسوس نہیں کرتے اور نہ ہی وہ ہم سے جھجکتے ہیں کہ ہم ان کی چیز لے لیں یا وہ ہماری لے لیں۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔

سیدنا جابر بن عبداللہ رضی اللہ عنہما سے روایت ہے کہ صحابہ کرام نے خیبر کے دن (ضرورت کے تحت) گھریلو گدھوں، خچروں اور گھوڑوں کو ذبح کیا، تو نبی کریم ﷺ نے انہیں گدھوں اور خچروں (کے گوشت) سے منع فرما دیا، جبکہ گھوڑوں سے منع نہیں فرمایا۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔