المستدرك على الصحيحين

سیدنا عبداللہ بن عامر بن ربیعہ اپنے والد سے روایت کرتے ہیں کہ رسول اللہ ﷺ نے فرمایا: ”جب تم میں سے کوئی اپنی ذات یا اپنے بھائی میں کوئی ایسی چیز دیکھے جو اسے پسند آئے تو اسے برکت کی دعا دینی چاہیے، کیونکہ نظر کا لگنا حق ہے۔“
یہ حدیث صحیح الاسناد ہے لیکن شیخین نے اسے برکت کے ذکر کے ساتھ روایت نہیں کیا۔

سیدنا عبداللہ بن عامر بن ربیعہ سے روایت ہے کہ سیدنا سہل بن حنیف اور سیدنا عامر بن ربیعہ رضی اللہ عنہما غسل کے ارادے سے نکلے اور ایک تالاب پر پہنچے، سہل رضی اللہ عنہ آڑ تلاش کرنے کے لیے آگے بڑھے یہاں تک کہ انہوں نے اپنا اونی جبہ اتار کر رکھا اور پانی میں داخل ہو گئے، عامر کہتے ہیں کہ میں نے انہیں دیکھا تو میری نظر لگ گئی، میں نے پانی میں ان کے تڑپنے کی آواز سنی، میں ان کے پاس آیا اور تین بار آواز دی مگر انہوں نے کوئی جواب نہ دیا، میں نبی کریم ﷺ کی خدمت میں حاضر ہوا اور آپ کو بتایا، آپ ﷺ پیدل تشریف لائے اور پانی میں داخل ہوئے یہاں تک کہ گویا میں آپ کی پنڈلیوں کی سفیدی دیکھ رہا تھا، آپ ﷺ نے ان کے سینے پر ہاتھ مارا اور یہ دعا دی: «اللَّهُمَّ أَذْهِبْ عَنْهُ حَرَّهَا وَبَرْدَهَا وَوَصَبَهَا» ”اے اللہ! اس (نظر) کی تپش، اس کی ٹھنڈک اور اس کی بیماری کو اس سے دور کر دے“، چنانچہ وہ کھڑے ہو گئے، پھر نبی کریم ﷺ نے فرمایا: ”جب تم میں سے کوئی اپنی ذات، اپنے مال یا اپنے بھائی میں کوئی ایسی چیز دیکھے جو اسے پسند آئے تو اسے برکت کی دعا دینی چاہیے «فلیُبرک»، کیونکہ نظر کا لگنا حق ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عقبہ بن عامر رضی اللہ عنہ سے روایت ہے، انہوں نے کہا: میں نے رسول اللہ ﷺ کو یہ فرماتے ہوئے سنا ہے: ”جس نے کوئی تمیمہ (تعویذ) لٹکایا تو اللہ اس کی مراد پوری نہ کرے، اور جس نے کوئی ودعہ (سمندری کوڑی) لٹکائی تو اللہ اسے سکون نہ دے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عمران بن حصین رضی اللہ عنہ سے روایت ہے، انہوں نے کہا: میں نبی کریم ﷺ کی خدمت میں حاضر ہوا جبکہ میرے بازو میں پتل کا ایک چھلا تھا، آپ ﷺ نے پوچھا: ”یہ کیا ہے؟“ میں نے عرض کیا: یہ واہنہ (کمزوری کی بیماری) کی وجہ سے ہے، آپ ﷺ نے فرمایا: ”اسے پھینک دو۔“
یہ حدیث صحیح الاسناد ہے لیکن شیخین نے اسے روایت نہیں کیا۔