المستدرك على الصحيحين

سیدنا ابودرداء رضی اللہ عنہ سے روایت ہے کہ ایک شخص نے شادی کی تو اس کی ماں نے اسے ناپسند کیا، وہ ابودرداء رضی اللہ عنہ کے پاس سوال کرنے آیا تو انہوں نے فرمایا: اپنی ماں کی اطاعت کرو، کیونکہ میں نے رسول اللہ ﷺ کو یہ فرماتے ہوئے سنا ہے: ”والدہ جنت کے دروازوں میں سے سب سے بہترین درمیانی دروازہ ہے“، اب تمہاری مرضی ہے کہ اس فضیلت کو ضائع کر دو یا اس کی حفاظت کرو۔

سیدنا ابودرداء رضی اللہ عنہ سے روایت ہے کہ ایک شخص کو اس کے والدین یا ان میں سے کسی ایک نے اپنی بیوی کو طلاق دینے کا حکم دیا، اس نے اس کام پر ایک ہزار یا سو غلام آزاد کرنے کی نذر مانی اور اپنا مال ہدیہ کرنے کا عہد کیا، پھر وہ ابودرداء رضی اللہ عنہ کے پاس آیا، انہوں نے فرمایا: اپنی نذر پوری کرو اور اپنے والدین کے ساتھ حسن سلوک کرو، کیونکہ میں نے رسول اللہ ﷺ کو فرماتے سنا ہے: ”والد جنت کے دروازوں میں سے سب سے بہترین درمیانی دروازہ ہے“، اب تمہاری مرضی ہے کہ اس دروازے کی حفاظت کرو یا اسے چھوڑ دو۔
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا عبداللہ بن عمر رضی اللہ عنہما سے روایت ہے کہ میرے نکاح میں ایک ایسی خاتون تھی جو مجھے پسند تھی، لیکن سیدنا عمر رضی اللہ عنہ اسے ناپسند کرتے تھے، انہوں نے مجھ سے فرمایا کہ اسے طلاق دے دو، میں نے انکار کر دیا، پھر سیدنا عمر رضی اللہ عنہ رسول اللہ ﷺ کے پاس گئے اور عرض کیا: یا رسول اللہ! عبداللہ بن عمر رضی اللہ عنہما کے پاس ایک عورت ہے جسے میں ناپسند کرتا ہوں، میں نے اسے طلاق دینے کا کہا تو اس نے انکار کر دیا، تب رسول اللہ ﷺ نے مجھ سے فرمایا: ”اے عبداللہ بن عمر! اپنی بیوی کو طلاق دے دو اور اپنے باپ کی اطاعت کرو“، عبداللہ کہتے ہیں کہ پھر میں نے اسے طلاق دے دی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔