المستدرك على الصحيحين

سیدنا مقدام بن معدی کرب رضی اللہ عنہ سے روایت ہے کہ نبی کریم ﷺ نے فرمایا: ”بے شک اللہ تعالیٰ تمہیں قریبی رشتہ داروں، پھر ان کے بعد قریبی رشتہ داروں کے ساتھ حسنِ سلوک کی وصیت فرماتا ہے“۔
اسماعیل بن عیاش اہل شام کے ائمہ میں سے ایک ہیں، ان پر صرف حافظے کی خرابی کی وجہ سے کلام کیا گیا ہے۔

سیدہ عائشہ رضی اللہ عنہا سے روایت ہے کہ رسول اللہ ﷺ نے فرمایا: ”میں سویا تو میں نے خود کو جنت میں دیکھا، وہاں میں نے ایک قاری کی آواز سنی جو قرآن پڑھ رہا تھا، میں نے پوچھا: یہ کون ہے؟ فرشتوں نے جواب دیا: یہ حارثہ بن نعمان ہیں، تو رسول اللہ ﷺ نے فرمایا: ”نیکی کا انجام ایسا ہی ہوتا ہے“؛ اور وہ اپنی ماں کے ساتھ سب سے زیادہ حسن سلوک کرنے والے تھے“۔
یہ حدیث شیخین کی شرط پر صحیح ہے لیکن انہوں نے اس سیاق کے ساتھ اسے روایت نہیں کیا، ابن عیینہ اور دیگر راویوں نے اسے رسول اللہ ﷺ کے جنت میں داخل ہونے کے تذکرے کے ساتھ بیان کیا ہے مگر اس میں نیند یا ماں کے ساتھ حسن سلوک کا ذکر نہیں کیا۔

سیدنا معاویہ بن جاہمہ رضی اللہ عنہ سے روایت ہے کہ جاہمہ نبی کریم ﷺ کی خدمت میں حاضر ہوئے اور عرض کیا: میں جہاد کا ارادہ رکھتا ہوں اور آپ ﷺ سے مشورہ کرنے آیا ہوں، آپ ﷺ نے فرمایا: ”کیا تمہاری ماں زندہ ہے؟“ انہوں نے عرض کیا: جی ہاں، آپ ﷺ نے فرمایا: ”جاؤ اور ان کی خدمت میں لگے رہو کیونکہ جنت ان کے قدموں تلے ہے“۔
یہ حدیث صحیح الاسناد ہے لیکن شیخین نے اسے روایت نہیں کیا۔