المستدرك على الصحيحين

ابن اسحاق سے مروی ہے کہ حبشہ کی طرف ہجرت کرنے والوں میں سیدنا عامر بن ربیعہ رضی اللہ عنہ بھی شامل تھے اور ان کے ساتھ ان کی اہلیہ سیدہ لیلیٰ بنت ابی حثمہ بن غانم رضی اللہ عنہا بھی تھیں۔

سیدنا عبداللہ بن عامر بن ربیعہ سے مروی ہے کہ مہاجر خواتین میں سب سے پہلے جو اونٹنی پر سوار ہو کر مدینہ منورہ تشریف لائیں وہ سیدہ لیلیٰ بنت ابی حثمہ رضی اللہ عنہا تھیں، ان کے ہمراہ ان کے شوہر عامر بن ربیعہ رضی اللہ عنہ تھے۔

سیدہ ام عبداللہ بنت ابی حثمہ رضی اللہ عنہا سے روایت ہے، انہوں نے کہا: اللہ کی قسم! ہم سرزمینِ حبشہ کی طرف روانگی کے لیے کجاوے باندھ رہے تھے اور عامر (میرے شوہر) کسی کام سے باہر گئے ہوئے تھے کہ اتنے میں عمر بن خطاب رضی اللہ عنہ آگئے اور میرے پاس آ کر کھڑے ہو گئے جبکہ وہ ابھی تک مشرک تھے، ہمیں ان کی طرف سے سخت مصائب اور سختی کا سامنا کرنا پڑتا تھا، انہوں نے پوچھا: اے ام عبداللہ! کیا اب یہاں سے کوچ ہو رہا ہے؟ میں نے کہا: ہاں، اللہ کی قسم! ہم اللہ کی زمین میں نکل جائیں گے، تم لوگوں نے ہمیں بڑی تکلیفیں دیں اور ہم پر بڑے مظالم ڈھائے، یہاں تک کہ اب اللہ نے ہمارے لیے (نجات کا) کوئی راستہ بنا دیا ہے، (یہ سن کر) عمر رضی اللہ عنہ نے کہا: اللہ تمہارا حامی و ناصر ہو، اور میں نے ان کے اندر ایسی نرم دلی دیکھی جو اس سے پہلے کبھی نہیں دیکھی تھی، پھر وہ پیٹھ موڑ کر چلے گئے اور میرا گمان ہے کہ ہمارے نکلنے کی خبر نے انہیں غمزدہ کر دیا تھا، انہوں نے بیان کیا کہ پھر عامر اپنے کام سے واپس آئے تو میں نے کہا: اے ابوعبداللہ! کاش آپ ابھی عمر کی نرم دلی اور ہم پر ان کا غم دیکھتے، عامر نے کہا: کیا تمہیں ان کے اسلام لانے کی کوئی امید ہے؟ میں نے کہا: جی ہاں، عامر نے ان کی (اسلام کے خلاف) شدت اور درشتی کو دیکھتے ہوئے مایوسی سے کہا: وہ شخص اس وقت تک اسلام نہیں لائے گا جب تک خطاب کا گدھا اسلام نہ لے آئے۔
سیدنا عمر کی بہن فاطمہ بنت خطاب بن نفیل رضی اللہ عنہا کا تذکرہ۔