المستدرك على الصحيحين

سیدنا عبدالرحمن بن اسحاق اپنے والد سے روایت کرتے ہیں، انہوں نے کہا: جب سیدنا عثمان بن عفان رضی اللہ عنہ نے سرزمین حبشہ کی طرف ہجرت کا ارادہ کیا تو رسول اللہ ﷺ نے ان سے فرمایا: ”اپنے ساتھ رقیہ کو بھی لے جاؤ“، اور فرمایا: ”میرا گمان ہے کہ تم دونوں ایک دوسرے کے ساتھ صبر و استقامت سے رہو گے“۔ پھر نبی کریم ﷺ نے سیدہ اسماء بنت ابی بکر رضی اللہ عنہما کو بھیجا اور فرمایا: ”مجھے ان دونوں کی خبر لا کر دو“۔ اسماء واپس آئیں تو نبی کریم ﷺ کے پاس سیدنا ابوبکر رضی اللہ عنہ موجود تھے، انہوں نے عرض کی: یا رسول اللہ! عثمان نے ایک کجاوے والے گدھے پر انہیں سوار کیا اور سمندر کی طرف لے گئے، تو رسول اللہ ﷺ نے فرمایا: ”اے ابوبکر! یہ دونوں سیدنا لوط اور سیدنا ابراہیم علیہما السلام کے بعد (اللہ کی راہ میں) ہجرت کرنے والے پہلے جوڑے ہیں۔“

محمد بن اسحاق سے مروی ہے، انہوں نے کہا: سیدہ رقیہ رضی اللہ عنہا سیدنا عثمان رضی اللہ عنہ کے نکاح میں رہیں اور ان کے ہاں ایک لڑکا پیدا ہوا جس کا نام عبداللہ رکھا گیا، وہ بچپن ہی میں فوت ہو گیا تھا، اور سیدنا عثمان رضی اللہ عنہ اس کے بعد ”ابو عبداللہ“ کی کنیت سے پکارے جاتے تھے۔

محمد بن اسحاق سے مروی ہے، وہ کہتے ہیں کہ مجھے بعض اہل علم نے بتایا کہ حبشہ کے کچھ نوجوانوں نے سیدہ رقیہ بنت رسول اللہ ﷺ کو وہاں سیدنا عثمان رضی اللہ عنہ کے ساتھ دیکھا، وہ حسن و جمال میں بے مثال تھیں، وہ لوگ حیرت و تعجب سے انہیں دیکھنے آیا کرتے تھے، یہاں تک کہ جب شاہِ نجاشی اپنے دشمن کے خلاف نکلا تو وہ سب جنگ میں مارے گئے۔ ابن اسحاق کہتے ہیں: یہ بھی کہا جاتا ہے کہ عبداللہ بن عثمان کی وفات سنہ 4 ہجری کے ماہ جمادی الاولیٰ میں ہوئی جب ان کی عمر چھ سال تھی۔