المستدرك على الصحيحين

سیدنا عبدالرحمن بن عوف رضی اللہ عنہ سے روایت ہے کہ نبی کریم ﷺ نے میرا ہاتھ پکڑا اور میں آپ ﷺ کے ہمراہ آپ کے صاحبزادے ابراہیم کے پاس گیا جو اس وقت جاں بلب تھے، نبی کریم ﷺ نے انہیں اپنی گود میں لیا یہاں تک کہ ان کی روح پرواز کر گئی، آپ ﷺ نے انہیں رکھا اور رونے لگے، میں نے عرض کی: یا رسول اللہ! کیا آپ رو رہے ہیں جبکہ آپ نے رونے سے منع فرمایا ہے؟ آپ ﷺ نے فرمایا: ”میں نے رونے سے منع نہیں کیا بلکہ میں نے دو بیوقوفانہ اور گناہ آلود آوازوں سے منع کیا ہے، ایک نعمت کے وقت لہو و لعب اور شیطانی باجوں کی آواز، اور دوسری مصیبت کے وقت چہرے پیٹنے اور گریبان پھاڑنے کی آواز، اور یہ (آنسو) تو رحمت ہے، اور جو رحم نہیں کرتا اس پر رحم نہیں کیا جاتا، اگر یہ سچا وعدہ اور برحق بات نہ ہوتی کہ ہمارے پہلے جانے والے بعد والوں سے جا ملیں گے، تو ہم تم پر اس سے بھی زیادہ غم کرتے، اے ابراہیم! ہم تمہاری جدائی پر یقیناً غمگین ہیں، آنکھ روتی ہے اور دل غمزدہ ہے، مگر ہم زبان سے وہی کہیں گے جس سے رب راضی ہو۔“

سیدنا ابوامامہ رضی اللہ عنہ سے روایت ہے کہ رسول اللہ ﷺ اپنے صاحبزادے ابراہیم کے جنازے کے پیچھے ننگے پاؤں چلے۔

سیدنا مصعب بن عبداللہ زبیری سے روایت ہے، انہوں نے کہا: مجھے یہ خبر پہنچی ہے کہ نبی کریم ﷺ کی ام ولد سیدہ ماریہ رضی اللہ عنہا کی وفات مدینہ منورہ میں سنہ 17 ہجری میں ہوئی، امیر المؤمنین عمر بن خطاب رضی اللہ عنہ نے ان کی نماز جنازہ پڑھائی اور وہ بقیع میں دفن کی گئیں۔