المستدرك على الصحيحين

قیس بن زید سے روایت ہے کہ نبی کریم ﷺ نے سیدہ حفصہ بنت عمر رضی اللہ عنہما کو طلاق دے دی، تو ان کے دونوں ماموں قدامہ اور عثمان جو کہ مظعون کے بیٹے ہیں ان کے پاس آئے، تو وہ رونے لگیں اور کہنے لگیں: ”اللہ کی قسم! آپ ﷺ نے مجھے کسی برائی یا ناپسندیدہ فعل کی وجہ سے طلاق نہیں دی۔“ اتنے میں نبی کریم ﷺ تشریف لائے اور فرمایا: ”جبرائیل علیہ السلام نے مجھ سے کہا ہے: آپ حفصہ سے رجوع کر لیں، کیونکہ وہ بہت زیادہ روزے رکھنے والی اور بہت زیادہ عبادت گزار ہیں، اور وہ جنت میں بھی آپ کی زوجہ ہیں۔“

سیدنا انس رضی اللہ عنہ سے روایت ہے کہ نبی کریم ﷺ نے سیدہ حفصہ رضی اللہ عنہا کو ایک طلاق دی، تو آپ ﷺ کے پاس جبرائیل علیہ السلام آئے اور عرض کی: ”اے محمد! کیا آپ نے حفصہ کو طلاق دے دی ہے حالانکہ وہ بہت زیادہ روزے رکھنے والی اور بہت زیادہ عبادت گزار ہیں، اور وہ جنت میں بھی آپ کی زوجہ ہیں؟“ چنانچہ آپ ﷺ نے ان سے رجوع فرما لیا۔