المستدرك على الصحيحين

امام زہری بیان کرتے ہیں کہ مہاجرین نے سیدنا عمر بن خطاب رضی اللہ عنہ سے کہا: ”آپ ہمارے بیٹوں کو بھی (مجلس میں) بلایا کریں جیسے ابن عباس رضی اللہ عنہما کو بلاتے ہیں،“ تو انہوں نے فرمایا: ”وہ تو ادھیڑ عمر کے پختہ کار لوگوں جیسا نوجوان ہے، اس کے پاس کثرت سے سوال کرنے والی زبان اور خوب سمجھ بوجھ رکھنے والا دل ہے۔“

ابراھیم بن عکرمہ بن حیی بیان کرتے ہیں کہ میں، حیی بن یعلی اور سعید بن جبیر، سیدنا ابن عباس رضی اللہ عنہما کے پاس جایا کرتے تھے، میں ان سے انساب کے بارے میں سوال کرتا تھا، حیی ان سے عربوں کے تاریخی معرکوں کے متعلق پوچھتے تھے اور سعید بن جبیر ان سے فقہی مسائل دریافت کرتے تھے، پس ایسا محسوس ہوتا تھا کہ ہم کسی اتھاہ سمندر سے فیض حاصل کر رہے ہوں۔

عبداللہ بن شداد بیان کرتے ہیں کہ سیدنا عبداللہ بن عباس رضی اللہ عنہما نے فرمایا: ”اے ابن شداد! کیا تمہیں تعجب نہیں ہوتا، میرے پاس ایک لڑکا اس وقت آیا جب میں دوپہر کے آرام (قائلولہ) کے لیے لیٹ چکا تھا، اس نے کہا کہ دروازے پر ایک شخص اجازت مانگ رہا ہے، میں نے (دل میں) کہا کہ اسے اس وقت کوئی ضرورت ہی لائی ہوگی، اسے آنے دو، وہ داخل ہوا اور کہنے لگا: کیا آپ مجھے اس شخص کے بارے میں نہیں بتائیں گے؟ میں نے پوچھا: کون سا شخص؟ اس نے کہا: علی بن ابی طالب، میں نے پوچھا: ان کے کس معاملے کے بارے میں؟ اس نے کہا: وہ کب دوبارہ اٹھائے (زندہ کیے) جائیں گے؟ میں نے کہا: سبحان اللہ! وہ اسی وقت اٹھائے جائیں گے جب قبروں والے اٹھائے جائیں گے، تو اس نے کہا: میں آپ کو ویسا ہی کہتے ہوئے دیکھ رہا ہوں جیسا یہ بیوقوف کہتے ہیں، اس پر میں نے کہا: اسے میرے پاس سے نکال دو، اور یہ میرے پاس دوبارہ ہرگز نہ آئے ورنہ میں اسے ماروں گا۔“
یہ اسناد شیخین کی شرط پر صحیح ہے۔