المستدرك على الصحيحين

سیدنا عباس رضی اللہ عنہ نے اپنے بیٹے عبداللہ کو نبی کریم ﷺ کی خدمت میں بھیجا، پس وہ آپ ﷺ کے پیچھے سو گئے، اس وقت نبی کریم ﷺ کے پاس ایک شخص موجود تھا، نبی کریم ﷺ نے ان کی طرف التفات فرمایا اور پوچھا: ”اے میرے پیارے! تم کب آئے؟“ انہوں نے عرض کیا: تھوڑی دیر پہلے، آپ ﷺ نے پوچھا: ”کیا تم نے میرے پاس کسی کو دیکھا ہے؟“ انہوں نے عرض کیا: جی ہاں، میں نے ایک آدمی دیکھا ہے، آپ ﷺ نے فرمایا: ”وہ جبرائیل علیہ السلام تھے، اور انہیں (ان کی اصل شکل میں) کوئی مخلوق نہیں دیکھتی مگر یہ کہ وہ اندھی ہو جائے سوائے اس کے کہ وہ نبی ہو، لیکن (ان کی زیارت کا یہ شرف) تمہاری آخری عمر میں تمہارے کام آئے گا،“ پھر آپ ﷺ نے دعا فرمائی: «اللَّهُمَّ عَلِّمْهُ التَّأْوِيلَ، وَفَقِّهْهُ فِي الدِّينِ، وَاجْعَلْهُ مِنْ أَهْلِ الْإِيمَانِ» ”اے اللہ! اسے قرآن کی تفسیر و تاویل سکھا، اسے دین کی سمجھ بوجھ عطا فرما اور اسے کامل ایمان والوں میں شامل کر دے۔“
یہ حدیث صحیح الاسناد ہے لیکن شیخین نے اسے روایت نہیں کیا۔

سیدنا ابن عباس رضی اللہ عنہما بیان کرتے ہیں کہ رسول اللہ ﷺ بیت الخلا تشریف لے گئے، پھر جب باہر آئے تو وہاں (وضو کے لیے) پانی کا ایک ڈھکا ہوا برتن پایا، رسول اللہ ﷺ نے دریافت فرمایا: ”یہ کس نے رکھا ہے؟“ میں نے عرض کیا: میں نے، تو رسول اللہ ﷺ نے دعا فرمائی: «اللَّهُمَّ عَلِّمْهُ تَأْوِيلَ الْقُرْآنِ» ”اے اللہ! اسے قرآن کی تفسیر و تاویل کا علم عطا فرما۔“
یہ حدیث صحیح الاسناد ہے لیکن شیخین نے اسے روایت نہیں کیا۔

مسروق بیان کرتے ہیں کہ سیدنا عبداللہ بن مسعود رضی اللہ عنہ نے فرمایا: ”اگر ابن عباس رضی اللہ عنہ ہماری عمروں کو پہنچ جاتے، تو ہم میں سے کوئی بھی ان کے دسویں حصے کے برابر بھی نہ ہوتا۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔

شقیق بیان کرتے ہیں کہ سیدنا ابن عباس رضی اللہ عنہما نے حج کے موقع پر (لوگوں کے سامنے) خطبہ دیا، انہوں نے سورہ نور کا آغاز کیا اور اس کی تلاوت کے ساتھ ساتھ اس کی تفسیر بیان کرنے لگے، میں نے (حیرت سے) کہنا شروع کر دیا کہ میں نے اس جیسا کلام نہ کبھی دیکھا اور نہ سنا، اگر فارس اور روم کے لوگ اسے سن لیتے تو ضرور اسلام لے آتے۔