المستدرك على الصحيحين

بنو نوفل کے مولیٰ ابوالحسن سے روایت ہے کہ جب سورۃ الشعراء کی یہ آیت ﴿وَالشُّعَرَاءُ يَتَّبِعُهُمُ الْغَاوُونَ﴾ [سورة الشعراء: 224] ”اور شاعروں کی پیروی تو بہکے ہوئے لوگ کرتے ہیں“ نازل ہوئی تو سیدنا عبداللہ بن رواحہ اور سیدنا حسان بن ثابت رضی اللہ عنہما روتے ہوئے رسول اللہ ﷺ کی خدمت میں حاضر ہوئے، آپ ﷺ ان کے سامنے تلاوت فرما رہے تھے یہاں تک کہ جب آپ ﷺ اس حصے پر پہنچے ﴿إِلَّا الَّذِينَ آمَنُوا وَعَمِلُوا الصَّالِحَاتِ﴾ ”سوائے ان لوگوں کے جو ایمان لائے اور انہوں نے نیک عمل کیے“ تو آپ ﷺ نے فرمایا: ”اس سے مراد تم لوگ ہو،“ پھر جب پڑھا ﴿وَذَكَرُوا اللَّهَ كَثِيرًا﴾ ”اور جنہوں نے اللہ کو کثرت سے یاد کیا“ تو فرمایا: ”اس سے مراد تم ہو،“ اور جب پڑھا ﴿وَانتَصَرُوا مِن بَعْدِ مَا ظُلِمُوا﴾ ”اور جنہوں نے اپنے اوپر ظلم کیے جانے کے بعد (حق کی خاطر) بدلہ لیا“ تو فرمایا: ”اس سے مراد بھی تم ہی ہو۔“ [سورة الشعراء: 227]

سیدنا براء بن عازب رضی اللہ عنہ سے روایت ہے کہ رسول اللہ ﷺ کی خدمت میں عرض کیا گیا: یا رسول اللہ! بے شک ابو سفیان بن حارث بن عبدالمطلب آپ کی ہجو (برائی) کرتا ہے، تو سیدنا ابن رواحہ رضی اللہ عنہ کھڑے ہوئے اور عرض کیا: ”یا رسول اللہ! مجھے اس کی ہجو کرنے کی اجازت عطا فرمائیں،“ آپ ﷺ نے فرمایا: ”کیا تم وہی ہو جس نے یہ کہا تھا کہ اللہ ثابت قدم رکھے؟“ انہوں نے عرض کیا: جی ہاں، میں نے کہا تھا: «يُثبِّتُ اللهُ مَا أَعْطَاكَ مِنْ حَسَنٍ … تَثْبِيتَ مُوسَى وَنَصْرًا مِثْلَ مَا نُصِرَا» ”اللہ تعالیٰ نے آپ کو جو حسن و خوبی عطا فرمائی ہے اسے اسی طرح ثبات عطا کرے جیسے موسیٰ علیہ السلام کو ثبات دیا اور آپ کی ایسی ہی مدد فرمائے جیسی ان کی کی گئی تھی،“ آپ ﷺ نے فرمایا: ”اور اللہ تمہارے ساتھ بھی ویسا ہی بھلائی والا معاملہ فرمائے۔“ پھر سیدنا کعب رضی اللہ عنہ اٹھے اور عرض کیا: ”یا رسول اللہ! مجھے اس کی ہجو کرنے کی اجازت دیں،“ آپ ﷺ نے فرمایا: ”کیا تم وہی ہو جس نے کہا تھا: «هَمَّتْ»؟“ انہوں نے عرض کیا: جی ہاں یا رسول اللہ: «هَمَّتْ سَخِينةُ أَنْ تُغَالِبَ رَبَّهَا … فَلَيُغلَبَنَّ مُغَالِبُ الغُلَّابِ» ”قبیلہ قریش نے اپنے رب پر غالب آنے کا ارادہ کیا، تو مغلوب کر دیا جائے گا وہ جو تمام غالب آنے والوں پر غالب آنے والے (اللہ) کا مقابلہ کرنا چاہے۔“ آپ ﷺ نے فرمایا: ”آگاہ رہو کہ اللہ تمہاری اس بات کو نہیں بھولا۔“ پھر سیدنا حسان رضی اللہ عنہ اٹھے اور عرض کیا: ”یا رسول اللہ! مجھے اجازت دیں،“ اور انہوں نے اپنی سیاہ زبان نکال کر دکھائی اور عرض کیا: ”یا رسول اللہ! مجھے اجازت دیں، اگر آپ چاہیں تو میں اپنی زبان سے ان کی آبرو کے مشکیزوں کو پھاڑ ڈالوں،“ تو آپ ﷺ نے فرمایا: ”تم ابوبکر کے پاس جاؤ تاکہ وہ تمہیں اس قوم کی تاریخ، ان کے ایام اور ان کے حسب و نسب سے آگاہ کریں، پھر تم ان کی ہجو کرو اور جبرائیل تمہارے ساتھ ہوں گے۔“
یہ حدیث صحیح الاسناد ہے، لیکن شیخین نے اسے ان الفاظ کے ساتھ روایت نہیں کیا، البتہ امام مسلم نے اسے خالد بن یزید کی روایت سے طویل نقل کیا ہے۔