المستدرك على الصحيحين

یحییٰ بن معین سے روایت ہے کہ رسول اللہ ﷺ کے مولیٰ (آزاد کردہ غلام) ثوبان کی کنیت ابو عبداللہ تھی۔

خلیفہ بن خیاط سے روایت ہے کہ رسول اللہ ﷺ کے مولیٰ ثوبان رضی اللہ عنہ کا تعلق اصل میں یمن سے تھا، وہ جنگی قیدی بن کر آئے تھے پھر رسول اللہ ﷺ نے ان پر احسان کرتے ہوئے انہیں آزاد فرما دیا، ان کی کنیت ابو عبداللہ تھی اور ان کی وفات 54 ہجری میں مصر میں ہوئی۔

احمد بن محمد بن عیسیٰ سے روایت ہے کہ حمص کے حالات اور وہاں مقیم ہونے والے صحابہ میں سے ثوبان بن جحدر رضی اللہ عنہ بھی شامل ہیں، ان کی کنیت ابو عبداللہ تھی، ان کا تعلق قبیلہ الہان سے تھا، وہ قیدی ہو کر آئے تو رسول اللہ ﷺ نے انہیں آزاد فرما دیا اور ان سے فرمایا: ”اے ثوبان! اگر تم چاہو تو ان لوگوں سے جا ملو جن سے تمہارا تعلق ہے، پھر تم انہی میں سے ہو گے، اور اگر تم چاہو تو یہیں قیام کرو تو تم ہم اہل بیت میں سے ہو گے اور رسول اللہ کی ولاء (وفاداری و وراثت کے رشتے) پر رہو گے،“ انہوں نے کہا: بلکہ میں رسول اللہ ﷺ کی ولاء پر ہی قائم رہوں گا، پس ان کی وفات 54 ہجری میں عبد اللہ بن قرط کی امارت کے دوران حمص میں ہوئی۔