المستدرك على الصحيحين

عروہ بن زبیر سے بیعتِ عقبہ میں شریک ہونے والے صحابہ کے ناموں کے متعلق مروی ہے کہ بنو غنم بن مالک بن نجار میں سے سیدنا ابو ایوب رضی اللہ عنہ شامل تھے جن کا نام خالد بن زید بن کلیب ہے، اسی طرح رسول اللہ ﷺ کے ہمراہ غزوہ بدر میں شریک ہونے والے بنو نجار کے صحابہ کے ناموں میں بھی سیدنا ابو ایوب رضی اللہ عنہ کا ذکر ہے، جن کا پورا نام خالد بن زید بن کلیب بن ثعلبہ ہے۔

ابو عمران تجیبی سے روایت ہے کہ ہم نے سیدنا ابو ایوب انصاری رضی اللہ عنہ کی معیت میں قسطنطنیہ پر حملہ کیا، ہم نے وہاں ایسی لمبی صفیں بنائیں کہ میں نے پہلے کبھی نہیں دیکھیں، سیدنا ابو ایوب انصاری رضی اللہ عنہ اسی غزوے کے دوران وفات پا گئے، انہوں نے وصیت فرمائی تھی کہ انہیں قسطنطنیہ کی دیوار کی بنیاد میں دفن کیا جائے اور ان کا قرض ادا کیا جائے، چنانچہ ایسا ہی کیا گیا۔

محمد بن عمر سے روایت ہے کہ رسول اللہ ﷺ نے سیدنا ابو ایوب انصاری اور سیدنا مصعب بن عمیر رضی اللہ عنہما کے درمیان بھائی چارہ قائم فرمایا تھا، سیدنا ابو ایوب رضی اللہ عنہ غزوہ بدر، احد، خندق اور رسول اللہ ﷺ کے ہمراہ تمام معرکوں میں شریک رہے، ان کی وفات سیدنا معاویہ رضی اللہ عنہ کے دورِ خلافت میں سن 52 ہجری میں اس وقت ہوئی جب یزید بن معاویہ نے قسطنطنیہ پر چڑھائی کی تھی، ان کی قبر قسطنطنیہ کے قلعے کی بنیاد میں ارضِ روم میں واقع ہے، جس کے متعلق یہ ذکر کیا جاتا ہے کہ لوگ وہاں کثرت سے جاتے ہیں، اس کی مرمت کرتے ہیں اور جب قحط پڑتا ہے تو اس کے ذریعے (اللہ سے) بارش کی دعا مانگتے ہیں۔