المستدرك على الصحيحين

ثور بن مجزاۃ سے روایت ہے، انہوں نے کہا: میرا گزر جنگ جمل کے دن سیدنا طلحہ بن عبید اللہ رضی اللہ عنہ کے پاس سے ہوا جبکہ وہ زمین پر گرے ہوئے تھے اور آخری سانسیں لے رہے تھے، میں ان کے پاس کھڑا ہوا تو انہوں نے اپنا سر اٹھایا اور پوچھا: ”میں ایک ایسے شخص کا چہرہ دیکھ رہا ہوں جو چاند کی طرح چمک رہا ہے، تم کس کے ساتھی ہو؟“ میں نے کہا: ”میں امیر المؤمنین علی کے ساتھیوں میں سے ہوں“، انہوں نے فرمایا: ”اپنا ہاتھ بڑھاؤ تاکہ میں تمہارے ہاتھ پر (علی رضی اللہ عنہ کی) بیعت کر لوں“، میں نے اپنا ہاتھ بڑھایا تو انہوں نے بیعت کی اور اسی وقت ان کی روح پرواز کر گئی، پھر میں نے سیدنا علی رضی اللہ عنہ کے پاس جا کر انہیں سیدنا طلحہ کے قول کی خبر دی، تو سیدنا علی رضی اللہ عنہ نے فرمایا: ”اللہ اکبر، اللہ اکبر! رسول اللہ ﷺ نے سچ فرمایا تھا: اللہ تعالیٰ نے اس بات کو قبول نہیں کیا کہ طلحہ جنت میں داخل ہوں، مگر اس حال میں کہ ان کی گردن میں میری بیعت ہو۔“

سیدنا عبداللہ بن زبیر بن عوام رضی اللہ عنہما اپنے والد سے روایت کرتے ہیں کہ غزوہ احد کے دن نبی کریم ﷺ نے دو زرہیں پہن رکھی تھیں، آپ ﷺ نے ایک چٹان پر چڑھنے کی کوشش کی لیکن (بوجھ کی وجہ سے) نہ چڑھ سکے، تو سیدنا طلحہ رضی اللہ عنہ آپ ﷺ کے نیچے (بطور سیڑھی) بیٹھ گئے یہاں تک کہ آپ ﷺ چٹان پر سیدھے کھڑے ہو گئے، سیدنا زبیر رضی اللہ عنہ فرماتے ہیں کہ میں نے نبی کریم ﷺ کو یہ فرماتے ہوئے سنا: «أَوْجَبَ» ”طلحہ نے (جنت واجب) کر لی۔“

سیدنا عبداللہ بن زبیر رضی اللہ عنہما اپنے والد سے روایت کرتے ہیں کہ میں نے رسول اللہ ﷺ کو فرماتے ہوئے سنا: ”«أُوجَبَ» طلحہ نے (جنت واجب) کر لی۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔