المستدرك على الصحيحين

عبداللہ بن وہب سے روایت ہے کہ سیدنا ابو عبیدہ بن جراح رضی اللہ عنہ کی انگوٹھی کا نقش ”الوفاء عزیز“ (وفاداری نایاب ہے) تھا۔

صلہ بن زفر، سیدنا عبداللہ بن مسعود رضی اللہ عنہ سے روایت کرتے ہیں کہ نجران کے دو سردار عاقب اور سید نبی کریم ﷺ کے پاس آئے، وہ آپ ﷺ سے مباہلہ کرنا چاہتے تھے، ان میں سے ایک نے اپنے ساتھی سے کہا: ایسا نہ کرو، اللہ کی قسم! اگر یہ سچے نبی ہیں اور انہوں نے ہمیں بددعا دے دی تو نہ ہم کبھی فلاح پائیں گے اور نہ ہی ہمارے بعد ہماری اولاد، چنانچہ ان دونوں نے عرض کیا: (مباہلہ کے بجائے) ہم آپ کو وہ مال دے دیں گے جس کا آپ مطالبہ کریں گے، ہمارے ساتھ کسی ایسے شخص کو بھیجیں جو سچا امین ہو، راوی کہتے ہیں: یہ سن کر رسول اللہ ﷺ کے صحابہ اس سعادت کے حصول کی امید کرنے لگے، آپ ﷺ نے فرمایا: ”اے ابو عبیدہ بن جراح! کھڑے ہو جاؤ“، پھر جب وہ روانہ ہونے لگے تو رسول اللہ ﷺ نے فرمایا: ”یہ اس امت کے امین ہیں“۔
شیخین نے اس حدیث کو حذیفہ رضی اللہ عنہ کی روایت سے مختصر طور پر نقل کرنے پر اتفاق کیا ہے، جبکہ اسرائیل نے ثوری اور شعبہ کی مخالفت کرتے ہوئے اسے صلہ کے واسطے سے ابن مسعود سے روایت کیا ہے اور اس کے الفاظ دیگر اسناد سے زیادہ مکمل ہیں، اس لیے میں نے اسے روایت کیا ہے کیونکہ یہ ان دونوں کی شرط پر صحیح ہے۔